Iyi hoteli yitwa Private Jet Villa, ikaba iherereye ku manga ya Nyang Nyang, ku butumburuke bwa metero 150 uvuye ku Nyanja y’Abahinde.

Yubatswe mu ndege yo mu bwoko bwa Boeing 737-200 yahoze itwara abagenzi, mbere yo guhagarikwa burundu.

Nubwo uyirebye ushobora gukeka ko ari inyubako yakozwe mu ishusho y’indege, mu by’ukuri ni indege nyayo yahinduwe hoteli, ariko igumana imiterere yayo yo hanze.

Ni imwe mu hoteli zifite umwihariko muri Bali, ikaba yarateguwe ku buryo abayirayemo bishimira ibyiza nyaburanga by’inyanja n’inkengero zayo, bari ahantu hitaruye urusaku rw’imijyi.

Igitekerezo cyo kuyubaka cyaturutse he?

Private Jet Villa yashinzwe n’umushoramari w’Umurusiya witwa Felix Demin, wari usanzwe afite ibikorwa by’ubukerarugendo ku kirwa cya Bali.

Indege yubatswemo iyi hoteli yahoze ikoreshwa na Mandala Airlines, sosiyete y’indege yo muri Indonesia yahagaritse ibikorwa mu 2014.

Nyuma yo guhagarikwa, iyi ndege yaguzwe n’umushoramari wari ufite umugambi wo kuyihinduramo akabyiniro, ariko uwo mushinga ntiwigeze ushyirwa mu bikorwa.

Mu 2021, Demin yaje kuyigura, atangira umushinga wo kuyihinduramo hoteli yihariye, ifite ibikoresho bigezweho ariko ikagumana ishusho yayo nk’indege.

Mu kiganiro yagiranye na CNN mu 2023, Demin yasobanuye ko yari yaratekereje ku buryo indege itagikoreshwa mu gutwara abagenzi yashoboraga guhindurwamo ikintu kidasanzwe gikurura ba mukerarugendo.

Gushyira mu bikorwa uwo mushinga ntibyari byoroshye, kuko byasabye kwimura indege yari imaze imyaka idakora, ikajyanwa ku manga ya Nyang Nyang, aho yagombaga gutunganyirizwa.

Byasabye kandi kuyihinduramo icumbi rifite ibyangombwa byose bya hoteli, ariko hatangijwe cyane imiterere yayo y’umwimerere.

Imirimo yo gutunganya iyi ndege ikavamo Private Jet Villa yarangiye mu Ukuboza 2023.

Hoteli ifite ibyumba bibiri n’amababa y’indege yahinduwe amabaraza

Private Jet Villa ifite ibyumba bibiri byo kuraramo, ikaba ishobora kwakira abantu bane.

Ifite kandi uruganiriro, aho gufatira amafunguro, ubwiherero bugezweho n’ahantu ho kuruhukira.

Kimwe mu bintu biyitandukanya n’izindi hoteli ni uko amababa y’indege yahinduwemo amabaraza, aho abashyitsi bashobora kwicara, kuruhukira no kwitegereza inyanja.

Iyi hoteli ifite kandi pisine, igikoni cyihariye n’ahantu hagenewe kugwa kajugujugu, ku buryo abayigana bashobora kuhagera bakoresheje ubu buryo bw’ubwikorezi.

Uretse kuba yarubatswe mu ndege, aho iherereye na ho ni kimwe mu bikurura abakerarugendo, kuko iri ku manga hejuru y’inyanja, ahantu hatanga uburyo bwihariye bwo kwitegereza ibyiza nyaburanga bya Bali.

Private Jet Villa iri mu macumbi y’ubukerarugendo ahenze, kuko igiciro cyo kuharara ijoro rimwe kiri hagati y’amadolari ya Amerika 2.149 na 3.149, bitewe n’igihe umuntu ayisuriye n’uburyo yakirwamo.