00:00:00 IGIHE NETWORK KN KINYARWANDA EN ENGLISH FR FRANCAIS

Spur-winged goose, kimwe mu bishuhe binini ku Isi kiboneka mu Rwanda

Yanditswe na Nzabonimpa Jean Baptiste
Kuya 18 Kamena 2021 saa 07:27
Yasuwe :
0 0

Muri iki gihe Isi ikataje mu iterambere ry’ibintu hafi ya byose nyamara rimwe na rimwe rishobora gutuma hari bimwe bizasigara ari amateka mu bitabo. Muri iki gihe kwibuza amahirwe yo kurebesha amaso kimwe mu bishushe binini ku rwego rw’Isi bikiboneka mu Rwanda ni ukunyagwa zigahera.

Ibyo ni nk’ibya wa mugani ngo “Kwambara ikirezi ntumenyeko cyera”. Amoko y’ibisiga n’inyoni byuzuye hirya no hino mu gihugu burya bikurura abantu bagaturuka imihanda yose y’Isi baje kubireba mu gihe benebyo bashobora kuba batabizi.

Imiterere ya Spur-winged goose

Iki gishuhe kiboneka muri Afurika mu gice cyo munsi y’ubutayu bwa Africa. Spur-winged goose igice kinini cy’umubiri wayo hasa n’umukara n’akabara k’icyatsi kibisi gashashagirana gusa mu maso ni umweru kandi no ku mababa hagaragaraho ibara ry’umweru.

Ahandi hagaragara ibara ry’umweru ni ku gice cyo ku nda. Ikigore kiba gitandukanye n’ikigabo bitari mu ngano gusa ahubwo no mu kugira ibara ry’umutuku n’agashyundu aho umunwa utereye. Umunwa w’iki gishuhe n’amaguru bijya gusa n’umutuku.

Spur-winged goose y’ikigabo ishobora kugira uburemere bw’ibilo 10 nubwo hamwe na hamwe zishobora kugira ibiro bitanu, mu gihe iki gishuhe kiguruka ku muvuduko mwinshi gishobobora kugenda kilometero 142 ku isaha (142km/h).

Spur-winged goose iba ahantu hameze hate?

Ibi bishuhe bishobora kuboneka ahantu h’umukenke hari n’ibiyaga, ku migezi, mu bishanga, ahantu haje amazi bitewe n’umwuzure. Mu gice cya Afurika y’Uburasirazuba ibi bishuhe bishobora kugaragara ahantu h’ubutumburuke bwa metero 3000.

Mu Rwanda turacyafite amahirwe yo kuba tukibasha kubona izi nyoni mu bice bimwe na bimwe. Muri Kigali ibi bishuhe bishobora kuboneka mu Gatsata by’umwihariko mu gitondo, i Masaka ku Nyange Industries ibi bishuhe ushobora kubibona bishaka ibyo kurya cyangwa biguruka.

Ku kiraro cy’Akagera ibi bishuhe bigaragara binyura mu kirere. Rwandex na ho ibi bishuhe biraboneka mu gihe wahageze mu masaha yabyo yo gushaka ibyo kurya (mu gitondo bitarenze saa tatu cyangwa ni mugoroba guhera saa cyenda).

Spur-winged goose itungwa n’iki?

Spur-winged goose mbere na mbere itungwa n’ibimera byo mu mazi, utubuto, ibihingwa harimo: ibijumba, umuceri, ibigori, amasaka, amashaza, ibirayi, uburo, gusa rimwe na rimwe ishobora kurya amafi mato, ibinyamujonjorerwa n’udusimba duto. Spur-winged goose ifatwa nk’igishuhe kigira uburozi bitewe no kurya agasimba gato kitwa blister beetles.

Imishwi y'ibi bishuhe ni uku iba imeze...

Imyororokere ya Spur-winged goose

Imyororokere ya Spur-winged goose igenda itandukana bitewe n’agace runaka. Ibi bishuhe iyo biherereye mu majyaruguru ya Afurika byororoka hagati y’ukwezi kwa Kanama kugera mu Ukuboza.

Ibi bishuhe iyo biherereye mu Burasirazuba bwa Afurika byororoka kuva muri Mutarama kugera muri Kamena. Iyo ibi bishuhe biba muri Afurika y’Amajyepfo byororoka kuva mu Ukwakira kugera muri Gicurasi.

Ikigore gitera amagi 7-14 ndetse iminsi yo kuyararira ni 30-31. Hari ubwo mu cyari kimwe habonekamo amagi 27 ariko aba yatewe n’ibishuhe byinshi by’ibigore bihuriye ku kigabo kimwe.

Mu gihe cyo kurarira, ikigore gishobora kuva mu magi mu gitondo na ni mugoroba kandi iyo kivuye mu magi gisiga kiyatwikiriye kugira ngo akomeze gushyuha.

Imishwi mito iyo ikimara guturagwa ihita iva mu cyari kandi ikitabwaho na nyina gusa. Imishwi imaze iminsi 85 iba imaze kumera amababa kandi iba iri hafi kumenya kuguruka neza kuko iyo imaze iminsi 100 iba izi kuguruka neza cyane.

Spur-winged goose ibayeho ite muri iki gihe?

Spur-winged goose ni inyoni yo mu bishanga byo muri Afurika. Ibyo birumvikana ko ikibazo nyamukuru ibi bishuhe birimo guhura nacyo ni ukubura aho kuba bitewe no kwangizwa kw’ibishanga kubera impamvu zitandukanye.

Ikindi kibazo ibi bishuhe bihura nacyo ni uko muri Nigeria babihiga mu buryo bunyuranyije n’amategeko ndetse bakabicuruza kugira ngo bakoremo imiti gakondo.

Spur-winged goose ni imwe mu nyoni zirengerwa n’amasezerano yita ku nyoni ziba mu mazi zambukiranya imipaka ya Afurika na Aziya yitwa Agreement on the Conservation of African-Eurasian Migratory Waterbirds (AEWA).


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .