00:00:00 IGIHE NETWORK KN KINYARWANDA EN ENGLISH FR FRANCAIS

Imiterere y’Ikigo cya Ellen DeGeneres kigiye gufungurwa i Musanze

Yanditswe na Ndahayo Emmanuel
Kuya 7 June 2022 saa 11:31
Yasuwe :

Ellen DeGeneres ari mu ruzinduko mu Rwanda n’umufasha we, Portia de Rossi, aho baje gufungura ku mugaragaro Ikigo gikora ubushakashatsi ku ngagi, Ellen DeGeneres Campus cy’Umuryango Dian Fossey Gorilla Fund wita ku ngagi zo mu Birunga.

Iki kigo cyubatswe n’abakozi barenga 2400, gitwara miliyoni 15 z’amadolari ya Amerika.

Ni ikigo kigezweho, kigizwe n’inyubako eshatu z’ingenzi zirimo The Sandy and Harold Price Research Center kizajya gikorerwamo ubushakashatsi ku ngagi bwibanda ku turemangingo twazo, imiterere yazo, imibanire yazo n’ibindi.

Hari kandi inyubako ya Cindy Broder Conservation Gallery izajya yakira abashyitsi bifuza kumenya byinshi ku ngagi, igizwe n’amafoto ndetse n’ibindi bisobanura imibereho y’ingagi.

Indi nyubako ni Bob and Melani Walton Education Center izagira uruhare mu gukorana na kaminuza zo mu Rwanda no hanze yarwo. Izajya yifashishwa kandi mu kwakira inama inakorerwemo amahugurwa.

Izaba irimo ishuri, isomero ry’ibijyanye na siyansi ndetse na ’Computer Lab’ yubatswe bigizwemo uruhare n’impirimbanyi mu kurengera ibidukikije, akaba n’umukinnyi wa filime, Leonardo DiCaprio.

Kuva iki kigo cyafungura imiryango muri Gashyantare uyu mwaka, kimaze kwakira abashyitsi barenga 5000, barimo abanyeshuri bo mu mashuri abanza n’ayisumbuye bagera ku 2000.

Mu kiganiro n’abanyamakuru, Ellen DeGeneres yavuze ko urugendo rwo gukunda ingagi rwatangiye ubwo yari afite imyaka 12, nyuma yo kubona ifoto ya Dian Fossey muri National Geographic Magazine.

Iyo foto yafatiwe mu Rwanda, aho Dian Fossey yari yaratangiye kwita ku ngagi zo mu Birunga kuva mu 1967. Ellen yavuze ko kuva uwo munsi “yumvise yagira amahirwe yo guterura umwana w’ingagi”.

Ati “Uko nakomeje gukura, ni ibintu nahoze nifuza gukora. Ubwo nazaga mu Rwanda, nifuzaga kureba akazi kakozwe na Fossey mu kurengera ingagi."

Umuyobozi Mukuru wa Dian Fossey Gorilla Fund, Dr. Tara Stoinsk, agaruka ku kamaro k’ikigo gishya bazajya bakoreramo, yagize ati "Mbere twakoreraga kure y’ingagi, mu birometero birenga 25...intego yacu ni ’ukurokora ingagi no gufasha abaturage, niyo mpamvu dukorana n’abaturiye Pariki."

Yavuze ko kuva iki kigo cyafungura kimaze kwakira Abanyarwanda barenga 5000 bifuza kumenya byinshi ku buzima bw’ingagi.

Ati "Iki Kigo ntigisanzwe, kuva cyafungura tumaze kwakira Abanyarwanda barenga 5000, aho twakoreraga mbere, ntabwo Abanyarwanda bazaga ari benshi... kugira abaturage benshi badusura hano ni ibintu bidushimisha."

Iki kigo cya Ellen DeGeneres cyubatse mu Kinigi mu Karere ka Musanze]
Iki kigo cya Ellen DeGeneres cyubatse mu buryo bubungabunga ibidukikije
Ellen DeGeneres Campus izajya itanga ubumenyi ku buzima bw'ingagi
Muri uru ruzinduko Ellen ari kumwe n’umufasha we, Portia de Rossi
Ellen DeGeneres yamaze kugera mu Rwanda aho yitabiriye umuhango wo gutaha iki kigo cy'ubushakashatsi ku ngagi
Ellen DeGeneres yeretswe ibice bitandukanye bigize iki kigo
Ellen DeGeneres n'umufasha we batemberejwe ibice bitandukanye bigize iki kigo

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .