00:00:00 IGIHE NETWORK KN KINYARWANDA EN ENGLISH FR FRANCAIS

Bidasubirwaho u Rwanda na Angola byakuyeho gahunda yo gusoresha kabiri

Yanditswe na Kanamugire Emmanuel
Kuya 26 July 2022 saa 04:08
Yasuwe :

Guverinoma y’u Rwanda n’iya Angola byatangiye gushyira mu bikorwa amasezerano yo guca burundu gusoresha kabiri ku byerekeye imisoro ku musaruro, ibihugu byombi byari biherutse gushyiraho umukono.

Ni nyuma y’ishyirwaho ryitegeko nº 016/2022 ryo ku wa 29/06/2022 ryemeza burundu ayo masezerano yashyiriweho umukono i Kigali ku wa 15 Mata 2022 hagamijwe kwagura ubufatanye mu by’ubukungu no guteza imbere imikoranire mu by’imisoro ryasohotse mu igazeti ya leta ku wa 22 Nyakanga 2022.

Aya masezerano arebana n’umusoro ku musaruro w’umuntu ku giti cye, uwa sosiyete, uw’ubukode bw’imitungo itimukanwa n’indi ku ruhande rwa buri gihugu.

Azaba areba n’ubundi bwoko bw’imisoro buzashyirwaho nyuma y’uko ashyizweho umukono aho buri gihugu kigomba kuzajya kimenyesha ikindi impinduka zabayeho mu itegeko rigenga imisoro.

Muri iri tegeko harimo n’ibyerekeye uko amafaranga ya pansiyo, imishahara, uduhimbazamusyi, agenewe ibikorwa by’ubushakashatsi no kwimenyereza umwuga bikatwa umusoro ariko hari n’igihe biba ari ngombwa ko uwagombaga kuwutanga asonerwa.

Ubwo aya amasezerano hagati y’ibihugu byombi yashyirwagaho umukono muri Mata uyu mwaka, Minisitiri w’Ububanyi n’Amahanga n’Ubutwererane ku ruhande rw’u Rwanda, Dr Vincent Biruta, yavuze ko yitezweho gufasha abaturage ku mpande zombi.

Yagize ati “Ntabwo ari ibijyanye na dipolomasi gusa ahubwo ni ibizana inyungu ku baturage b’ibihugu byombi. Tugiye gukorera hamwe harebwa uko abaturage babyungukiramo. Abanyarwanda bashobora gusura Angola bagakorerayo ubucuruzi bakungukira ku masezerano twashyizeho umukono yo kwirinda gusoresha kabiri. Hari uburyo bwinshi Abanyarwanda n’Abanyangola bazayungukiramo.”

U Rwanda na Angola byashyizeho komisiyo ihuriweho ishinzwe gukurikirana iby’ubutwererane impande zombi zemeranyijweho. Muri Mata uyu mwaka ni bwo abagize iyo komisiyo bahuriye mu nama yabo ya mbere.

Itsinda ry’u Rwanda ryari riyobowe na Minisitiri w’Ububanyi n’Amahanga n’Ubutwererane, Dr Vincent Biruta na mugenzi we Amb. Tete Antonio, ku ruhande rwa Angola.

Uretse ibijyanye no gukuraho gahunda yo gusoresha kabiri, ibihugu byombi byanashyize umukono ku yandi masezerano ku guhererekanya abakekwaho ibyaha, ubufatanye mu gutanga ubufasha mu by’amategeko no guhererekanya abanyabyaha.

Hari kandi amasezerano y’imikoranire mu by’ubutwererane no guteza imbere urwego rw’ubuhinzi n’ubworozi, guteza imbere imiyoborere mu nzego z’ibanze, uburezi, ubucukuzi bw’amabuye y’agaciro n’amahugurwa y’abakozi ba leta.

Mu Ugushyingo 2021 itsinda ry’abashoramari 17 bo muri Angola bagiriye uruzinduko mu Rwanda rwari rugamije gushaka inzego bashobora gushoramo imari kugira ngo bakomeze kwagura ibikorwa byabo.

Uwari umuyobozi w’Urwego rw’Abikorera muri Angola, Isabel E. Soares da Cruz, yavuze ko bashaka gushora imari mu rwego rw’ubuhinzi n’ubworozi, ubucuruzi bw’amafi, ikoranabuhanga ndetse no guteza imbere inganda.

Yagize ati “Abanyangola turifuza gushora mu buhinzi ndetse n’ubworozi bw’amafi, twamaze kumenya ko u Rwanda rutumiza amafi mu Bushinwa, twumvise bigoye cyane kandi natwe muri Angola dufite amafi menshi. Twizeye ko dufatanyije twakora byinshi byiza."

U Rwanda na Angola binasanganywe umubano ushingiye kuri dipolomasi; buri gihugu gifite ambasade mu kindi. Angola ihagarariwe na Amb. Eduardo Filomeno Barber Leiro Octavio mu Rwanda mu gihe hari Gasamagera Wellars ku rundi ruhande.

Abanyarwanda bajya muri Angola bakuriweho Visa.

Angola ni igihugu gifite ubukungu buciriritse giherereye mu Majyepfo ya Afurika kikagira umusaruro mbumbe wa miliyoni 61,4 z’amadolari ya Amerika.

Yabonye ubwigenge mu 1975 ivuye mu kwaha kwa Portugal ariko ihita yinjira mu ntambara ya gisivile yarangiye neza mu 2002.

Amatora ya Perezida ku nshuro ya kabiri yabaye muri iki gihugu ku wa 25 Kanama 2017, yasize Joao Lourenço wo mu ishyaka riharanira kubohoro Angola (MPLA) ari we wegukanye intsinzi.

Yabanjirijwe na Jose Eduardo dos Santos na we wo muri iryo shyaka wagiye ku butegetsi mu 1979.

Iki gihugu gituwe na miliyoni 32,9 kikaba ku mwanya wa munani mu bifite ubukungu bwihagazeho muri Afurika yo munsi y’ubutayu bwa Sahara kibikomoye ahanini ku bucukuzi bwa peteroli dore ko kiza ku mwanya wa kabiri muri Afurika yo munsi y’ubutayu bwa Sahara mu gucukura peteroli nyinshi.

Muri Angola habarizwa gaz n’amabuye y’agaciro y’ubwoko burenga 25 harimo zahabu, umuringa, diamant, Nickel, platinum, chromite, manganese, gasegereti, wolfram, quartz n’ayandi.

Mu mafaranga akoreshwa mu ngengo y’imari y’igihugu agera kuri 65% ava kuri mu bucukuzi bwa peteroli ndetse igize 97% by’ibyo Angola yohereza mu mahanga. Nko mu 2020 yohereje mu mahanga ibicuruzwa bifite agaciro ka miliyari 17 z’amadolari.

Minisitiri w’Ububanyi n’Amahanga n’Ubutwererane, Dr Vincent Biruta na mugenzi we wa Angola, Amb. Tete Antonio ubwo impande zombi zashyiraga umukono ku masezerano y'ubufatanye mu nzego zitandukanye, muri Mata uyu mwaka

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .