Nyamasheke: Bubakiwe ibyumba 11 by’amashuri nk’inyungu ku mafaranga ava mu bukerarugendo

Yanditswe na Sitio Ndoli
Kuya 21 Gashyantare 2020 saa 11:27
Yasuwe :
0 0

Abaturiye hafi ya Pariki ya Nyungwe mu karere ka Nyamasheke bavuga ko ibikorwa bakorerwa biva mu mafaranga y’Ubucyerarugendo bibatera imbaraga zo gukomeza kurwanya ba rushimusi.

Ibi babigarutseho ubwo batahaga ku mugaragaro ibyumba by’amashuri 11 byubatswe n’ikigo cy’igihugu cy’iterambere RDB.

Ibyumba bitatu byubatswe ku ishuri ribanza rya Mutagatifu Paul rya Rugabe mu Murenge wa Karambi n’ ibyumba umunani byubatswe ku ishuri ribanza rya Nyarusiza riherereye mu Murenge wa Mahembe mu karere ka Nyamasheke.

Aya mashuri yose ari munsi ya Pariki ya Nyungwe. Ababyeyi barerera muri ibi bigo by’amashuri bavuga ko ibikorwa bakorerwa bibagaragariza ko pariki ari iyabo bigatuma barushaho kuyirinda abashaka kuyangiza.

Mukeshimana Zacharie ati “Byatunejeje cyane, twahise tubona akamaro ka Nyungwe twumva tugomba kuyibungabunga kuko abana bacu bigiraraga mu mashuri mabi.”

Nyirambarushimana Cecile ati“Badukoreye ibintu byiza kuko batumye abana bacu bigira ahantu heza, urumva ko tugomba kurinda pariki yacu kugira ngo amafaranga avamo akomeze yiyongere, bizatuma dukomeza kubona ibikorwa byinshi.”

Bamwe mu banyeshuri biga muri ibi bigo by’amashuri bavuga ko bigiraga mu byumba bishaje ndetse bakicara ari benshi ku ntebe ariko kuri ubu bakaba biga neza, akaba ariyo mpamvu biyemeje gukomeza kurwanya ba rushimusi.

Mugabo Aime wiga mu mwaka wa Gatandatu w’amashuri abanza yagize ati “Turishimye cyane twabaga turi abana benshi bigatuma tudatsinda kubera hari aho twicaraga turi batanu, ubu twicara turi batatu kubera amashuri mashyashya. Tumaze kandi gusobanukirwa no kubungabunga ibinyabuzima biba muri parike ya Nyungwe kuburyo tubonye ushaka kubyangiza twamushyikiriza abayobozi.”

Ngoga Thelesphore, ushinzwe imicungire ya pariki z’igihugu mu kigo cy’igihugu Iterambere RDB avuga ko bashora mu mishinga y’uburezi mu rwego rwo kugira ngo abaturiye za pariki barusheho gusobanurirwa kuyibungabunga ariko kandi ngo hari n’indi mishinga itandukanye batera inkunga.

Ati “Ntabwo ari imishinga y’Uburezi gusa ariko n’ibindi bikorwa bishobora kuzamura abaturage kugira ngo banabone ko parike baturiye bagomba kugira uruhare mu kuyibungabunga. Abaturage nibiga bakamenya nibwo tuzabasha kubasobanurira akamaro ka parike bakakumva. Umwana aziga narangiza ajye gushaka akazi aho kujya gushimuta muri pariki. ”

Ibi byumba by’amashuri 11 byatwaye miliyoni zisaga 64, ni mu gihe amafaranga yagenewe gukora imishinga mu mirenge 7 ikora kuri Nyungwe muri Nyamasheke ari miliyoni 423.

Abanyeshuri banyuzwe, biyemeza kurushaho kwiga neza kubera amashuri meza babonye yo kwigiramo
Abanyeshuri bubakiwe ibyumba 11 mu rwego rwo gusaranganya amafaranga ava mu musaruro w'ubukerarugendo muri pariki z'Igihugu
Abayobozi batandukanye bitabiriye umuhango wo gutaha ibyumba by'amashuri
Imbere mu ishuri rigezweho rizafasha abanyeshuri kwiga atari benshi
Ngoga Thelesphore, ushinzwe imicungire ya pariki z’igihugu mu kigo cy’igihugu Iterambere RDB
Umuyobozi w'akarere ka Nyamasheke wungirije ushinzwe Ubukungu yasabye abanyeshuri gufata amashuri neza

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Special pages
. . . . . .