Abanyeshuri 480 bamaze kwiyandikisha mu gupiganira amafaranga ku isoko ry’imari n’imigabane

Yanditswe na Evariste Nsengimana
Kuya 2 Werurwe 2019 saa 09:28
Yasuwe :
0 0

Ikigo Kigenzura Isoko ry’Imari n’Imigabane mu Rwanda (CMA) cyatangije amarushanwa ku banyeshuri biga mu mashuri makuru na kaminuza mu Rwanda, rizakorwa hasuzumwa ubumenyi bafite ku Isoko ry’Imari n’Imigabane, rikabafasha gutsindira amafaranga, igihembo nyamukuru ni miliyoni n’ibihumbi 500.

Iri rushanwa rigiye kuba ku nshuro ya gatandatu, rizakorwa ku bufatanye bwa CMA, Isoko ry’Imari n’Imigabane (RSE), Kigo gishinzwe guteza Imbere Umwuga w’Ibaruramari mu Rwanda (iCPAR) n’Umuryango mpuzamahanga w’abanyeshuri mu by’ubukungu n’ubumenyi bucuruzi (AISSEC).

Ubwo yarifunguriraga ku mugarararo muri Kaminuza ya Mount Kenya kuri uyu wa gatanu, Umuyobozi mukuru w’agateganyo wa CMA, Bundugu Eric yavuze ko abanyeshuri basaga 480 bo muri Kaminuza n’amashuri makuru mu Rwanda aribo bamaze kwiyandikisha.

Kwiyandikisha bizarangira ku wa 3 Werurwe, hatangire icyiciro cyo kujonjora ku rwego rw’Intara. Iy’amajyepfo n’Amajyaruguru bizakorwa ku wa 13, iy’Iburasirazuba n’Uburengerazuba ku wa 15, Umujyi wa Kigali ku wa 22 naho ibihembo nyirizina bitangwe ku wa 29 uko kwezi.

Iri rushanwa rizwi nka Capital Market University Challenge 2019, rizahesha abanyeshuri batatu ba mbere gutsindira amafaranga y’u Rwanda kuva ku bihumbi 200 kugera kuri Miliyoni n’igice bitewe n’icyiciro batsinze.

Icyiciro kimwe kizatoranywamo batatu ba mbere batsinze mu buryo bw’isuzumabumenyi ry’ibisubizo bigufi (Quiz), uwa mbere ahembwe Miliyoni 1,5Frw, uwa Kabiri miliyoni 1,2Frw naho uwa gatatu ibihumbi 800Frw.

Mu kindi cyiciro kizakorwa mu buryo bw’inyandiko irambuye (Essay), uwa mbere azahembwa ibihumbi 500Frw, uwa Kabili 300Frw naho uwa gatatu ahembwe 200Frw.

Bundugu, yabwiye abanyeshuri ko rigamije kubashishikariza kwizigama kare kuko bidasaba amafaranga menshi.

Ati “Gahunda ni ukubashishikariza no kubigisha uko bashobora kwizigamira cyangwa gushora imari izigamye ku isoko ry’imari n’imigabane.”

Yavuze ko abanyeshuri ejo n’ejobundi bazaba ari abakozi cyangwa ba rwiyemezamirimo binjiza amafaranga runaka, bityo bakwiye kugira umuco wo kwizigama kare.

Ati “Icyo tubabwira ni uko nta mafaranga menshi yo kwizigamira abaho. Tuba dushaka ko batangira kubimenya bakiri abanyeshuri kugira ngo wa mushahara nutangira kuza abe azi aho ashobora kwizigamira.”

Umwe mu itsinda ry’abanyeshuri batsindiye miliyoni n’ibihumbi 200 mu irushanwa rya 2018, Jabiro Jean Luck, yasabye bagenzi be kugerageza amahirwe ntibacike intege kuko nawe yayatsindiye apiganwe inshuro ebyiri.

Ati “Murabizi ikibazo dufite muri iyi minsi, urubyiruko dufite imishinga myinshi ariko tukagira ikibazo cyo kubona amafaranga yo kuyitangiza. Nyuma yo kuyatsindira, byaduhaye amahirwe yo kuyashora mu mushinga twari dufite tuyitangaho (imigabane) ingwate muri banki.”

Ndayambaje Theodette wiga muri Kaminuza ya UTB, yavuze ko yamaze kwiyandikisha kugira ngo abone ayo mahirwe ariko ashaka no kugerageza amahirwe yo kwizigama ku isoko ry’imari n’imigabane.

Biteganyijwe ko abanyeshuri 700 bo muri Kaminuza n’amashuri makuru yo mu Rwanda aribo baziyandikisha muri iri rushanwa.

Ubwo hatangizwaga irushanwa rizwi nka Capital Market University Challenge 2019

Amafoto: Muhizi Serge


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza