00:00:00 IGIHE NETWORK KN KINYARWANDA EN ENGLISH FR FRANCAIS

Bwa mbere Volkswagen igiye gukorera mu Rwanda imodoka zifashishwa mu buhinzi

Yanditswe na Cyprien Niyomwungeri
Kuya 16 Ukuboza 2022 saa 03:03
Yasuwe :

Umuyobozi w’Uruganda rwa Volkswagen muri Afurika, yatangaje ko guhera umwaka utaha uru ruganda ruzatangira gukorera mu Rwanda imodoka zifashishwa mu buhinzi zikoresha amashanyarazi, bikazagendana no kuzana imodoka nshya muri serivisi zijyanye no gukodesha imodoka izwi nka “Move”.

Hashize imyaka ine mu Rwanda hatangiye ibikorwa bya Volkswagen byo guteranya imodoka zo muri ubu bwoko, aho kugeze uyu munsi imaze kuzana amoko umunani y’imodoka ku isoko zirimo n’izikoresha amashanyarazi.

Mu ruzinduko rw’iminsi itatu Umuyobozi wa Volkswagen muri Afurika, Martina Biene, yagiriraga mu Rwanda, yatangaje ko intambwe uru ruganda rumaze gutera mu Rwanda ishimishije.

Yatangaje ko mu ruzinduko rwe yabonanye n’abayobozi batandukanye barimo abo muri Minisiteri y’Ubuhinzi n’Ubworozi, bemeranya ko guhera umwaka utaha mu Rwanda hazakorerwa imodoka zifashishwa mu buhinzi [e-tractor], bikaba ari ubwa mbere ku Isi yose bizaba bikozwe n’uru ruganda.

Martina Biene yasobanuye ko ari urugendo Volkswagen imaze igihe, ku buryo hari igitekerezo cy’uko izi modoka zazaba ziriho imirasire y’izuba yo kuzongerera umuriro, bikazafasha abo mu bice by’icyaro kuzikoresha no kongera umusaruro.

Ati “Twabonye ko intambara ya Ukraine n’u Burusiya yateye ikibazo ku biribwa, turashaka gutanga umusanzu ukwiye ku baturage batuye mu byaro mu nzira yo gukemura ikibazo”.

Umuyobozi wa Volkswagen mu Rwanda, Serge Kamuhinda, yavuze ko izo modoka zifashishwa mu buhinzi abaturage batazasabwa kuzigura, ahubwo bazajya bazikoresha bishyure bigendanye n’igihe bazikoresheje.

Ati “Hazashyirwaho aho izi modoka zongererwamo amashanyarazi, aho hantu habe agakiriro, habe aho guhunika imyaka, aho kubonera serivisi zijyanye n’ubuhinzi. Iyi gahunda tuzabasha kuyagura mu gihugu n’ahandi muri Afurika. Ni ubwa mbere Volkswagen igiye kubikora ku Isi yose kandi bitangiriye mu Rwanda”.

Imodoka nshya 100 za Virtus ku isoko ry’u Rwanda

Mu myaka ine Volkswagen imaze mu Rwanda, yahatangije serivisi yo gutwara abantu, iyo ku kibuga cy’indege n’iyo guha imodoka ibigo byikorera cyangwa se ibyegamiye kuri leta.

Volkswagen yashinze ibigo bibiri biyishamikiyeho harimo Volkswagen Mobility Solutions Rwanda itanga serivisi zijyanye no gukodesha imodoka binyuze muri serivisi izwi nka “Move” na CFAO Motors Rwanda ariyo iteranya imodoka.

Kamuhinda yatangaje ko Volkswagen igiye kuzana imodoka zirenga 100 mu mpera z’umwaka utaha kugira ngo yongere imodoka muri serivisi zo gutwara abantu no kuzikodesha. Ibi byiyongera ku kuvugurura ikoranabuhanga no gukosora ibitaragendaga neza.

Ati “Urebye umubare w’abashaka serivisi zacu uriyongera ukaruta ibyo dushobora gutanga ubu, ku buryo umwaka utaha tuzaba twageze aho isoko turihaza”.

Imodoka zizazanwa mu Rwanda zitwa Virtus, ni imodoka y’ivatiri iri hejuru, nta kibazo cyo kujya mu mikuku, mu mihanda itari kaburimbo, ifite ikoranabuhanga rigezweho, ifite butu [ububiko] nziza nini ku buryo twayikoresha ku kibuga cy’indege, mu bigo, mu gutwara abantu. Ni imodoka itanywa lisansi cyane kandi isa neza.

Ubusanzwe Volkswagen yakoreshaga imodoka za Polo, izi zizagurishwa binyuze muri gahunda yo kugurisha imodoka zayo zakoze zimaze imyaka ibiri.

Gutwara abantu mu buryo rusange ni ikibazo gikomeje kuba ingorabahizi by’umwihariko mu Mujyi wa Kigali. Kamuhinda avuga ko nka Volkswagen ari ikibazo bakurikiranira hafi kandi mu biganiro umuyobozi w’uru ruganda muri Afurika yagiranye na Minisitiri w’ibikorwaremezo cyavuzweho.

Ati “Ikibazo giterwa ahanini nuko imodoka zacu ari ntoya kandi muri Volkswagen tugira amasosiyete akora bisi nini ku buryo umuyobozi wacu yemereye Minisitiri ko ‘iki kibazo nacyo tugiye kugihagurukira”.

Mu ntangiriro z’igihembwe cya kabiri cya 2023, Volkswagen irateganya kumurika imodoka ya Amarok nshya yakorewe muri Afurika y’Epfo. Mu mishinga ifite mu Rwanda harimo no kongera ubwiza bw’ibikomoka kuri Peteroli bikoreshwa n’imodoka mu gihugu, mu kugabanya imyuka ihumanya ikirere.

'Virtus' imodoka nshya zigiye kujya zikoreshwa muri serivisi ya 'Move' mu Rwanda

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .