00:00:00 IGIHE NETWORK KN KINYARWANDA EN ENGLISH FR FRANCAIS

Amajyepfo: Imihanda ya kaburimbo ya kilometero zisaga 25 igiye kubakwa mu turere dutatu

Yanditswe na Prudence Kwizera
Kuya 2 July 2022 saa 07:47
Yasuwe :

Mu mijyi y’uturere twa Huye, Ruhango na Muhanga mu Ntara y’Amajyepfo hatangijwe ku mugaragaro ibikorwa byo kubaka imihanda ya kilometero zisaga 25 yitezweho kuyiteza imbere no kongera ubwiza bwayo.

Iyo mihanda iherutse gutangizwa kubakwa ku mugaragaro muri utwo turere izatanga akazi ku baturage batwo batari bake.

Mu Karere ka Huye hatangijwe ibikorwa byo kubaka imihanda ya kilometero 4,9 mu mirenge ya Mbazi na Tumba.

Mu Murenge wa Mbazi hazubakwa umuhanda wa kilometero enye uturuka mu Rwabuye ukanyura ahitwa kuri Ofise ukagera ku Biro by’Umurenge wa Mbazi.

Mu Murenge wa Tumba hazubakwa uwa metero 900 unyura ahitwa kuri antene ugakomereza ku Biro by’Umurenge wa Tumba ukagera kuri kaburimbo igana mu Rango.

Iyo mihanda izuzura itwaye amafaranga agera kuri miliyari enye na miliyoni 800 Frw. Ije isanga indi ya kilometero 12 iherutse kuzura hamwe na ruhurura z’ibilometero 6,6.

Mu Mujyi wa Ruhango naho hari kubakwa imihanda ya kilometero 12 izatwara ingengo y’imari ya miliyari 12 Frw.

Ikubiye mu mushinga wa kaburimbo ya kilometero zirindwi iri kubakwa rwagati mujyi; kuri ubu hamaze kuzura kilometero ebyiri; muri uyu mwaka hari gukorwa kilomero 1.5 naho igice gisigaye nacyo kizakomeza.

Hari undi muhanda wa kilometero zisaga eshanu uzafasha umujyi kwaguka. Uzaca ku Kagari ka Buhoro ukomereze ahirwa Kibimbo ugere mu mujyi.

Ku ruhande rw’Umujyi wa Muhanga hatangijwe igikorwa cyo kubaka imihanda ya kaburimbo na ruhurura ebyiri bifite uburebure bwa kilometero icyenda mu mirenge ya Shyogwe na Nyamabuye.

Iyo mihanda irimo umwe unyura munsi y’ishuri rya Sainte Marie Reine ukambuka i Gahogo muri Nyarucyamu ya mbere ukazahura n’undi uva mu mujyi werekeza i Kabgayi kuri Sitasiyo aho ibinyabiziga binywera amavuta.

Undi uzaba uzava ku muhanda mugari wa kaburimbo mu ruhande rw’ibumoso unyuze ku rusengero rwa ADEPR umanuka ahitwa kuri Sinyola.

Hazubakwa n’umuhanda uva aho bita ku musaraba unyure ku kibuga cy’indege, ugere mu Mudugudu wa Karama mu Murenge wa Shyogwe.

Iyo mihanda yose izatwara amafaranga agera kuri miliyari 5 Frw, ije isanga indi ya kilometero 13 iherutse kuzura mu Mujyi wa Muhanga.

Abaturage biteze impinduka

Bamwe mu baturage batuye mu turere iyo mihanda ya kaburimbo igiye kubakwamo bavuga ko bayitezeho impinduka nziza kandi agaciro ku butaka bwabo kaziyongera.

Nkurunziza Emmanuel wo mu Karere ka Huye ati “Iyi mihanda nirangira gutega bizajya byoroha kuko nta mikuku izongera kubamo, ariko n’ibibanza biraza kugira agaciro. Ndizera ko ikibanza giciriritse kizava kuri miliyoni ebyiri n’igice kikagera nko kuri enye.”

Tuyishimire Alexis wo mu Karere ka Muhanga na we avuga ko bizamufasha kongera amafaranga yinjiza mu kazi akora ko gutwara igare.

Ati " Nzarushaho kwinjiza kuko nakoreraga amafaranga ngakuraho n’ayo gukoresha igare, none ayo nzajya nyazigamira kuko ntazongera kurikoresha kenshi nka nka mbere kubera ko nzajya ngenda mu muhanda mwiza.”

Nyuma yo kubaka imihanda muri iyo mijyi hazakomeza ibikorwa byo kuyiteza imbere birimo kubaka ibimoteri by’imyanda n’imiyoboro y’amazi aho itaragezwa.

Mu Karere ka Huye hatangijwe ibikorwa byo kubaka imihanda ya kilometero 4.9 mu mirenge ya Mbazi na Tumba
Mu Mujyi wa Muhanga naho hatangijwe igikorwa cyo kubaka imihanda ya kaburimbo na ruhurura ebyiri bifite uburebure bwa kilometero icyenda
Mu Mujyi wa Ruhango rwagati hari kubakwa imihanda ya kilometero zirindwi
Kubaka iyo mihanda bitanga akazi ku baturage bakinjiza amafaranga

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .