Singita Kwitonda Lodge yashyizwe ku mwanya wa gatatu muri hoteli nziza ku Isi

Yanditswe na Twarabanye Venuste
Kuya 10 Mutarama 2020 saa 10:19
Yasuwe :
0 0

Ikigo gikora Ubushakashatsi ku bijyanye n’Amahoteli ku Isi (Luxury Travel Intelligence: LTI) cyashyize Singita Kwitonda Lodge and Kataza House iherereye hafi y’Ibirunga ku mwanya wa gatatu muri hoteli nziza ku Isi ku rutonde rwa 2019.

Singita Kwitonda Lodge and Kataza House igizwe n’inyubako zigezweho zubatse mu Murenge wa Nyange mu Karere ka Musanze, ku birenge by’Ikirunga cya Sabyinyo, aho uba unitegeye ibirunga bya Gahinga na Muhabura. Yafunguwe ku mugaragararo na Perezida Paul Kagame muri Kanama 2019.

LTI yashyize ahagaragara urutonde rwa hoteli 15 nziza kurusha izindi mu 2019, Singita Kwitonda Lodge iza ku mwanya wa gatatu.

Hoteli ya mbere ni iyitwa The Nautilus yo muri Maldives, ifite umwihariko w’inzu 26 zihariye ku bakiliya (Private Homes) n’ibindi bintu bitandukanye igenera abakiliya, igakurikirwa na Grantly Hall yo mu Ntara ya Yorkshire yo mu Bwongereza.

Singita yo mu Rwanda iza ku mwanya wa gatatu, ni inyubako nshya iherereye hafi ya Pariki y’Igihugu y’Ibirunga, ahantu hakururiye LTI cyane mu myaka ishize.

Kuri urwo rutonde hoteli 12 za mbere zashyizwe ku rutonde hagendewe ku buryo zakira abakiliya n’agaciro ziha abazigana.

Singita Kwitonda Lodge and Kataza House yubatswe ahantu hahoze igishanga cyari urwuri, ariko ubu hashibutse umushinga ukomeye w’ubukerarugendo ugizwe n’inzu umunani zubatswe mu buryo zirengera ibidukikije.

Zirimo zirindwi zagenewe umuntu umwe cyangwa uherekejwe kuko buri imwe ifite uburiri bumwe, uruganiriro rwagutse n’ibindi byangombwa nkenerwa, hakaba indi imwe yiswe Kataza House yo igizwe n’ibyumba bine byo kuraramo. Yubatswe n’ibikoresho byinshi byakorewe mu Rwanda, ibyinshi ni ibiboneka i Musanze birimo amakoro n’imigano.

Singita Kwitonda Lodge yashoweho miliyoni $25. Yahawe izina rya Kwitonda, yitiriwe ingagi y’ingabo yari izwiho ubwitonzi, yapfuye mu 2012 ifite imyaka 40, icyo gihe yabonetse itagihumeka nyuma y’iminsi yari ishize itakigaragara mu muryango wayo.

Uyu mushinga wa Singita ni umwe mu izatuma u Rwanda rwesa umuhigo wo kwinjiza miliyoni $800 avuye mu bukerarugendo mu 2024, avuye kuri miliyoni $438 rwasaruye mu 2017.

Singita ni izina risobanura ’ahantu h’ibitangaza’ mu rurimi rwa Shangaan rwo muri Afurika y’Epfo, ari naho iki kigo gikomoka. Cyatangiye ishoramari mu bukerarugendo mu 1993, gisanganwe izindi hotel zo mu bwoko bwa Lodge muri Tanzania (muri Grumeti Game Reserve na Lamai), muri Zimbabwe (Singita Pamushana Lodge) no muri Afurika y’Epfo (Singita Sweni Lodge na Singita Sabi Sand.)

-  Urutonde rwa hoteli 15 za mbere ku Isi mu 2019

1. The Nautilus (Maldives)

2. Grantley Hall (Yorkshire)

3. Singita Kwitonda Lodge (Rwanda)

4. InterContinental (Maldives)

5. Rosewood (Hong Kong)

6. The Lodge at Blue Sky (Utah)

7. Mandarin Oriental Jumeira (Dubai)

8. St Regis (Venice)

9. Belmond Cadogan (London)

10. Hotel Château du Grand-Lucé (Loire Valley)

11. The Newt (Somerset, UK)

12. Stock Exchange (Manchester, UK)

13. Waldorf Astoria (Maldives)

14. Aman (Kyoto)

15. The Oberoi (Marrakech)

-  Amwe mu mafoto yo gufungura ku mugaragaro Singita Kwitonda Lodge and Kataza House

Perezida Kagame afungura ku mugaragaro Singita Kwitonda Lodge and Kataza House
Singita Lodge yubatse neza munsi y'Ikirunga cya Sabyinyo
Inzu za Singita Kwitonda Lodge and Kataza House zubakishijwe amakoro aboneka i Musanze
Amatara nayo aba yateguwe mu biti
Singita Kwitonda Lodge ifite ahantu heza haba ibyo kunywa by'amoko yose
Hari ibyapa biyobora abagana mu byumba bya Singita Kwitonda Lodge and Kataza House
Iyo uri muri Singita uba witegeye ibirunga
Muri Guest Suites haba hateye mu buryo bwiyubashye
Umushyitsi aba afite ahantu ashobora kogera cyangwa akota izuba
Mu byumba haba intebe zigezweho n'ibindi byangombwa nkenerwa
Kurara kuri ubu buriri uri umwe ni $1750, muri babiri ni $3500
Uba uhagaze munsi y'Ikirunga cya Sabyinyo
Uri kuri Singita Kwitonda Lodge, uba ureba ibirunga bya Gahinga na Muhabura
Iyi nyubako iri ahahoze urwuri, ubu ni umushinga w'ubukerarugendo

Amafoto: Niyonzima Moses


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza