00:00:00 IGIHE NETWORK KN KINYARWANDA EN ENGLISH FR FRANCAIS

Nyabihu: Barirahira ibikorwaremezo byabakuye aho umuhinzi yakuye inyoni

Yanditswe na Ntabareshya Jean de Dieu
Kuya 20 Ukuboza 2022 saa 06:09
Yasuwe :

Akarere ka Nyabihu kimwe n’utundi two hirya no hino mu gihugu twagizweho ingaruka na Jenoside yakorewe Abatutsi mu 1994, yasize ibikorwaremezo hafi ya byose bishegeshwe byatumye hasabwa imbaraga nyinshi kugira ngo igihugu cyongere kwisuganya mu nzego zitandukanye z’iterambere.

Abazi Nyabihu mbere y’umwaka wa 2000 bemeza ko kari akarere kataratera imbere mu buryo bushimishije bigendanye n’aho gaherereye cyane ko kari mu twakozweho n’intambara y’abacengezi.

Hakozwe byinshi nta kugoheka kugira ngo iterambere tubona uyu munsi mu nzego nk’ubuzima n’uburezi ribashe kugerwaho.

Rwanda Coding Academy, igikorwaremezo cy’icyitegererezo mu burezi

Rwanda Coding Academy ni rimwe mu mashuri yihariye rihuza porogaramu y’uburezi rusange na tekiniki n’ubumenyingiro. Ryafunguye imiryango mu 2019 mu Karere ka Nyabihu, mu Ntara y’Iburengerazuba hagamijwe guha aabarangije icyiciro rusange ubumenyi buhagije mu gukora porogaramu za mudasobwa.

Ni ishuri rifite porogaramu y’imyaka itatu. Gahunda y’amasomo irimo ibijyanye no gukora porogaramu za mudasobwa, ubwirinzi kuri internet na porogaramu zishyirwa mu bikoresho birimo ibizamura abantu mu nyubako ndende.

Iri ni ishuri ry’umwihariko muri Afurika y’Iburasirazuba ryubatswe muri Nyabihu.

Ni igikorwa cyatwaye ingengo y’imari ihagije kandi bivuye mu misoro itangwa n’abaturage bikaba ikimenyetso cy’uko ibagarukira binyuze mu bikorwaremezo.

Abanyeshuri biga muri iri shuri bemeza ko amasomo biga azabafasha kugira uruhare mu iterambere ry’ahazaza h’igihugu nk’uko Ineza Usta Chance uri kwiga mu mwaka wa gatandatu abisobanura.

Ati “Batwigisha gukoresha Coding mu gukemura ibibazo byugarije abaturage. Ikoranabuhanga ni ryo riyoboye muri iki gihe; kuba banyigisha ibijyanye na byo bizampa amahirwe yo guhindura byinshi kandi bikemura ibibazo.”

Irakiza Divin uri mu basoje umwaka ushize muri iri shuri yemeza ko guhabwa ubumenyi mu ikoranabuhanga byabahaye amahirwe yo guhangana n’ibibazo byugarije Isi bivuye mu bushobozi bw’abana b’u Rwanda.

Ibiro by'akarere ka Nyabihu biri mu byubatswe mu myaka mike ishize

Ibitaro bya Shyira byabakuye aho umuhinzi yakuye inyoni

Mu rwego rw’ubuzima aka Karere ka Nyabihu kakoze ibishoboka byose ku buryo buri murenge wubakiwe ibigo Nderabuzima byifashishwa n’abaturage byatwaye akayabo k’amamiliyoni yaturutse mu misoro.

Hanubatswe amavuriro y’ibanze atandukanye mu rwego rwo korohereza abaturage kugerwaho na serivisi zo kwivuza aho batuye.

Mu 2014 guverinoma yafashe icyemezo cyo kuvugurura ibitaro bya Shyira bigira impinduka nziza ku baturage bo mu turere dutanu twa Gakenke, Nyabihu, Gakenke, Ngororero na Muhanga, kuko bisa n’ibiri mu masangano y’Intara y’Amajyaruguru, Amajyepfo n’Iburengerazuba mu Murenge wa Shyira.

Mu 2017 nibwo byatashywe ku mugaragaro hamwe n’umudugudu w’icyitegererezo wubakiwe imiryango 108 ikennye yo mu turere twa Gakenke na Nyabihu zuzuye zitwaye miliyari 2,7 Frw mu gihe ibitaro bya Shyira byuzuye bitwaye miliyari 5,9 Frw.

Meya w’Akarere ka Nyabihu, Mukandayisenga Antoinette, yavuze ko ibi bitaro by’Akarere ka Nyabihu byahinduye byinshi mu mitangire ya serivisi mu nzego z’ubuzima.

Ati “Ibitaro bya Shyira byari mu misozi ku buryo no kubigeraho byari ikibazo ariko ubu hari ibitaro byiza byatanzwe kuri gahunda ya Perezida wa Repubulika kandi ni ibitaro byiza cyane.”

Icuraburindi n’amazi y’ibiziba byatewe ishoti

Mbere y’umwaka wa 2000 abaturage b’Akarere ka Nyabihu bagorwaga no kubona amazi meza ndetse n’umuriro w’amashanyarazi.

Kutagira umuriro w’amashanyarazi kuko bari munsi ya 10%, byatumaga iterambere ridindira kuko bitashobokaga ko abantu bahanga imirimo itandukanye.

Kuri ubu byarahindutse kuko iterambere rya Nyabihu rigirwamo uruhare n’abaturage bayo barimo abahanga imirimo babikesha umuriro w’amashanyarazi, imihanda myiza n’ibindi.

Kuri ubu muri Aka karere hubatswe sitasiyo y’amashanyarazi yitezweho gutanga megawatt 40 ikwirakwiza umuriro mu Ntara y’Iburengerazuba n’igice gito cy’Amajyepfo mu gihe n’amazi meza kuri ubu agera ku baturage ku kigero cya 70%.

Ubuhahirane bwarorohejwe

Nyuma yo guharanira iterambere ry’Akarere no kongera umusaruro w’ibikomoka ku buhinzi n’ubworozi hahise hashakishwa uburyo bwo kugeza uwo musaruro ku masoko no kubaka amasoko hirya no hino mu Karere.

Imihanda yubatswe muri Aka karere yagize uruhare rukomeye mu iterambere ry’abaturage kuko yoroheje ubuhahirane hagati mu Karere ndetse n’utundi turere.

Uretse imihanda hanubatswe ibiraro bikomeye birimo nk’ikiraro cya Rubagabaga kigahuza n’Akarere ka Ngororero n’ikiraro cya Giciye gihuza umurenge wa Rugera n’ibindi bice by’Akarere.

Ubuyobozi bw’Akarere busobanura ko bushingiye ku kuba abaturage bagira uruhare mu iterambere ryako binyuze mu itangwa ry’imisoro bushyize imbere ibikorwa bigamije kugateza imbere.

Abari batuye mu manegeka bubakiwe imidugudu igezweho
Abaturage ba Nyabihu bagezweho n'ibikorwa byo gutuzwa aheza
Ahatari amashanyarazi kuri ubu yarahagejejwe
Hubatswe n'inganda zitunganya umusaruro w'ubuhinzi
Nyabihu ni akarere gafite uduce twinshi tw'imisozi
Ibi bitaro bifasha abaturage bo mu Turere twegeranye na Nyabihu
Ibitaro bya shyira byubatswe muri Vunga byatwaye asaga miliyari zirindwi z'amafaranga y'u Rwanda
Imihanda itandukanye yarubatswe byorohereza abaturage kugeza umusaruro ku masoko
Iki kiraro cyoroshya urujya n'uruza rw'abantu n'ibintu
Ikiraro cya Rubagabaga gihuza Nyabihu na Ngororero ni ingirakamaro mu byo gutwara abantu n'ibintu
Muri aka karere hubatswe ibiraro bifasha mu buhahirane
Umuyobozi w'Akarere ka Nyabihu, Mukandayisenga Antoinette yashimye uruhare rw'abasora mu iterambere ry'akarere
Abiga muri Rwanda Coding Academy bageze ku rwego rwo guhanga imishinga y'ikoranabuhanga
Akarere ka Nyabihu kahawe ibikorwaremezo by'amashanyarazi bituma kava mu icuraburindi

Amafoto: Shumbusho Djasiri


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .