00:00:00 IGIHE NETWORK KN KINYARWANDA EN ENGLISH FR FRANCAIS

2020/2021: Imisoro irenga miliyari 449 Frw yaramenyekanishijwe ntiyishyurwa

Yanditswe na Kanamugire Emmanuel
Kuya 27 May 2022 saa 07:28
Yasuwe :

Mu bifasha leta gushyira mu bikorwa ingengo y’imari harimo amafaranga ava mu misoro kandi aya aba agize igice kinini hakiyongeraho impano cyangwa inguzanyo igihugu gihabwa.

Nko mu mbanzirizamushinga y’ingengo y’imari y’umwaka wa 2022/2023, amafaranga akomoka imbere mu gihugu [arimo imisoro] azagera kuri miliyari 2654,9 Frw z’amafaranga y’u Rwanda bingana na 57% by’ingengo y’imari iteganyijwe ya miliyari 4658,4 Frw.

Raporo y’Umugenzuzi Mukuru w’Imari ya Leta y’umwaka wa 2020/2021 igaragaza ko imisoro yakusanyijwe igera kuri miliyari 1640 Frw ugereranyije na miliyari 1488 Frw mu mwaka wari wabanje.

Nubwo bimeze bityo agera kuri miliyari 449 z’amafaranga y’u Rwanda yaramenyekanishijwe ariko ntiyishyurwa nk’uko bigaragara muri iyi raporo. Iyi misoro ingana na 18% by’imisoro yose yakusanyijwe uwo mwaka.

Umugenzuzi w’Imari ya Leta yagaragaje ko icyizere cy’uko ibyo birarane by’imisoro bizishyurwa kiri kure kandi ko bituma leta itabona amafaranga yo gushora mu bikorwa bifitiye igihugu akamaro kandi ku gihe.

Ibi bituma lera ishakisha aho yakura amafaranga mu buryo bw’inguzanyo zishobora no guhenda mu gihe yakagombye kuba ikoresha ayavuye mu misoro. Iyi raporo ikomeza ivuga ko icyuho cyangwa ubukererwe mu gukusanya imisoro bigira ingaruka mu ishyirwa mu bikorwa ry’imishinga mu bigo bya leta.

Ntitwashoboye kuvugana n’abo bireba mu Kigo cy’Imisoro n’Amahoro ku bijyanye n’icyatumye abasoreshwa bamenyekanisha imisoro ariko bakananirwa kwishyura ari benshi. Ntitwashoboye kandi kumenya niba hari intambwe yatewe mu bijyanye n’imyishyurire y’ibi birarane nyuma y’aho iyi raporo ikorewe.

Iyo imisoro itishyuwe ku gihe biba bishobora kugorana buryo byagorana kwishyurwa cyangwa bikagera aho bidashoboka na gato kubyishyura.

Inguzanyo leta yafashe hanze hagamijwe gushaka amafaranga yo gutera inkunga imishinga yo mu rwego rw’ingufu kugeza ku wa 30 Kamena 2021 zari zimaze kugera kuri miliyari zisaga 417 z’amafaranga y’u Rwanda ariko ubushobozi bwo kwishyura mu bigo byayahawe birimo REG, NCD, UCL na RPC biracyarimo ingorabahizi.

Ikibazo cy’ibigo bya leta bitagira Inama z’Ubutegetsi zuzuye cyagarutsweho

Inama y’ubutegetsi ni urwego rukomeye rufata ibyemezo kuri politiki y’ibigo kandi rugomba kubanza kugishwa inama n’ubuyobozi bwabyo mbere y’uko hafatwa imyanzuro runaka nk’uko bigenwa mu ngingo ya 6, 9 na 10 z’itegeko ngenga No.001/2016 of 20/04/2016 rigenga imiyoborere y’ibigo bya leta.

Nk’uko byagaragajwe muri raporo z’umugenzuzi w’imari zo mu myaka yabanje, iki kibazo kiracyagaruka nk’uko raporo yakozwe muri Mata 2022 yabigaragaje. Nyamara biba byarahawe amafaranga menshi agenewe gushyira mu bikorwa imishinga minini.

Ibigo icyenda bifite iki kibazo birimo WASAC, Horizon Group, Muhabura Multi Choice Limited, Rwanda Cooperation Initiative, Rwanda Medical Supply, Aviation Travel and Logistics, Military Medical Insurance Scheme (MMI) na National Post Office, Rwanda National Investment Trust Ltd (RNIT).

Muri ibi bigo harimo ibimaze imyaka irenga ibiri bidafite inama z’ubutegetsi zuzuye. Birimo WASAC, Horizon Group, Muhabura Multi Choice na National Post Office.

Andi mafaranga yinjijwe mu isanduku ya leta

Uretse imisoro, igihugu gifite uburyo kibasha kubona amafaranga yo gushyira mu bikorwa imishinga inyuranye harimo ubw’inguzanyo, impano cyangw aubucuruzi bw’ibintu na serivisi.

Amafaranga agera kuri miliyari 37 Frw yinjijwe binyuze mu mande n’ibihano byagiye bicibwa abantu mu 2020/2021 mu gihe mu mwaka wawubanjirije hari hinjijwe miliyari 31,9 Frw mu 2020.

Inkunga u Rwanda rwabonye ingana na miliyari 529,9 Frw naho mu mwka wabanje rwari rwabonye miliyari 354,4 z’amafaranga y’u Rwanda.

Ibicuruzwa na serivisi u Rwanda rwacuruje zinjije miliyari 190,9 Frw ugereranyije na miliyari 201,3 Frw mu 2020.

Inguzanyo zo hanze zari miliyari 699,3 z’amafaranga y’u Rwanda; bigaragara ko zagabanutse kuko mu mwaka wari wabanje zari miliyari 883,2 z’amafaranga y’u Rwanda.

Icyicaro cy'Ikigo cy'Igihugu cy'Imisoro n'Amahoro

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .