U Rwanda ku rutonde rw’ibihugu bitangaje bizakorerwamo ingendo z’ubukerarugendo za Four Seasons

Yanditswe na Niyitanga Jean Paul
Kuya 22 Ugushyingo 2020 saa 09:58
Yasuwe :
0 0

U Rwanda rwashyizwe ku rutonde rw’ibihugu bitangaje kandi biteye amatsiko byatoranyijwe mu isi yose bizakorerwamo ingendo z’ubukerarugendo zitegurwa na sosiyete mpuzamahanga ikora iby’amahoteli n’ubukerarugendo izwi nka Four Seasons Hotels Limited.

Izi ngendo zizwi nka Four Seasons Private Jet Experience zitabirwa n’abakerraugendo batandukanye bashaka kureba ibyiza bitatse isi. Bitewe na gahunda iba yateguwe, indege ihagurukana abantu ikabajyana mu gihugu kimwe, bahava bagakomereza mu kindi gutyo gutyo.

Four Seasons Hotels yatangaje ko muri izi ngendo zizaba umwaka utaha, izaba ikoresha indege yayo yihariye (Private Jet) kuko ngo yasanze abakora izi ngendo z’ubukerarugendo badakunda kugenda mu ndege rusange cyane cyane muri ibi bihe bya Covid-19, bityo ngo izakoresha indege yayo nshya yo mu bwoko bwa Airbus ikaba ifite imyanya 48. Izatangira ingendo mu mpera za 2021.

U Rwanda ni kimwe mu bihugu iyi ndege izanyuzamo ingendo zayo z’ubukerarugendo bw’ibihugu bidasanzwe kandi bitera benshi amatsiko.

Umuyobozi ushinzwe ibikorwa muri Four Seasons Hotels Limited, Christian Clerc avuga ko biteze kubona abagenzi benshi muri 2022.

Ati: “Ingendo zacu zaraguzwe cyane, kandi zakunze kugurwa n’abantu bamwe, mu gihe rero abagenzi bareba ahazaza, turitegura kubona abakiriya benshi mu nzira tugiye gufungura muri 2022, abagenzi b’uyu munsi bahitamo kujyana n’abo bizeye ko bazarinda ubuzima bwabo n’umutekano wabo kandi bakanabaha serivise nziza.”

Iyi ndege izajya ikora ingendo ikurikije umwihariko w’ibihugu. U Rwanda ruri mu cyiciro cy’ibihugu bya Afurika izakoreramo ingendo bitewe nuko ari ibihugu bitera abantu amatsiko bakifuza kubimenya, ibyo bise mu cyongereza “Africa Wonders”.
Urugendo rwo muri Afurika ruzaba hagati y’amatariki ya 28 Ukuboza 2021 na 9 Mutarama 2022. Mu bindi bihugu iyi ndege izageramo biri muri icyo cyiciro harimo Afurika y’Epfo, Misiri, Tanzania, Ibirwa bya Maurice, Zambia na Tanzania.

Ingendo z’iyi ndege kandi zizongera kunyura mu Rwanda ku matariki yo hagati ya 28 Gicurasi kugeza 20 Kamena 2022, icyo gihe bizaba ari mu cyiciro cyo gusura ibihugu bidasanzwe kandi bishimishije kurusha ibindi ku isi, mu cyongereza byiswe “World of Adventures”.

Ibyo bihugu birimo u Rwanda, Miami, umujyi wa Kyoto uri ku kirwa cya Honshu mu Buyapani; Ikirwa cya Bali muri Indonesia; Ibirwa bya Seychelles; Marrakech muri Maroc; Bogota muri Colombia; n’Ikirwa cya Galapagos kiri mu Nyanja ya Pasifika.

Izi ngendo zigamije gufasha abantu kumenya ahantu hadasanzwe baba bafite amatsiko yo kugera.

Ni ingendo zizaba zigenzurwa na sosiyete yo mu Buhinde izobereye ibyo kugenzura ingendo z’indege yitwa TCS (Tata Consultancy Services Limited) serivise zayo zikazunganirana n’iza Four Seasons Hotels zo kwita ku buzima n’umutekano w’abagenzi.

Four Seasons Hotels itegura izi ngendo z’ubukerarugendo ifite amashami arenga 100 mu bihugu bitandukanye, ikaba ifite icyicaro i Toronto muri Canada.

U Rwanda ruri mu bihugu bizakorerwamo ingendo z'ubukerarugendo zo mu bice bidasanzwe byo ku isi zitegurwa na Four Seasons

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .