00:00:00 IGIHE NETWORK KN KINYARWANDA EN ENGLISH FR FRANCAIS

Kirehe: Urubyiruko rwatangiye kubyaza umusaruro ubuhinzi bwa kawa

Yanditswe na Bukuru JC
Kuya 8 April 2022 saa 06:43
Yasuwe :

Ikawa ni kimwe mu bihingwa ngengabukungu u Rwanda rurambyemo mu bicuruzwa byoherezwa hanze byinjiriza igihugu amadovize akagera no ku muhinzi.

Ku bahinzi ba Kawa no mu Karere ka Kirehe, mu gice kizwi nko mu Gisaka, by’umwihariko mu Mirenge ya Gatore na Musaza, bavuga ko ikawa yahinduye ubuzima bwabo.

Bamwe biyukabiye inzu, abasore binjiza amafaranga ndetse n’abakobwa yababereye inzira yo kwikura mu bushomeri kubera imirimo bakuye mu kazi ko gutunganya Kawa.

Babitangaje kuri uyu wa Gatanu ubwo Uruganda rwa Gisaka Trading Ltd rwatangizaga ku mugaragaro igikorwa cyo kwakira umusaruro wa Kawa ku mwero (isizeni) wa 2022.

Byiringiro Enock, umusore w’imyaka 23 y’amavuko, atuye mu Murenge wa Gatore, Akagari ka Curazo, yavuze ko uyu ubaye umwaka wa gatandatu atangiye guhinga kawa, arebeye kuri se wayoboraga uruganda rwa kawa akabona uko icyo gihingwa kimuteje imbere.

Yagize ati "Mfite ibiti 2000, nabiteye mfite imyaka 17 ubu ibirimo kwera ni 800. Uyu ni umwaka wa kabiri nsaruye kuko izo mfite nkuru zifite imyaka itanu. Ayo nashoyemo nayakuremo kandi mpora nshoramo kugira ngo nyikorere neza. Kuva nahinga ikawa niyubakiye inzu yanjye, ubu ntaha uwanjye nta kibazo."

Uwizeyimana Esperance umukobwa w’imyaka 20, yavuze ko kuva mu 2019 ikitwa ubushomeri bakibagiwe kuko umunsi ku munsi abarirwa amafaranga akura mu kazi ko kujonjora kawa ku ruganda rwa Gisaka.

Yagize ati “Gukora mu ikawa byaramfashije cyane kuko nari maze kuva mu ishuri, nta gishoro nari mfite ariko nize imyuga yo kudoda imyenda mbikesha hano ku mafaranga baduhemba. Ubu tuvugana nintagira imbogamizi nshobora kuzaguramo imashini idoda.”

Umuyobozi w’uruganda rwa Gisaka Trading Ltd, Bizimungu Philemon, yavuze ko bakoresha abakozi bagera kuri 400 mu mwero w’ikawa (sizeni). Muri bo, 350 ni abakobwa n’abagore abandi 50 ni abasore n’abagabo.

Yavuze ko uruganda rumaze guhindura ubuzima bwa benshi kandi bagikeneye abandi bakozi, cyane ko buri mwaka umusaruro wa kawa bakira ugenda wiyongera.

Ati “Abo twahinduriye ubuzima ni benshi kuko dukorana n’abahinzi ba kawa bagera ku 1050. Bose bishyura mituweli, bari no mu bwizigame bwa Ejo Heza. Abenshi bakora hano mu ruganda twababumbiye hamwe tubakorera umurima wa kawa w’icyitegererezo wa hegitari ebyiri ubu umwaka utaha ziraba zitangiye kwera, nibatangira gusarura duteganya ko uwo musaruro uzajya wiyongera ku mushahara bahembwa.”

Bizimungu yaboneyeho kugaragariza akarere ko uruganda rufite imbogamizi y’ikibazo cy’umuriro w’amashanyarazi kuko ugera ku ruganda ufite intege nke, ku buryo udahagurutsa imashini zitonora kawa bigatuma batagura ibikorwa by’uruganda cyane ko bashaka no kujya batunganya kawunga iva mu bigori kuko igice uruganda rurimo hera cyane icyo gihingwa.

Umuyobozi w’Akarere ka Kirehe wungirije ushinzwe iterambere ry’Ubukungu, Nzirabatinya Modeste, yaboneyeho gusaba abahinzi ba kawa kumva ko kawa yabo ari ikirombe nk’ibindi birombe by’agaciro.

Ati “Turavuga ngo kawa ni nk’ikirombe kiba kiri mu mudugudu, abaturage rero basabwa kucyitaho kuva mu gutegura ingemwe zo guhinga, kuzitera, ifumbire, gukorera ikawa bayibagara, kuyisarura, kugeza mu kuyitunganya nk’uko birimo gukorwa hano mu ruganda.”

“Umuturage iyo akoze ibyo hasigara inshingano z’ubuyobozi zo kumushakira isoko no kureba ibiciro byiza kugira ngo acuruze neza no kurinda ikawa kugira ngo amafaranga abonetse aze ahindura ubuzima bw’umuturage."

Ku mbogamizi y’umuriro, yijeje uruganda ko bagiye kubikorera ubuvugizi, uruganda n’abaturanye na rwo bakabona umuriro ufite ingufu mu rwego rwo gushyigikira ishoramari n’ibikorwaremezo biteza imbere umuturage.

Ubuyobozi bw'uruganda bwiyemeje gukomeza gukora ibishoboka byose ngo umusaruro wa kawa ukomeze kwiyongera
Uko iminsi ishira umusaruro w'ikawa muri Kirehe ugenda wiyongera
Basogongejwe ku ikawa bahinga, bumva icyanya cyayo iyo imaze gutunganywa
Abahinzi ku mwero w'ikawa aba ari urujya n'uruza ku ruganda
Umuyobozi w’Akarere ka Kirehe wungirije ushinzwe iterambere ry’Ubukungu, Nzirabatinya Modeste yasabye abahinzi ba Kawa kumva ko Kawa yabo ari ikirombe nk’ibindi birombe by’agaciro.
Umuyobozi w’uruganda rwa Gisaka Trading Ltd, Bizimungu Philemon, yavuze ko bakoresha abakozi bagera kuri 400 mu mwero w’ikawa
Abahinzi biyemeje kurushaho gukorera kawa
Uruganda rwageneye ikipe ya Kirehe FC inkunga ya miliyoni yo kwiteza imbere

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .