00:00:00 IGIHE NETWORK KN KINYARWANDA EN ENGLISH FR FRANCAIS

Paul Kagame na Felix Tshisekedi bapfuye iki? Ni gute twazahura umubano?

Yanditswe na Gatete Nyiringabo Ruhumuliza
Kuya 9 June 2023 saa 08:04
Yasuwe :

Ubwanditsi: Ibikubiye muri iyi nyandiko, ni ibitekerezo bwite by’umwanditsi Gatete Nyiringabo Ruhumuliza. Ni Umunyamategeko ndetse akaba n’Umusesenguzi mu byerekeye politiki yo mu Karere k’Ibiyaga bigari.

Mu minsi ishize, umwizerwa wa Félix Tshisekedi, Fortunat Biselele alias “Bifort”, yagaragaye mu kiganiro cy’umwe mu bavugira Tshisekedi, Umunya-Cameroon, Alain Foka (nzamugarukaho mu nyandiko itaha). Mu cyumweru cyakurikiyeho Biselele yirukanwe nabi, afungwa ashinjwa ubugambanyi. Kugeza ubu nandika, Bifort aracyari muri gereza.

Muri ayo mashusho, Biselele aba asobanura ashize amanga ko igihe Félix Tshisekedi yajyaga ku butegetsi, yasanze amasezerano yasinywe n’abamubanjirije ari mu nyungu z’abantu ku giti cyabo, agasubiza inyuma ubukungu bw’igihugu.

Yahise agana kuri mukuru we mu karere, Paul Kagame, amusaba ubufasha mu kumuhuza n’abashoramari mpuzamahanga.

Icyo gihe Kagame yaramubwiye ati "Byiza cyane, so yari umuntu mwiza!" Yamuhuje na bagenzi be bo ku mugabane wa Afurika, atorerwa kwinjira mu nyabutatu y’umuyobozi ucyuye igihe, uriho ndetse n’utahiwe yamuteguriye kuyobora Afurika yunze Ubumwe mu mwaka ukurikira, atumirwa kuvuga mu Ihuriro Mpuzamahanga ry’Abayahudi rizwi nka "AIPAC", mu gihe yari ataramenyekana neza, ariko Perezida Kagame aravuga ati "dukwiye kumugirira icyizere."

Fatshi yaje no gutumirwa mu ihuriro ry’abayobozi b’ibigo ryabereye i Kigali hamwe n’itsinda rye ryose rishinzwe guteza imbere ishoramari, riyobowe na Jean Claude Kabongo, uzwi nka JCK – umuntu wubashywe i Kinshasa (na we wirukanwe) wanakoze ikiganiro cyiza ku mahirwe aboneka muri RDC, imbere y’abashoramari baturutse hirya no hino ku Isi. Nari muri icyo cyumba cyabereyemo inama.

Ndibuka uburyo natengushywe cyane no kubona abashoramari mpuzamahanga bose bari bashishikajwe gusa n’amabuye y’agaciro, ubwo twahuraga n’itsinda rya Fatshi mu mugoroba wateguwe na "les Anciens du Zaire" kuri Hotel des Milles Collines, ndababwira nti:

"Mwitondere cyane aba bashoramari b’ibisambo bakeneye gusa amabuye y’agaciro nta kindi babazaniye. RDC ni isoko rya miliyoni 90 n’ubushobozi bw’abakozi bungana butyo; mwite kuri abo. Urwego rw’ubucukuzi ntabwo rutanga imirimo myinshi ndetse ntabwo mufite uburyo bwo gutunganya ayo mabuye imbere mu gihugu. Niba bashaka amabuye y’agaciro, bakwiye kubanza kubaka inganda ziyatunganya, bagatunganyiriza ibintu byose imbere mu gihugu." Ndibuka ko batari bashishikajwe n’ubusesenguzi bwanjye kuri iyo ngingo mu by’ubukungu.

Nyuma y’amezi make nagiye i Kinshasa inshuro ebyiri mu gushishikariza umushoramari wo muri Ukraine gushingayo uruganda rutunganya coltan, hamwe na bagenzi banjye dufata n’umwanya wo kugura uburenganzira bwo kugeza muri RDC ibintu bimwe na bimwe. Nanatangije ibikorwa i Kinshasa.

Abanyarwanda bakomeje gufasha Abanye-Congo by’umwihariko nko mu kunoza amasezerano ajyanye no guhererekanya ubumenyi, gutunganyiriza ibintu imbere mu gihugu, guteza imbere inganda, kugenzura ibiciro ku masoko, mu buryo butanga inyungu ku mpande zombi mu kureshya ishoramari ry’abanyamahanga.

Igitekerezo cyari ugushyiraho gahunda ihamye y’ishoramari rya leta muri RDC, gukuraho amasezerano atabyara inyungu yasinywe n’ababanjirije Fatshi; nta mpamvu yari ihari yo kugira ngo RDC isubiremo amakosa u Rwanda rwakoze mu hahise, ubwo hashyirwagaho Urwego rushizwe Iterambere, RDB. Muri iyi mishinga yose, umujyanama wa Tshisekedi, Fortunat Biselele yari ahari.

Muri icyo gihe Perezida wa Congo yari yaratangiye ibiganiro n’umutwe wa M23 ndetse baremeranyije kuri gahunda zigamije amahoro. Laurent Nkunda, Sultani Makenga na bagenzi babo mu nkambi mu Rwanda na Uganda bagombaga gusubira mu gihugu cyabo mu mahoro, naho FDLR ikamburwa intwaro igacyurwa mu Rwanda.

Abakuru b’ibihugu byombi, Kagame na Tshisekedi bari biyemeje kudakurikirana abagize imitwe yambuwe intwaro kuri buri ruhande, uretse abakoze ibyaha byibasiye inyokomuntu. Abagize FDLR bari bashyizwe ahantu hamwe mu nkambi muri RDC, bategereje indege ya Loni ngo ibagarure mu Rwanda; itegeko riha imbabazi M23 ryari ku meza mu Nteko Ishinga Amategeko, ritegereje kwemezwa.

Itsinda ry’abayobozi ba M23 ryari ryageze i Kinshasa ngo basoze amasezerano yo kwinjizwa mu ngabo za Leta no mu buzima bwa politiki, intambara ku nkombe z’Ikiyaga cya Kivu, ku bwacu yari yarangiye! Ibihe bishya byari bigiye gutangira, Kigali na Kinshasa bigiye gukorera hamwe bigahindura akarere.

Nibwo abantu bo hambere batangiye guhamagara Tshisekedi. Ntabwo nakwemeza niba Kabila yari abiri inyuma, wenda akaba atari ashimishijwe n’ibyari birimo kuba. Icyo nzi ni uko bamuhatiye gucana umubano wose na Paul Kagame! Félix Tshisekedi yahindutse mu kanya nk’ako guhumbya nk’aho abonye umuzimu, cyangwa nk’aho agatsiko k’abagizi ba nabi kagwatiriye bucura bwe.

Igisirikare cye cyasubukuye gukorana na FDLR, bagaba ibitero ku butaka bw’u Rwanda, batera ibisasu mu Rwanda, bica abasivili, bangiza imitungo. Ibindi, nk’uko babivuga ubu ni amateka... Reka nitse gato mbabwire inkuru y’ishingwa rya OPEC: Umuryango w’ibihugu bicukura peteroli, ariko by’umwihariko, itumbagira rya Arabie Saoudite, hamwe n’ibihugu byose byo mu kigobe; agace kahoze gakennye, kabeshejweho no gutwara ingamiya, ba mukerarugendo basura umurwa mutagatifu wa Maka no kugurisha amabengeza yo munsi y’inyanja kuri ba mukerarugendo.

1. Saudi Aramco: Mu 1933, Arabie Saoudite yahaye Standard Oil of California (SoCal), uburenganzira busesuye bwo gucukura peteroli mu Ntara y’Iburengerazuba. Ubwo bwami bwaburaga ibikorwa remezo by’ibanze, amafaranga n’ikoranabuhanga rigezweho. Muri icyo gihe, peteroli yagurishwaga munsi y’iby’ijana $50 (0,5$) ku kagunguru.

Ubwo peteroli yavumburwaga muri Werurwe 1938, mu bujyakuzimu bwa metero 1440 muri Dammam, amariba yose yari mu maboko y’Abanyamerika. Saudi Aramco yo yari ifite inshingano zo kuyimenyekanisha. Kugeza mu 1973, Arabie Saoudite yasabye ndetse ihabwa imigabane 25% muri ibyo bikorwa byose, iza gusanga yarabeshywe ku giciro cya peteroli n’inyungu ivamo.

Nyuma y’umwaka umwe, ubwo bwami bwongereye imigabane igera kuri 60%, mbere kugurira abashoramari b’abanyamerika imigabane yose kugeza mu 1980. Uyu munsi Aramco itanga 10% bya peteroli y’isi yose ndetse ku mwaka ikunguka miliyari $111, amafaranga arenze ay’ibindi bihugu bitanu bikomeye, bingana n’inshuro ebyiri z’umusaruro mbumbe wa RDC.

2. Ishingwa rya OPEC no kugenzura ibiciro bya peteroli: OPEC yashinzwe mu 1960 ku gitekerezo cy’umuyobozi w’ikirenga wa Iran, Mohammad Reza Pahlavi, na minisiteri zishizwe ibikomoka kuri peteroli na mine za Arabie Saudite na Venezuela. Ibindi bihugu byagiye byiyongeramo nyuma, uko byagendaga bivumbura peteroli. Muri icyo gihe akagunguru ka peteroli kaguraga munsi ya $5, kandi icyo giciro ntikigenzurwe n’abacukura peteroli.

Mu Ukwakira 1973, OPEC yafashe icyemezo cyo guhagarika gucukura peteroli, mu kwigaragambiriza inkunga uburengerazuba bw’isi bwahaye Israel mu ntambara ya Yom Kippur, yashojwe ku bihugu by’Abarabu birangajwe imbere na Misiri na Syria.

Mu by’ukuri, ibihugu byo mu kigobe byari bikomeje gushaka urwitwazo rwatuma byigenzurira ibiciro bya peteroli yabyo, maze ubwo gucukura byasubukurwaga, igiciro cy’akagunguru nticyasiba kuzamuka, kubeza ubwo cyageze ku $30 ku kagunguru mu 1990.

Hagati y’imyaka ya 1960 na 1970, OPEC yavuguruye ibijyanye n’ubucukuzi bwa peteroli ku buryo abafata ibyemezo n’inyungu nyinshi ijya mu bigega by’ibihugu biyicukura. Izamuka ry’ibiciro bya peteroli, umusaruro ucukurwa n’ubukenerwe bwayo byarazamutse ku bihugu byo mu kigobe, ubu ni byo bikize ku isi…

Kubera iki mbabwira ibi? Uyu munsi bizwi ko ibikomoka kuri peteroli na gaz byangiza uyu mubumbe ndetse ko bigomba gusimbuzwa ingufu zisubira. Kugira ngo ibi bishoboke, dukeneye batiri nyinshi zibasha kubika za ngufu.

Batiri n’ikoranabuhanga rikenewe kugira ngo biboneke, bikorwa mu mabuye azwi nka 3Ts (gasegereti, wolfram na koruta), copper, ariko by’umwihariko ni lithium! Uko ibintu bihagaze, nibura kimwe cya gatatu cy’aya mabuye y’agaciro kibitse muri Repubulika Iharanira Demokarasi ya Congo. Ariko Isi ntabwo irakira ibibazo byabayeho mu 1973 kuri peteroli, cyatumye ibihugu byo mu kigobe bibasha kugenzura umutungo kamere wabyo, bikabasha kwiteza imbere bikomeye.

None uyu munsi ni ibiki birimo kuba muri RDC? Nyuma yo gushwana n’u Rwanda, ya mavugurura yari yitezweho byinshi yarahagaritswe, ya masezerano ya ba runyunyusi yasubiyeho, Abashinwa n’abandi bafite amasezerano y’ubucukuzi ya rutura muri RDC bayora amatoni y’ubutaka, isayo, umucanga n’amabuye bakabyohereza mu bihugu byabo batanabironze. Nyuma bamenyekanisha ibyo bashatse muri Minisiteri ishinzwe ubucukuzi.

Tuvuge nk’urugero, nko kohereza inshuro imwe kuri Valemax bulk carrier – ubwato bunini butwara imizigo ku Isi bunazwi nka Very Large Ore Carriers (VLOCs), bupima metero 400 z’uburebure, n’ubushobozi bwo gutwara amatoni 400.000 (DWT) na kontineri 12.000, ikigo cy’ubucukuzi muri RDC gishobora kuzamenyekanisha ko cyatunganyije toni 400 (kontineri 10) za koruta, kigahisha ingano nyayo yacukuwe, kikanyereza lithium, zahabu n’andi mabuye y’agaciro yabonetsemo.

RDC nta buryo ifite bwo kubigenzura kubera ko gutunganya ya mabuye bikorerwa mu Bushinwa, Canada, Afurika y’Epfo n’ahandi.

Ibyo ni ibintu u Rwanda rutari kwemera ko biba ku muturanyi wacu ngo rutuze; ayo ni yo masezerano RDB itari kwemera ko J.C. Kabongo asinya; niyo nama Kagame yahaga Tshisekedi, kandi ibi: nibyo nkomoko y’intambara n’akaga ku Batutsi b’Abanye-Congo, n’abandi bantu bose mu Burasirazuba bwa RDC.

"Ingufu z’umwijima" nk’uko Fortunat Biselele yabise mbere yo kujya muri gereza, babashije kuzura urwango ku Batutsi mu baturage b’Abanye-Congo. Mbere yo kuzahura umubano n’u Rwanda, Ingabo z’Abafaransa zagiye mu mashyamba ya RDC gutoza no guha intwaro FDLR, no gushyiraho umutwe udasanzwe wiswe Commando de recherche et d’action en profondeur (CRAP).

Denis Mukwege, umuganga w’abagore wahawe igihembo cy’amahoro cyitiriwe Nobel, yamenyekanye cyane by’akanya gato, aza kwenyegeza urwango ku Batutsi muri Kivu y’Amajyepfo. Arimo no kubigeraho kuko Abanyamulenge muri Uvira barimo kwicwa n’inyeshyamba ku manywa y’ihangu, Guverinoma n’Ingabo z’Umuryango w’Abibumbye barebera, mu gihe Abahema bicwa muri Beni na Ituri.

Ibi byemezo bibi by’abanyafurika byahuye n’ibyo Isi ishaka, ko RDC idakwiye kwegerana n’u Rwanda. Tshisekedi agomba kwitandukanya n’inama "mbi" za Kagame mu kugenzura ahazaza h’igihugu cye n’imitungo kamere.

Sinzi niba Tshisekedi abona ko yasinyanye amasezerano n’ikibi, ariko ibintu ntabwo bikiri mu biganza bye kuko ageze mu matora akomeye cyane muri uyu mwaka.

Bimwe mu by’ingenzi:

1. RDC ya Tshisekedi ntishobora gucana umubano na FDLR kuko FDLR irusha imbaraga igisirikare cya Leta, FARDC, MONUSCO n”ingabo za Afurika y’Iburasirazuba ubashyize hamwe.

2. FDLR yivanze n’abaturage bo mu Burasirazuba bwa Congo ku buryo udashobora kubatandukanya mu gihe batarimo kurwana.

3. U Rwanda ntirushobora gutuza mu gihe FDLR ikomeje kwinjiza abarwanyi, gukora imyitozo no kwisuganyiriza ku mipaka yarwo.

4. M23 n’Abanye-Congo bavuga Ikinyarwanda ntabwo bashobora gusubira mu ngo zabo niba Uburasirazuba bwa Congo bwuzuyemo abagize uruhare muri Jenoside ndetse n’ababakomokaho.

5. Amatora ntashobora kuba niba bimwe mu bice by’igihugu biri mu maboko y’abandi bantu.

6. Akavuyo kazaba kose muri RDC amatora naramuka yigijwe inyuma cyangwa agasubikwa.

Igisubizo Tshisekedi yifuza:

Ni ugusabira u Rwanda ibihano mpuzamahanga ndetse rukabihabwa, bikajyana no gushyira M23 mu nkambi z’impunzi nk’uko byari bimeze mu myaka icumi ishize.

  • Iki gusubizo ntigishoboka kubera ko ibyo impunzi z’Abanya-Congo bavuga Ikinyarwanda zisaba byemewe n’amategeko; kandi RDC yasinyanye nabo amasezerano ariko inanirwa kuyashyira mu bikorwa.
  • Ubugizi bwa nabi bwibasira Abatutsi n’Abahema buzwi n’Isi yose ndetse Guverinoma ya RDC ntifite ubushobozi bwo kubuhagarika;
  • U Rwanda rufite ijambo rikomeye ku rwego mpuzamahanga ku buryo rutapfa guhanwa, byongeye mu gihe nta bimenyetso bihari bigaragara by’amakosa rwakoze, no mu gihe Isi ihangayikishijwe n’intambara yo muri Ukraine.

Uburyo bwo kubyivanamo:

1. Ku neza ye ndetse n’iy’igihugu cye, Tshisekedi agomba gusaba ubufasha Kagame;

2. Abayobozi ba FDLR n’abacengezamatwara b’ingengabitekerezo ya Jenoside yakorewe Abatutsi, bakwiriye gutandukanywa n’abaturage b’i Rutshuru, barambiwe intambara ahubwo bakeneye kubaho mu mahoro. M23 cyangwa Ingabo z’u Rwanda nibo bonyine bafite ubushobozi bwo kubigeraho.

3. Ingingo ya kabiri ijyanye n’iya gatatu n’iya kane;

4. Umunsi Kivu yabonye umutekano, nta mpamvu zizaba zihari zo gusubika amatora; nta n’imwe yatuma havuka akaduruvayo.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .