Cherno Gaye uyobora Cogebanque yavuze ku ngaruka za Coronavirus n’ingamba bafashe

Yanditswe na Twarabanye Venuste
Kuya 13 Gicurasi 2020 saa 08:17
Yasuwe :
0 0

Urwego rw’amabanki mu Rwanda rwakoze impinduka muri serivisi rutanga hagamijwe kunganira ingamba za Guverinoma zo kwirinda ikwirakwira ry’icyorezo cya COVID-19, giterwa n’agakoko ka Coronavirus.

Amabanki n’ibindi bigo by’imari byakuyeho amafaranga acibwa abakoresheje serivisi zabyo bayohererezanya cyangwa bishyurana.

Ibyo byajyanye no gusubika kwishyura inguzanyo ku bakiliya kubera ibikorwa byabo byagizweho ingaruka n’ihagarikwa ry’imirimo mu kwirinda Coronavirus.

Iki cyorezo cyagize ingaruka ku bukungu rusange bitewe n’ibikorwa byahagaritswe byari byitezweho inyungu.

Urwego rw’amabanki ruri mu zizagirwaho ingaruka bitewe nuko ubukungu bw’ibigo [aribyo bakiliya b’amabanki] buzahungabana ku buryo hari n’ibiza bitagishobora kwibeshaho bigakenera inkunga n’igihe cyo kwiyubaka.

Mu kiganiro kivuga ku mikorere y’urwego rw’amabanki nyuma ya COVID-19, Umuyobozi Mukuru wa Banki Nyarwanda y’u Bucuruzi, Cogebanque, Cherno Gaye, yagiranye na Televiziyo CNBC Africa, yavuze ko Coronavirus izatuma ubucuruzi bw’amafaranga bugorana.

Ati “Haracyari kare ngo umuntu ngo abe yamenya igihombo nyakuri kizaterwa na COVID-19, usibye ko bigaragara neza ko hazabaho guhungabana gukomeye, aho tuzabona bigora ibigo gusubira nk’uko byahoze. Hari bimwe bizahura n’ibibazo ariko bishobore kubyikuramo, ibyo ni ibyubakiye ku nkingi zitajegajega. Hari n’ibindi bizahungabana ku buryo bizakenera ubufasha bwa leta kugira ngo byongere gukora. Kugira ngo byumvikane neza ibyo bizakenera gufata igihe runaka cyo kwiyubaka bundi bushya.”

Ihungabana ry’ibikorwa bitandukanye rishobora gutuma amabanki abura abayabitsamo cyangwa bya bigo bikabura uko byishyura inguzanyo byari bifite, nayo akabura uko atanga inguzanyo kuri byinshi n’abantu bashaka kwiyubaka.

Ati “Ikizabaho ni uko, niba tuzahura n’ikibazo cy’inguzanyo [zitishyurwa], icyo bisobanuye ni uko bizahungabanya n’igishoro cyacu, ibyo nabyo icyo bizatanga ni uko ubushobozi bwacu bwo gutanga imyenda bushobora guhungabanaho gato.”

Igisabwa ngo ni uko banki zakurikiranira hafi ibibazo abakiliya bari guhura nabyo zikabafasha hakiri kare, kugira ngo impande zombi zitangire kugira icyo zikora amazi atararenga inkombe.

Yakomeje ati “Buri wese atekereza ko mu mabanki ari hamwe mu bagomba kuboneka ibisubizo, nkubwije ukuri ni uko binagendanye no kuba amabanki nayo yarahuye n’iki kibazo, igipimo ubukungu buzahungabana kizaba kinini cyane. Nta n’ubwo nakwizera niba tuzaba muri hamwe hava ibisubizo usibye ko tubyifuza.”

“Ibi ntabwo ari ugutanga impuruza gusa ni uko tugomba kwitonda kandi tugakorana bya hafi n’abakiliya bacu tukanafasha aho bishoboka hakiri kare mu rwego rwo kugabanya ibihombo cyangwa ibyakwangirika.”

Umuyobozi wa Cogebanque, Cherno Gaye, yavuze uko ibihe bya Coronavirus byaharuriye inzira imikoreshereze y'ikoranabuhanga mu gushaka serivisi za banki

Amatangazo menshi y’ibigo by’imari n’amabanki yashyizwe hanze mu bihe bya COVID-19 yerekana isubikwa ryo kwishyura inguzanyo mu gihe cy’amezi atatu.

Gaye asanga ari umwanzuro mwiza kuko iyo habaho abasonera abakiliya inguzanyo cyangwa inyungu kuri zo byari kuba ikibazo kuri urwo rwego.

Kuri ruhande rwa Cogebanque yagize ati “Nka banki [Cogebanque] turi gukorana bya hafi n’abakiliya bacu mu buryo dushoboye, nko kuborohereza no kubongerera igihe cyo kwishyura inguzanyo, kubafasha guhererekanya amafaranga hifashishijwe ikoranabuhanga nta kiguzi n’ibindi.”

Muri COVID-19 ikoranabuhanga ryateye imbere mu ngeri zitandukanye ndetse ryifashishwa na buri wese.

Cherno Gaye yavuze ko hari “Abatinyaga kurikoresha bakemanga ibibazo by’umutekano waryo barikoresheje nko kugerageza.’’

Abasesenguzi basanga hari amahirwe menshi yuko banki zaba zigiye guhindura serivisi mu buryo buhoraho hagakomeza kwimakazwa ikoranabuhanga mu gihe kirambye.

Cogebanque Plc imaze imyaka 20 itanga serivisi za banki mu Rwanda, ifite serivisi zitangwa hifashishijwe ikoranabuhanga binyuze muri Internet Banking, Mobile Banking, Smartcash Card n’amakarita ya MasterCard (Debit, Credit na Prepaid) afasha abayakoresha kwishyura no kubikuza ahantu harenga miliyoni 36 ku Isi yose.

Ufite MasterCards (Debit, Credit na Prepaid) ya Cogebanque ashobora kwishyura no kubikuza ahantu harenga miliyoni 36 ku Isi yose
Cogebanque ifite serivisi z'imari igenera abakiliya bayo binyuze mu ikoranabuhanga

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Special pages
. . . . . .