Abasura Pariki z’Igihugu bagiye kujya babanza gupimwa COVID-19

Yanditswe na Twarabanye Venuste
Kuya 2 Nyakanga 2020 saa 11:39
Yasuwe :
0 0

Ikigo cy’Igihugu cy’Iterambere (RDB) cyatangaje ko abashaka gusura Pariki z’Igihugu bagiye kujya babanza gusuzumwa COVID-19, ikiguzi cyo gupimwa kikazajya cyishyurwa ku mafaranga atangwa n’uwasabye gusura mbere y’igihe.

Inama y’Abaminisitiri yateranye ku wa 16 Kamena 2020 niyo yemeje isubukurwa ry’ibikorwa by’ubukerarugendo harimo ko ubukerarugendo bwo mu gihugu na mpuzamahanga ku bashyitsi binjiye mu Rwanda mu ndege zihariye (charter flights) baba abantu ku giti cyabo cyangwa abari mu matsinda bwemewe.

Icyemezo cyo gukomorera ubukerarugendo cyakurikiwe n’amabwiriza agomba kubahirizwa mu gihe cyo gusura ibyiza nyaburanga biri mu gihugu.

RDB yatangaje ko mu rwego rwo kwita ku mutekano w’abasura Pariki n’ibinyabuzima bizirimo, abakerarugendo b’imbere mu gihugu basabwa kwisuzumisha COVID-19 mbere y’amasaha 48 y’uko bajya gusura ahantu nyaburanga harimo na Pariki y’Igihugu y’Akagera.

Itangazo ryashyizweho umukono n’Umuyobozi Mukuru wa RDB, Clare Akamanzi, rivuga ko usaba gusuzumwa ashobora kubisaba akoresheje email [[email protected]] cyangwa akifashisha telefoni [0788313800].

Ikiguzi cyo kwipimisha kizajya cyishyurwa mu cyo gusaba gusura mbere y’igihe (booking fee). Abazajya bagaragaho ko banduye ntabwo bazajya bemererwa kujya muri za pariki.

RDB yasabye Abanyarwanda kubyaza amahirwe poromosiyo yashyizweho yo gusura ahantu hatandukanye mu gihugu.

Abantu 69 bamaze gusaba gusura Pariki y’Igihugu y’Ibirunga naho abamaze gusaba gusura Pariki y’Akagera ni 215, muri 280 basabye gusura ibice nyaburanga bitandukanye. Barimo Abanyarwanda n’abandi baturage bo mu bihugu byo mu Muryango wa Afurika y’Iburasirazuba baba mu Rwanda.

Mu gitondo cyo ku wa 23 Kamena 2020 nibwo uwa mbere yerekeje muri Pariki y’Igihugu y’Ibirunga ajya gusura ingagi. Mai Makizono, Umunyamabanga wa Kabiri muri Ambasade y’u Buyapani mu Rwanda ni we wafunguriye abandi.

Ubusanzwe ba mukerarugendo bavuye hanze nk’abemererwa gusura ingagi mu Birunga ni abisuzumishije bagasangwa nta Coronavirus bafite. Iyo bageze mu Kinigi abanza gukaraba intoki n’amazi meza n’isabune cyangwa bakifashisha umuti wica udukoko ‘hand sanitizer’. Bapimwa umuriro ndetse bagategekwa kwambara agapfukamunwa nk’ibwiriza ry’ibanze mbere yo kujya kureba ingagi.

U Rwanda ruherutse kugabanya ibiciro byo gusura ingagi, aho byagabanyijwe ku kigero cya 86% bigera ku $ 200 ku Banyarwanda na 67% ku banyamahanga batuye mu Rwanda biba $500, ku bandi hagumaho $1500 yasabwaga buri wese ukeneye kureba ingagi.

Ubusanzwe umuntu wese washakaga gusura ingagi yishyuraga amadolari ya Amerika 1500. Ni ibiciro byashyizweho mu 2018 bivuye ku madolari 750.

Ubukerarugendo ni rumwe mu nzego zifatiye runini u Rwanda kuko mu 2019 mu musaruro mbumbe wose w’igihugu, bwari bufitemo 10% mu gihe na mbere yaho umusaruro w’ibyo igihugu cyinjiza biturutse mu bukerarugendo wagiye wiyongera ku kigero cya 11% na 9% kuva mu 2008 kugera mu 2019.

Abakerarugendo b'imbere mu gihugu bagiye kujya babanza gupimwa COVID-19 mbere yo gusura Pariki z’Igihugu

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Special pages
. . . . . .