Yagasuye ku wa Kane, tariki ya 10 Gashyantare 2022, aho yeretswe ibyanya nyaburanga birimo Pariki y’Igihugu ya Nyungwe, ubuhinzi bw’icyayi ku Kitabi n’ibindi.

Nyuma yo kuhasura yavuze ko biteguye gufatanya n’ubuyobozi bw’Akarere ka Nyamagabe mu kuzamura iterambere n’imibereho myiza y’abaturage bishingiye ku kwimakaza umuco wo kugira igenamigambi n’ingengo.

Ati “Natumiwe n’umuyobozi w’Akarere kuza kubasura kandi ni ikintu cyiza kizarema imikoranire myiza hagati yacu na bo bigendeye ku biganiro twagiranye. Muri rusange ubukerarugendo ni ikintu kinini kigomba gushyirwamo ishoramari kugira ngo kibyazwe umusaruro kandi twizeye ko hamwe no gukora igenamigambi n’ingengo y’imari bizagerwaho.”

Umuyobozi w’Akarere ka Nyamagabe, Niyomwungeri Hildebrand, yavuze ko kuba bafitanye umubano n’imigenderanire hagati ya bo na Ambasade ya Israel, bizabafasha kugera kuri byinshi.

Ati “Mu karere kacu dufite intego zo guhindura ubuzima no kuzamura abaturage bacu, urwo rugendo rero rusaba ko tugira abafatanyabikorwa, twiyemeje kuzahamagara abafatanyabikorwa batandukanye. Ambasaderi wa Israel ni umwe muri abo bafatanyabikorwa twahamagaye kandi na we abaye mu ba mbere batugannye.”

Yakomeje avuga ko baganiriye byinshi kandi bemeranyije ko hagiye gukurikiraho kubishyira mu bikorwa.

Bamwe mu baturage bo mu Karere ka Nyamagabe bavuze ko bashimira Leta y’u Rwanda ikomeza kubegereza abafatanyabikorwa mu iterambere n’imibereho myiza.

Mugabo Erneste ati “Nyamagabe yo hambere ari yo yitwaga Gikongoro hahoraga inzara ariko ubu ntikibaho kubera ubuyobozi bwiza butuzanira abafatanyabikorwa bakadufasha kuyirwanya.”

Ambasaderi Dr Ron Adam yasuye n’ibindi bice birimo Ecole des Sciences de Nyamagabe aho yifatanyije n’abanyeshuri gutera ibiti by’imbuto ziribwa ndetse asura n’Urwibutso rwa Jenoside rwa Murambi.

[email protected]