00:00:00 IGIHE NETWORK KN KINYARWANDA EN ENGLISH FR FRANCAIS

Ubucuruzi bwambukiranya imipaka bukomeje gukomwa mu nkokora n’umutekano muke muri RDC

Yanditswe na Ntabareshya Jean de Dieu
Kuya 25 Ugushyingo 2022 saa 07:30
Yasuwe :

Abanyarwanda bakora ubucuruzi bwambukiranya imipaka bagaragaje ko hari imbogamizi bari guhura nazo ndetse zikanakoma mu nkokora ubucuruzi bwabo biturutse ku bibazo by’umutekano muke uri mu Burasirazuba bwa Congo.

Ibibazo by’umutekano muri Repubulika Iharanira Demokarasi ya Congo byatangiye nyuma yuko umutwe wa M23 wongeye kubura imirwano wibutsa guverinoma ya Congo ko hari amasezerano impande zombi zasinye ariko ikomeza kuyirengagiza.

Kuri uyu wa 24 Ugushyingo 2022 abakora ubucuruzi bwambukiranya imipaka, inzego z’ubuyobozi ndetse n’imiryango itari iya Leta bahuriye mu biganiro byo kurebera hamwe inzira nziza babukoramo bimakaza amahoro hagati y’ibihugu byabo.

Abagore bakora ubucuruzi bwambukiranya imipaka by’umwihariko muri RDC, bagaragaje ko kuva umwuka mubi watangira muri iki gihugu, nacyo kikikoma u Rwanda kirushinja gutera inkunga umutwe wa M23 ubucuruzi bwambukiranya imipaka bwatangiye kuzongwa n’ibibazo.

Mukeshimana Winfrida wo mu Karere ka Rusizi yavuze ko zimwe mu mbogamizi harimo ko RDC yashyizeho uburyo bwo gusaba icyemezo gituma umuntu yinjirayo kizwi nka ‘Permis de ce jour’ gihabwa umuntu kugira ngo yambuke kigurwa amadorali 30 ni ukuvuga ibihumbi 30 Frw gisanga Laiser passer umuntu aba afite mu gihe kwambukira kuri jeto bitagishoboka.

Ati “Imbogamizi duhura nazo ni ikibazo cy’icyangombwa cyashyizweho ku ruhande rwa Congo. Icyo cyangombwa rero abakora ubucuruzi buciriritse ntitwabasha kukibona ariko kivuyeho ubucuruzi bwacu bwakomeza kandi bukagenda neza.”

Iki cyemezo gitangwa ku ruhande rwa RDC kimara umwaka umuntu akigenderaho gusa cyahinduye uburyo ubucuruzi bwakorwagamo kuko udashoboye kucyishyura byagorana ko yitabira isoko ryo muri RDC.

Yavuze ko ubusanzwe iyo hari ubwumvikane bashobora gutanga imari ku bakiliya b’abanye-Congo nubwo baba badafite amafaranga bamara gucuruza amafaranga akabasanga mu Rwanda nubwo nabyo biba bitizewe.

Uwitegeka Fabienne wo mu Karere ka Rubavu, yavuze ko ikindi kibazo kibangamiye ubucuruzi bwambukiranya imipaka ari amasaha ababashije kwambuka basigaye bakora kuko umupaka uri gufungwa saa cyenda bikabateza ibihombo.

Ati “Ibicuruzwa bigerayo bukeye, ugasanga no gufunga ni kare cyane ibicuruzwa bimwe ntibibone abakiliya ariko dusaba ko habaho ibiganiro hagati y’ubuyobozi bwacu bwo mu Rwanda no ku ruhande rwa Congo amasaha agasubira nibura kuri saa kumi n’ebyiri”.

Avuga ko kubera imbogamizi yo gufunga imipaka kare hari ubwo usanga bagurishije ku giciro kitari cyiza cyangwa bakaraza imari bafite nabyo bikaba imbogamizi.

Umunyamabanga Uhoraho muri Minisiteri y’Ubucuruzi n’Inganda mu Rwanda, Niwenshuti Richard, yavuze ko nubwo ibintu bitaragenda neza ku mpande zombie, ubucuruzi bwambukiranya imipaka bwo bukomeje gukorwa.

Yavuze ko ibibazo bikigaragaramo biri gushakirwa ibisubizo birambye kuko iterambere ry’ubucuruzi bwambukiranya imipaka rishingira ku kuba abacuruzi nta mwiryane bafite hagati ubwabo kandi bagatanga ibintu byujuje ubuziranenge.

Ati “Muri iyi minsi muzi ko bitameze neza ariko ubucuruzi burakorwa, iyo tubaganiriza biba ari ukugira ngo tubereke ko nk’igihugu tubari hafi bagomba kugenda bagacuruza, ntibateze imvururu ariko nabo bakumva ko ibyo twifuza ari amahoro.”

Yavuze ko u Rwanda rufite ibikorwa bitandukanye biri gushyirwa hirya no hino bigamije guteza imbere ubucuruzi birimo nk’amasoko yambukiranya imipaka, kubaka ibyambu no gukora ibiganiro n’inzego zitandukanye hagamijwe kurebera hamwe uburyo abakora ubu bucuruzi bakoroherezwa.

Umuyobozi w’Umuryango International Alert Rwanda, Mutesi Betty, yavuze ko bateguye ibi biganiro kugira ngo bafashe aba bacuruzi kumva neza uruhare rw’ubucuruzi mu kubaka amahoro no kubumvisha ko ubucuruzi bukozwe neza kandi bushingiye ku cyizere buteza bene bwo imbere.

Amasoko nyambukiranyamipaka; igisubizo ku guteza imbere ubucuruzi

Niwenshuti Richard yagaraje ko Leta y’u Rwanda yigomwe amafaranga atari make mu kubaka amasoko yambukiranya imipaka no guhuza inzego zitandukanye kugira ngo ayo masoko yubakwe mu guteza imbere ubucuruzi bwambukiranya imipaka.

Ati “Uyu munsi turavuga amasoko agera mu 10 amaze kubakwa kandi hari n’andi ari kubakwa nkaho Kagitumba hari kubakwa isoko. Ashyirwaho kugira ngo abacuruzi bato bakorera ahantu hisanzuye ndetse banabone isoko kandi ni gahunda Leta yashyizemo ingengo y’imari nini cyane ifatanyije n’abafatanyabikorwa.”

Kugeza ubu u Rwanda rufite amasoko atandukanye arimo amasoko abiri yubatswe mu Karere ka Rusizi, isoko nyambukiranyamipaka riri muri Nyamasheke, Isoko rya Cyanika, Rubavu, Karongi, Rusumo, n’iriri kubakwa ku mupaka wa Kagitumba.

Nubwo bimeze bityo ariko hari aho usanga amasoko yubakwa ariko ntabone abayakoreramo nk’isoko ryambukiranya imipaka rya Karongi ndetse n’isoko ryubatswe mu Karere ka Rusizi ahazwi nko ku Rusizi I.

Umuyobozi Wungirije w’Akarere ka Rusizi ushinzwe Ubukungu, Ndagijimana Louis Munyemanzi, yasobanuye intandaro yo kubura kw’abakiliya muri iri soko n’ikiri gukorwa ngo ribashe gukorerwamo.

Ati “Ni isoko ryakoze ku buryo bwari buteye ishema. Ariko aho Covid-19 iziye na RDC igakuraho kwambukira kuri jeto ryabaye nk’aho rigira ibibazo by’ubucuruzi, aho abazaga kurikoreramo batari bakibona abakiliya ndetse n’abanye-Congo bari bakirizamo. Icyafashaga icyo gihe wasangaga ari uko abaturage ba Congo bashoboraga kuza mu Rwanda inshuro zirenze imwe ariko ubu ntabwo bikunda.”

Ndagijimana yavuze ko hari gukorwa ibishoboka byose ngo ubucuruzi bwongere kugenda neza, binyuze mu biganiro n’abafatanyabikorwa batandukanye cyane ko ubuzima bwa bamwe mu baturiye umupaka wa RDC n’u Rwanda bushingiye ku bushabitsi n’ubucuruzi buciriritse.

Umutekano muke ku ruhande rwa RDC wagaragajwe nk'imbogamizi ikomeye ku bucuruzi bwambukiranya imipaka
Abakora ubucuruzi batanze ibitekerezo bitandukanye ku byanozwa
Mutesi Betty yasabye abakora ubucuruzi bwambukiranye imipaka kubukora neza bukaba inzira y'amahoro
Umunyamabanga Uhoraho muri Minicom, Niwenshuti Richard yavuze ko hari gahunda yo gufasha abacuruzi bambukiranya imipaka zashyizweho na leta
Mutesi Betty uyobora International Alert yavuze ko hari gahunda yo kuganiriza abacuruzi bakumva ko ubucuruzi bwabyara amahoro
Abakora ubucuruzi bwambukiranya imipaka basabwe kwimakaza amahoro
Inzego z'ubuyobozi zagaragaje ko hari ibikorwa mu gukemura bimwe mu bibazo bigihari

Amafoto: Yuhi Augustin


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .