Inama icyenda zikomeye zafasha abagore n’abakobwa kuba ba rwiyemezamirimo bakomeye

Yanditswe na Iradukunda Regis
Kuya 5 Kanama 2020 saa 10:19
Yasuwe :
0 0

Urwego rwo kwihangira umurimo ku bagore n’abakobwa ruri mu nzira nziza y’iterambere. Gusa abashakashatsi bavuga ko hakiri urugendo rurerure ngo rugere ku kigero cyifuzwa.

Ikigo gikora ubushakashatsi ku bijyanye no kwihangira imirimo, Global Entrepreneurship Monitor (GEM) cyagaragaje ko mu mwaka wa 2018-2019, ikigero cy’abagore mu kwihangira umurimo cyari 10.5%.

Ubu bushakashatsi bugaragaza ko ikigero cya ba rwiyemezamirimo b’abagore gikomeje kuzamuka, mu mwaka wa 2025, umusaruro mbumbe w’Isi wazazamukaho miliyari 28 z’amadolari ya Amerika.

Twifashishije urubuga rwa www.inc.com, wowe mugore cyangwa umukobwa, twagukusanyirije inama zigera ku icyenda zagufasha kwiremamo icyizere cyo kuba rwiyemezamirimo ukomeye uyu munsi.

Ntukiyumvemo ubwoba bwo gutangira

Uko byamera kose ugomba kuva mu ntekerezo z’umunezero gusa. Gutsindwa ni intambwe imwe nziza igaragaza ko umuntu yatangiye inshingano za ngombwa mu buzima.

Igihe kinini abagore bakunda gucika intege igihe batahiriwe n’ibyo batangiye bagatakaza icyizere. Gusa gutsindwa ni igice kitagomba kubura byanze bikunze mu rugamba rwo gushaka intsinzi kandi ni na ho umuntu yigira.

Inararibonye George Burns yaravuze ati “Nizera n’umutima wanjye wose ko ari byiza gutsindwa mu gikorwa ukora ukunze kuruta gutsinda gusa mu gikorwa ukora udakunda.”

Nujya kubaza banza umenye icyo ukeneye kumenya

Mu bushakashatsi ukora ugiye gutangira umushinga wawe, uzakenera n’ubwo kubaza. Banza umenye icyo ukeneye n’igihe ugikeneye ubundi ubaze buri wese kuko hari abatazaguha ibyo ukeneye.

Baza umuntu muhuye, ubarize ku mbuga nkoranyambaga nka Facebook, LinkedIn mu matsinda ndetse n’ahandi hose uhurira n’abantu. Mbere na mbere ariko ujye ubaza icyo ukeneye kumenya.

Menya intekerezo z’abakiriya ku bikorwa byawe

Kumenya icyo abantu batekereza ku bucuruzi cyangwa ibikorwa byawe ni ingenzi mu kubwongerera agaciro. Gukora ubushakashatsi ukamenya icyo abakiriya bawe bavuze nyuma ya serivisi wabahaye bizagufasha kumenya no kumva neza icyo bashaka.

Si ibyo gusa kandi uzakenera no kumenya ibivugwa ku bo muhanganye mu gikorwa kimwe. Soma imbuga zabo, uganire n’abakiriya babo, umenye aho batagererwa bizagufasha.

Ntugacike intege zo gukomeza kwiga

Urufunguzo rukomeye rw’iterambere, guhanga udushya no gutsinda, ni ubumenyi. Buri rwiyemezamirimo wese ahora ari umunyeshuri.

Hari ubushakashatsi bwagaragaje ko nibura buri rwiyemezamirimo asoma ibitabo 60 ku mwaka. Ntudakunda gusoma ujye wumva ibitabo bisomwa mu majwi, wige ukoresheze iyakure cyangwa ujye no kwiga muri kaminuza zikwegereye wagure ubumenyi.

Urubuga rwitwa Mentorbox ni rumwe mu mbuga zikomeye zagufasha kugera ku bitabo bijyanye n’ubucuruzi mu buryo bworoshye.
Ba umuhanga

Abantu baha agaciro umwimerere n’ubuhanga bwakoranywe ikintu runaka. Ubuhanga bwawe uzabuvuga mu itangazamakuru, ubicishe mu inozabubanyi rya sosiyete yawe cyangwa ukore urubuga rwawe.

Ukeneye kugaragara uko bishoboka kose, igaragaze kuri televiziyo, YouTube ndetse n’ahandi.

Gabanya kubana n’abatabyumva kimwe nawe

Uzahura n’abantu benshi bazagushidikanyaho cyangwa se ntibumve neza icyerekezo cyawe kandi warakizeho neza. Gerageza kugabanya aba bantu cyangwa wirinde kugirana ibiganiro n’abataguha ibitekerezo bituma ukomeza ujya imbere.

Agura umubano

Kugira ngo wubake sosiyete yawe y’ubucuruzi ikomere, ntabwo uzabikora wenyine. Ukeneye kurenga ubwoba bw’abazakwirengagiza ukihuza n’abageze kure, ukabikora nk’akazi kawe. Bamwe bazanga abandi bemere. Irinde kwizirika ku ntekerezo zawe gusa.

Kwihuza n’abantu benshi bishobora kungukirwamo n’impande nyinshi ariko ni ntagereranywa muri uru rwego.

Gira imishinga yagutse

Abagore n’abakobwa bakunda guciriritsa ubushobozi bwabo bigatuma batagira indoto zagutse. Ni ingenzi cyane kwita ku mpamvu ikurimo hirya y’igikorwa ugiye gukora cyangwa watangiye no gutekereza cyane ku murage ushaka gusiga inyuma.

Ellen Johnson Sirleaf, umugore wa mbere watowe nka Perezida muri Afrika, wayoboyeho igihugu cya Liberia kuva 2006-2018, yavuze amagambo akomeye.
Yagize ati “Ingano y’indoto zawe igomba buri gihe kurenga ubushobozi ufite aka kanya bwo kuzigeraho. Niba indoto zawe zitajya zigutera ubwoba, ubwo ntizagutse bihagije.”

Bitekerezeho.

Igirire icyizere

Kwihangira umurimo ntabwo ari nko gukina umupira wo ku rubura ahubwo uterera amasikariye. Ni byiza rero gukomeza kwigirira icyizere no kumva ko urugendo rwari rukomeye cyane rukoroheye. Zirikana ko Isi ikeneye uruhare rwawe nawe.

Abagore bafite amasosiyete y’ubucuruzi kuri ubungubu ni bamwe mu bantu barimo gutuma Isi iba nziza. Nihaboneka abagore benshi muri uru rwego, tuzabona imiterere y’ubucuruzi bushya bufite itandukaniro kandi buharanira Isi nziza.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .