00:00:00 IGIHE NETWORK KN KINYARWANDA EN ENGLISH FR FRANCAIS

Abikorera basabwe kubyaza umusaruro amahirwe y’ubukire ari mu buhinzi bugezweho

Yanditswe na Cyprien Niyomwungeri
Kuya 14 July 2023 saa 02:55
Yasuwe :

Ubuhinzi ni urwego rufatiye runini ubukungu bw’ibihugu byinshi ariko rugifite inzitizi zo kuba abikorera bagiseta ibirenge mu gushoramo imari n’ababukora bagakomeza gufatwa nk’abasuzuguritse cyangwa ababuze akandi kazi bakora.

Iyo witegereje umusaruro mbumbe (GDP) w’u Rwanda, ubona uruhare rukomeye rw’ubuhinzi. Mu 2022, uru rwego rwagize uruhare rwa 25% ku musaruro mbumbe wose, mu gihe mu gihembwe cya mbere cy’uyu mwaka ubuhinzi bwari bwihariye 27%.

Uru ruhare rushobora kuzamuka hongerewe ingengo y’imari ishyirwa mu buhinzi, abikorera bagakangukira kubushoramo imari n’abahinzi bagahindura imyumvire yo kubikora kinyamwuga.

Mu gihe u Rwanda rwizihiza umunsi w’abahinzi n’aborozi kuri uyu wa 14 Nyakanga 2023, Umuyobozi Nshingwabikorwa w’Umuryango Nyarwanda w’Iterambere (RDO), Rwibasira Eugène, yasabye abikorera kugira uruhare mu iterambere ry’ubuhinzi.

Ati “Turi gushishikariza abikorera ngo nabo baze mu bikorwa by’ubuhinzi kuko bifite amafaranga kandi ababikeneye ni benshi”.

Akomeza avuga ko abikorera mu buhinzi bafite urufunguzo rwo kuba ibiciro by’imbuto byagabanyuka kuko bashora amafaranga no mu kuzitubura.

Ati “Guhenda ni uko zikiri nkeya, abantu benshi nibaza mu butubuzi bw’imbuto nazo zizahenduka”.

Rwibasira yavuze ko umwuga wo guhinga ari umwuga ukomeye cyane ukwiye guhabwa agaciro, umuhinzi akubahwa nk’umuntu ufite akamaro muri sosiyete, ku buzima rusange n’ubukungu.

Abikorera bagaragaza ko gushora imari mu buhinzi bigoye kuko amabanki agiseta ibirenge mu gutanga inguzanyo zijya muri uru rwego.

Rwiyemezamirimo Sina Gérard yigeze kugaragaza ko gushora imari mu rwego rw’ubuhinzi bugifite imbogamizi nyinshi cyane ku buryo haramutse hashyizweho banki cyangwa ikigo cy’imari cyihariye cy’uru rwego byafasha abarubarizwamo gutera imbere no kongera umusaruro.

Yagize ati “Banki ziguriza abifite, iyo bagiye kwaka ingwate y’amazu cyangwa indi mitungo, biba bivuze ko ari abifite ari bo banki ziguriza. Ntabwo banki ndayibona neza mu buhinzi.”

Ati “Amafaranga baduha ni uko bayaguha usanzwe ufite indi mitungo, ukaka amafaranga n’ahandi ugashyiramo. Ariko mu by’ukuri [...] kugira ngo banki ishore mu buhinzi yumve neza ko yazamura umuhinzi akeza akayishyura ntabwo biragerwaho neza, biracyari imbogamizi.”

Umunyamabanga Uhoraho muri Minisiteri y’Ubuhinzi n’Ubworozi, Dr. Olivier Kamana avuga ko bitewe n’imiterere y’amabanki nibyo asaba, usanga ababishobora ari abahinzi bageze ku rwego rwo hejuru bafite hegitari nyinshi z’ubutaka, bakoresha uburyo bwo kuhira, bakoresha n’amafaranga menshi.

Ati “N’abahinzi bo ku rwego ruciciriritse turabamara impungenge ko igihe bagiye mu bwishingizi banki ishobora nabo kubagirira icyizere kuko ibona ko ibikorwa byabo byishingiwe banki nayo itazahomba”.

Dr Kamana yasabye abahinzi guhuza ubutaka, gukoresha imbuto z’indobanure n’ifumbire kugira ngo umusaruro wabo uzamuke.

Abahinzi barasabwa kwiha ijambo binyuze mu kongera umusaruro ku isoko kugira ngo babone amafaranga abantu bose babubahe.

Umuhinzi witwa Hakizimana Jean Claude wo mu Karere ka Nyabihu muri koperative yitwa Kotemi Rugera, yavuze ko indi mbogamizi bafite nk’abahinzi ari uko ibiciro by’imbuto byazamutse, basaba ko hagira igikorwa kugira ngo umuhinzi ajye agira icyo yinjiza.

Ati “Ikiguzi cyarazamutse kandi ni imbogamizi ku muturage kandi iyo bigeze igihe cyo kwera ugasanga ikiguzi cyamanutse amafaranga akaba make, wabara cya kiguzi umuhinzi yaguze imbuto, amafumbire n’ibyo yakoresheje ahinga anahingisha ugasanga birahenze”.

“Turifuza ko igiciro cy’amafumbire mvaruganda cyamanuka kikagaruka hasi cyane kugira ngo ibyo twahinze tujye tubijyana ku isoko bibe byagurwa noneho umuhinzi abone inyungu”.

Rwiyemezamirimo Sina Gérard avuga ko ari byiza ko abantu bakora ubuhinzi bakwiye kujya bagerageza gushaka ubumenyi binyuze mu kwiga cyangwa gushaka amahugurwa atandukanye abafasha kubikora kinyamwuga.

Ati “Ntabwo ari ukujya guhinga ari uko wabuze akazi, ahubwo ni ukumva ko iyo yagiye guhinga ari akazi nk’akandi gateza abantu imbere.”

Yakomeje agira ati “Iyo wize neza umushinga ubona igishoro, ashobora kuba ari inguzanyo ya banki n’ubwo amabanki atarabasha kumenya gushora mu buhinzi […] nawe ushobora kwitera inkunga, ugashaka ubwo bushobozi bwo gushora mu buhinzi bwawe.”

Mu Nama y’Igihugu y’Umushyikirano ya 18 , Minisitiri w’Ubuhinzi n’Ubworozi, Dr Musafiri Ildephonse [icyo gihe yari akiri Umunyamabanga wa Leta muri iyi minisiteri] yavuze ko kugira ngo u Rwanda rwihaze mu biribwa, hakenewe gushyirwa imbaraga muri gahunda zigamije kongera umusaruro.

Zirimo kongera ubuso bwuhirwa, kongera gahunda zigamije gufasha umuhinzi kubona inyongeramusaruro mu buryo bworoshye kandi buhendutse, gufata neza umusaruro w’ubuhinzi n’ubworozi, kwegera abahinzi n’aborozi, kuborohereza kubona inguzanyo n’ubwishingizi.

Umuyobozi Nshingwabikorwa wa RDO, Rwibasira Eugène, yasabye abikorera kugira uruhare mu iterambere ry’ubuhinzi

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .