Ihuriro ry’Amabanki mu Rwanda rigiye gutangira guhugura abakozi n’abayobozi b’amabanki

Yanditswe na Twarabanye Venuste
Kuya 6 Nzeri 2019 saa 04:41
Yasuwe :
0 0

Ihuriro ry’Amabanki mu Rwanda, (Rwanda Banker’s Association: RBA) ku bufatanye n’ihuriro ry’Amabanki mu Bubiligi rigiye kujya rihugura abakozi, abayobozi n’abayobozi bakuru b’Amabanki mu Rwanda hagamijwe ko imikorere y’urwego rw’amabanki mu Rwanda igera ku rwego mpuzamahanga.

Ayo mahugurwa yatewe inkunga n’ikigo gitanga amahugurwa mu by’Amabanki muri Luxermbourg (House of Training Luxembourg).

Mu kiganiro n’Itangazamamkuru, Umuyobozi w’Ihuriro ry’Amabanki mu Rwanda, Maurice Toroitich yavuze ko ayo mahugurwa azajya ku bakozi bagabanyije mu byiciro bitatu.

Ati “ Amahugurwa azahabwa abakozi basanzwe aribo tugiye gutangiriraho, tuzakurikizeho abayobozi bo ku rwego twakwita urwa mbere (managers) n’abayobozi bakuru bo ku rwego rwo hejuru mu mabanki.”

Buri cyiciro cy’amahugurwa kizajya kiba gikubiyemo; amasomo yo ku rwego mpuzamahanga azajya atangirwa mu ishuri, amasomo n’imyitozo binyuze kuri internet yateguwe hashingiwe ku buryo amabanki ahagaze mu Rwanda n’ibizamini byanditse bizajya bigenzurwa n’Impuguke mpuzamahanga.

Maurice Toroitich avuga ko basanze ayo mahugurwa akenewe cyane nyuma yo kugenzura bagasanga imishahara abakora mu mabanki mu Rwanda bahembwa itajyanye n’umusaruro batanga.

Ati “Igiciro cyishyurwa abakora mu mabanki kiri hejuru, kurusha ibyo binjiza. Usanga umuntu ashaka akazi karuse kuko yari afite mu mushahara ariko ugasanga ibyo akora ni bimwe. Dufite umusaruro muke ugereranyije n’umushahara.”

Kuba abiga iby’amabanki muri Kaminuza barangizanya ubumenyi budahagije bwageza urwego rw’amabanki mu Rwanda ku mikorere mpuzamahanga, nayo ngo ni indi mpamvu yatumye batekereza kuri ayo mahugurwa.

Banki nkuru y’u Rwanda (BNR) ivuga ko ari umusanzu ukomeye ku rwego rw’ibigo by’imari mu Rwanda kuko byahendaga amabanki kohereza abakozi bayo mu mahugurwa nk’ayo, nkuko byemezwa na Uwase Peace Ushinzwe kutejegajega k’ubukungu bw’imari muri BNR.

Ati “Twumva ari ibintu twishimiye kuko wasangaga amabanki abikora ukwayo, banki igafata abokozi ikabohereza hanze. Murumva igiciro bitwara banki kohereza umwe cyangwa babiri. Bazigishiriza abakozi hano mu Rwanda turizera ko bazigisha abakozi benshi mu buryo bunoze kandi buhendutse, ni igikorwa dushyigikiye nka Banki nkuru y’u Rwanda.”

Icyiciro cya mbere cy’ayo mahugurwa kigizwe n’amasomo 9 (modules), kizatangira ku wa 15 Ukwakira 2019 mu masomo azajya atangwa ku mugoroba, gisoze mu Ukuboza 2019.

Ikizamini kikazatangwa ku rwego rw’igihugu mu mpera za Gicurasi 2020, abazagisoza bakazahabwa impamyabumenyi zemewe na Banki Nkuru y’u Rwanda ndetse na Minisiteri y’Imari n’igenamigambi.

Ayo mahugurwa zatangwa mu byiciro bitatu , bizabanzirizwa n’icy’abakozi b’amabanki kizatangirana na Gicurasi 2020 gikurikirwe n’icy’abayobozi, hazasoze abayobozi bakuru b’amabanki.

Nyuma yo guhugura amabanki bakazahugura ibigo bitanga serivisi z’ubwishingizi. Ihuriro ry’amabanki ryatangaje ko impamyabumenyi izajya itangwa muri ibyo ibyiciro bitatu izajya isabwa ku bashaka akazi.

Mu cyiciro cya mbere, abahugurwa biyandikisha bagaragaje impamyabumenyi y’icyiciro cya kabiri cya kaminuza bakishyura 805,000 Frw nk’umusanzu w’amasomo bazigishwa bicaye mu ishuri.

Nyuma y’ayo masomo, hakurikiraho amasomo baziga binyuze kuri Interineti azishyurwa 225,000 Frw yiyongeraho 80,000 Frw yose hamwe akaba Frw 1,110,000 kuri icyo cyiciro cy’abakozi basanzwe.

Imikorere y’Amabanki n’ibigo by’imari muri iki gihe

Ikigo cy’amabanki mu Rwanda kigaragaza ko cyasanze, kugeza ubu mu bijyanye n’imari mu Rwanda; banki 11 z’ubucuruzi arizo zikora neza, ibigo by’imari bitatu, Banki y’u Rwanda itsura amajyambere na Koperative imwe ikora mu buryo bw’ikigo cy’imari. Hakaba n’ibigo 14 byigenga bitanga serivisi z’ubwishingizi.

Inyigo yabo igaragaza ko ibigo by’imari byo mu Rwanda biri inyuma mu mikorere yabyo kandi ko hatagize igikorwa byazagira ingaruka ku bukungu bw’u Rwanda.

Ikibazo kigomba gukemurwa mu nzira ebyiri zirimo; amahugurwa, ku mabanki, ibigo by’imari, ibitanga ubwishingizi, abantu ku giti cyabo, abashora imari mu buhinzi n’abanyeshuri bitegura kujya mu rwego rw’Imari n’amabanki.

Umuyobozi w'Ihuriro ry'Amabanki mu Rwanda, Maurice Toroitich yavuze ko kugeza ubu umusaruro abakozi batanga utangana n'Imishahara bahembwa ariyo mpamvu bateguye umushinga wo kubahugura
Impuguke mu by'Imikorere y'Amabanki n'imari mu Ihuriro ry'Amabanki mu Bubiligi, Louis Delcart yemeje ko amasomo bazatangira muri ayo mahugurwa azajya atunga uwahuguwe azamurwa mu ntera
Umuyobozi Mukuru wa I&M Bank Rwanda Plc, Robin Bairstow mu kiganiro n'abanyamakuru
Banki nkuru y’u Rwanda (BNR) ivuga ko ari umusanzu ukomeye ku rwego rw’ibigo by’imari mu Rwanda kuko byahendaga amabanki kohereza abakozi bayo mu mahugurwa nk’ayo
Amahugurwa yitezweho kuzageza urwego rw'amabanki yo mu Rwanda ku mikorere mpuzamahanga nkuko babitangarije mu kiganiro n'itangazamakuru

Amafoto: Dushimimana Ami Pacifique


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza