00:00:00 IGIHE NETWORK KN KINYARWANDA EN ENGLISH FR FRANCAIS

Miliyoni zisaga 300 Frw zimaze gukusanywa mu bukangurambaga bwa ‘Cana Challenge’

Yanditswe na Ntabareshya Jean de Dieu
Kuya 30 June 2022 saa 09:31
Yasuwe :

Mu mpera z’Ukuboza 2021, nibwo Banki Itsura Amajyambere y’u Rwanda (BRD) yatangije ubukangurambaga bwiswe ‘Cana Challenge’ bwasabaga ababishoboye kugira uruhare mu gufasha imiryango itagira amashanyarazi kuva mu kizima.

BRD yari yihaye intego yo gucanira nibura imiryango ibihumbi 10 ariko hamaze gukusanywa amafaranga azacarina imiryango ibihumbi 24.000 avuye mu baterankunga batandukanye.

BRD yatangaga nkunganire kuri buri muturage ingana n’ibihumbi 100 Frw, we akiyishyurira ibihumbi 15 Frw, ubundi agahita agezwaho amashanyarazi akomoka ku mirasire y’izuba.

Aha niho rero BRD yahereye igaragariza buri wese ko yagira uruhare mu gucanira nibura umuryango umwe kuri 15000 Frw, agahindurira ubuzima imiryango.

Uyu musanzu utangwa binyuze kuri *182*8*1*501173 ku bakoresha Mobile Money na Airtel Money ndetse na nimero ya banki 20001081012, ibarizwa muri I&M Bank.

Ubukangurambaga butangizwa abantu ntabwo babwitabiriye cyane ariko buhoro buhoro hagiye habaho impinduka zifatika.

Ubwitabire bw’abantu buragaragarira mu mafaranga amaze gutangwa aho BRD ivuga ko hamaze gukusanywa amafaranga azacanira nibura ingo 24.000 mu gihe yo yari yarihaye intego y’ingo ibihumbi 10.

Uretse abantu ku giti cyabo ariko n’ibigo bitandukanye by’ubucuruzi byagize uruhare mu gutanga umusanzu muri iki gikorwa mu rwego rwo guharanira iterambere ry’imibereho myiza rihuriweho.

Abahabwa iyi mirasire bagaragaza ko bahinduriwe ubuzima

Abaturage bishimiye gukurwa mu kizima

Ku wa Kane tariki 20 Mutarama 2022 ni bwo abaturage ba mbere bahawe ibikoresho by’imirasire y’izuba bakurwa mu mwijima bahambwa urumuri.

Nirere Yvonne wo mu Kagari ka Kibare, Umurenge wa Nyagahengeri, Akarere ka Rwamagana, yavuze ko yishimiye kuba avuye mu icuraburindi.

Yagize ati "Iki gikorwa nacyishimiye kubera ko nari nsanzwe mbayeho nabi, iwanjye ari mu mwijima ubona bibabaje n’abana batishimye kuko batabashaga kwiga neza kubera kubura urumuri cyane cyane ko babonaga ko nta n’ubushobozi mfite bwo kuzageza iwanjye amashanyarazi.”

Yakomeje avuga ko yishimye cyane kuko atazongera kujya agura peteroli ya buri munsi ndetse n’abana be bazajya babasha gusubira mu masomo bibafashe gutsinda neza.

Bajeneza Immaculée wo mu Karere ka Gicumbi, Umurenge wa Nyamiyanga, mu Kagari ka Kabuga, yavuze ko mbere ataracanirwa yari mu mwijima ku buryo yagorwaga no kugura buji ya buri munsi kandi ari na ko bigendana no kuba byateza ibyago byinshi byo kuba yaterwa n’inkongi y’umuriro.

Umuyobozi w’Umushinga wo gukwirakwiza ingufu zisubira muri BRD, Rugamba Denis, yabwiye IGIHE ko kimwe mu bintu babona byatumye abantu bitabira gutanga umusanzu wabo byaturutse ku kuba amafaranga yasabwaga kugira ngo umuntu acanire umuryango atari menshi.

Ati “Ikintu mbona cyabayeho ni uko buri wese yabyibonyemo cyane kuko amafaranga ibihumbi 15 Frw kugira ngo ucanire umuryango yari make bituma abantu bitabira ubu bukangurambaga ari benshi.”

Yakomeje avuga ko nubwo hamaze gukusanywa amafaranga ashobora gucanira imiryango ibihumbi 24, iyi gahunda ngo ntizahagarara mu gihe abakora ibikorwa byo gufasha bakomeza gutanga umusanzu wabo.

Kugeza ubu ubu intego u Rwanda rwihaye ni uko nibura mu 2024 abaturage 100% bazaba bagerwaho n’umuriro w’amashanyarazi ugizwe n’ufatiye ku muyoboro mugari ndetse n’ingufu zisubira. Kugeza ubu abagerwaho na wo bageze ku kigereranyo cya 67,1%.

Ibikoresho bitanga ingufu zikomoka ku zuba bihabwa abatishoboye
Rugamba agaragaza ko intego BRD yari yihaye yagezweho ndetse ikanarenga

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .