Ecobank Rwanda yatunguye abishyuye ibicuruzwa bakoresheje ikoranabuhanga ibagenera impano zihariye

Yanditswe na Evariste Nsengimana
Kuya 6 Ukuboza 2019 saa 07:31
Yasuwe :
0 0

Banki y’Ubucuruzi ya Ecobank Rwanda Plc yatunguye abakiliya bayo baguze ibicuruzwa mu iguriro rya Ndoli [Ndoli Super Market] bakishyura bakoresheje ikoranabuhanga rya EcobankPay, ibagenera impano z’inyongera kuri bimwe mu bigurishirizwamo.

Mu ntangiriro z’Ukuboza 2019 nibwo Ecobank Rwanda Plc yatangije poromosiyo ya Ryoherwa na EcobankPay, aho abakiliya bakoresha EcobankPay igihe bishyura ibicuruzwa na serivisi zitandukanye mu maguriro ayo ariyo yose hifashishijwe ikoranabuhanga mu kugabanya ingano y’amafaranga ahererekanywa mu ntoki n’asanzwe acibwa abacuruzi iyo bishyurishije amakarita.

Abakiliya n’abacuruzi bakoresha ubu buryo batsindira ibihembo birimo televiziyo nini [Flat Tv], telefoni zigezweho, frigo n’itike z’indege zijya mu Bushinwa na Dubai, muri Leta Zunze Ubumwe z’Abarabu bakanishyurirwa ibizabafasha igihe bazaba bariyo.

Mu gutangiza iyi poromosiyo, ubuyobozi bwa Ecobank bwabwiye IGIHE ko “Ibyo ari ibihembo bya buri kwezi ariko hari n’ibya buri wa gatanu, aho tuzajya tujya mu maguriro atandukanye dutungure abakiliya, uguze yifashishije ubu buryo tumuhembe.”

Kuri uyu 6 Ukuboza 2019 nibwo Ecobank imaze kubaka izina mu gutanga serivisi z’imari mu bihugu 33 muri Afurika hose cyatunguye abaguriye mu iguriro rya Ndoli riherereye i Remera mu Mujyi wa Kigali, bifashishije Ecobank Pay, ibagenera impano zitandukanye.

Umwe mu bahawe impano witwa Munyentwari Sebagabo Emma yabwiye IGIHE ko yatunguwe kuko yaje guhaha atiteguye ko ashobora kubihemberwa.

Ati “Sinari mbyiteguye nyine nishyuye nkoresheje EcobankPay ngura ibintu bitandukanye bifite agaciro ka 2200 Frw bahita bampa ibihembo bishimishije harimo umupira n’ibindi banguriye muri iri guriro.”

Yakomeje agira ati “Ubu buryo bwo kwishyurira kuri telefoni buroroha, si kimwe n’uko wagendana amafaranga mu ntoki bakayakwiba cyangwa ukayata.”

Mugenzi we witwa Iradukunda Ange Christian wiga muri Kaminuza y’u Rwanda Ishami ry’Ikoranabuhanga, yavuze ko ajya kumenya ubu buryo bwa EcobankPay yabubwiwe n’umukozi wa Ecobank yumva ni bwiza ahitamo kubukoresha.

Ati “Nahise ntangira kubukoresha, ubushize naguze amasambusa mu mujyi mbukoresheje. Uyu munsi nabwo nari ndi kugenda ndavuga nti reka nshake ikintu nagura hano.”

Iradukunda yavuze ko kuva ubu buryo bwatangizwa bwamufashije atakigendana amafaranga mu ntoki ngo rimwe na rimwe abe yayata cyangwa bakayamwiba, ahubwo akoresha ayo afite kuri banki akishyura bitamusabye kujya kuyabikuza.

Ati “Ni ukuvuga ngo kumwe umuntu yirirwa agendana amafaranga mu ntoki yayashyira kuri banki noneho igihe ugeze aho bakoresha Ecobank Pay ukishyura. Ni ibintu nishimiye kuko nahashye ibyo nashakaga none bampaye n’impano z’inyongera.”

Iradukunda yavuze ko mu byumweru bibiri amaze akoresha ubu buryo yabonye bugezweho umuntu wese akwiye kubukoresha, akaba yagira n’amahirwe yo gutsindira ibihembo nyamukuru.

Kwishyura ibicuruzwa na serivisi ukoresheje EcobankPay, usabwa kumanura application isanzwe ifasha abakiliya bayo kubona serivisi z’imari bifashishije Application izwi nka ‘Ecobank Mobile App’ kuri Play Store, ijya muri telefone zigezweho.

Nyuma yo kuzuza ibisabwa birimo umwirondoro w’umukiliya muri iyo application na nimero ya konti, ahitamo ahanditse ‘Pay Marchants’ cyangwa se kwishyura ibicuruzwa, agahita abona aho ashyira kode iranga umucuruzi wiyandikishije mu kwishyurwa hakoreshejewe ubu buryo.

Uretse kuba yakoresha iyo kode kandi hari n’uburyo yahitamo gutunga telefoni ku kimenyetso cy’ikoranabuhanga (QR Code) kikayisoma [Scan] maze agakurikiza amabwiriza kugeza yishyuye ibicuruzwa na serivisi ashaka hatabayeho guhererekanya amafaranga mu ntoki.

Ubwo cyatangizaga iri koranabuhanga, Ecobank yagaragazaga ko yahagurukiye gutanga serivisi ku bakiliya bayo hose binyuze mu ikoranabuhanga rihambaye, bitangirira ku gufungura konti ya banki utarindiriye kuzuza impapuro hifashishijwe telefoni gusa.

Abaguriye mu iguriro rya Ndoli bakoresheje Ecobank Pay nibo bahawe impano na Ecobank
Byari ibyishimo ku bahawe impano na Ecobank kubera kwishyura bakoresheje Ecobank Pay
Bamwe mu baguze bakishyura na Ecobank Pay bari mu iguriro rya Ndoli
Iradukunda arimo kwishyura akoresheje Ecobank Pay
Kwishyura na Ecobank pay bisaba gutunga telefoni kuri QR code y umucuruzi
Ubwo Iradukunda ufite umupira ku rutugu yashyikirizwaga impano ye
Ubwo abakozi ba Ecobank bashyikirizaga Munyentwari impano bamugeneye kuko yishyuye akoresheje Ecobank Pay
Umukozi wa Ecobank arimo kwishyura impano bahaye abakiliya na we akoresheje Ecobank Pay

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza