Amahanga akwiriye guhagarika ibyo gushyigikira abanyabyaha b’Abanyarwanda bigize abanyapolitiki

Yanditswe na Bukuru JC
Kuya 15 Werurwe 2021 saa 11:44
Yasuwe :
0 0

Abakurikiranira hafi politiki y’u Rwanda, batangiye kubona ibimenyetso bishobora kuganisha habi, by’abantu bishora mu byaha bakavuga ko bari kuzizwa politiki, ubundi bakajya mu mitwe yitwa ko ‘irwanya’ RPF. Ikibazo kirimo ni uko niba politiki ibaye indiri y’abanyabyaha, abafite imigambi myiza ya politiki ifitiye rubanda akamaro bayivamo.

Muri sosiyete nyinshi, ubusanzwe abantu bafite ubushobozi burenze ubw’abandi ni bo bagira ishyaka ryo kujya mu bya politiki ndetse bagaterwa umuhate na bagenzi babo muri sosiyete kuko baba babona ko hari impinduka nziza babagezaho. Icyakora, hari abanyamahanga bashaka ibitandukanye n’ibyo mu Rwanda: Barashaka ko abaswa ba mbere muri twe, abanyabyaha baba abahamijwe ibyaha n’ababikekwaho ko aribo bafata iya mbere mu kunga Abanyarwanda cyangwa kubayobora, nubwo bazi neza ko amategeko atemerera abahamijwe ibyaha kujya mu nzego z’ubuyobozi.

Kuba uri umunyabyaha cyangwa ubikekwaho, bisa nk’ibyabaye iturufu yo kwinjira mu mutwe wa politiki cyangwa kuwushinga. Kubera ko abanyabyaha batizerana, akenshi bashinga amashyaka mashya aho kujya mu mashyaka asanzwe ariho. Iki ni icyerekana ko batinjira muri politiki ku bw’impamvu nziza, ubundi zakabaye ari ugukorera abaturage. Ni ku nyungu zabo bwite.

N’ubusanzwe, imyitwarire y’ubunyamusozi nk’ubusambo ni yo ibarundumurira mu gukora ibyaha. Urugero rworoshye ni abanyabyaha buzuye muri RNC. Rusesabagina na we yakomeje kwihisha ubutabera kugeza ubwo amategeko yamucakiraga.

Ingabire Victoire ni undi washatse gutwikira ibyaha bye yihishe inyuma ya politiki. Byashoboka ko hari n’abandi bazaza nyuma kuko bashyigikiwe n’amahanga ari nayo yenyegeza iyo myitwarire abyitirira politiki.

Bajya muri politiki kuko babonamo inyungu cyangwa se babona ko ariyo nzira yo kwikungahaza. Icyo bahuriraho nk’abandi banyabyaha bose, ni ukutemera ibyo bakoze nubwo umuba w’ibimenyetso bibashinja waba wegetse imbere y’amaso yabo. Hari urwenya inaha bajyaga batera, bavuga ko abagororwa bahoze muri Gereza ya 1930 bakundaga kuvuga ko ari abere. Yemwe na ba bandi bahamijwe ibyaha bya Jenoside kugeza ubwo abaturanyi bahaguruka bakemeza ko bababonye mu bitero byahitanye abantu mu 1994. Ngo bose bavugaga ko babeshyerwa kuko kubihakana babaga babifitemo inyungu.

Benshi mu banyabyaha bishora muri politiki kuko nta bisobanuro bafitiye ibimenyetso bibashinja. Nyuma yo gutahurwa n’inzego z’ubutabera, basigara bahanganye ubuyobozi butivanze ngo bubuze abacamanza kubakatira kuko bumva ko ari ‘ntakorwaho’. Mu kwihimura, ubuzima bwabo babuharira politiki y’ibinyoma kuko nta gahunda yo kureka ibyaha bafite. Politiki no gushyigikirwa n’amahanga bihinduka umutaka ubakingira ingaruka z’ibyaha byabo.

Kubera kandi ko baba bararangije guhindanya izina ryabo kubera ibyaha bakoze, bashakisha uburyo babeshyabeshya abandi babumvisha ko bakwiriye kubafasha kwerekana ko ari abere. Nibwo buryo abari abayobozi mu gihe cya Jenoside mu 1994 babwiraga abaturage ngo “nitwica twese, ntibizabakundira ko badufunga twese.” Bumvaga ko nibabona benshi babashyigikira bizasibanganya uruhare rwabo mu byaha bakoze. Bihinduka umuryango w’abanyabyaha aho kureka ngo uwakoze ibyaha abyirengere.

Ni uburyo bw’uburyarya bwo guhunga ukuboko kw’amategeko. Bene abo iyo bakoze ibindi byaha bagafatwa, batangira gusakuza ngo barazira impamvu za politiki, ngo ubuyobozi buriho ntibwihanganira abatavuga rumwe nabwo.

Bimeze nk’umutwe w’abagizi ba nabi wihisha mu kabyiniro cyangwa aho bakinira urusimbi, ugamije guhisha ibindi bikorwa bibi ukora nko kubona amafaranga mu buryo bunyuranye n’amategeko n’ibindi. Ni kimwe n’ubwo bwambuzi bwitwaje politiki, bashinga imitwe ya politiki bagamije guhishira amabi bakoze.

Ni uburyo bwo kujijisha, bakabukoresha bazi ko ari ubundi bwenge buzatuma bakinga abaturage ibikarito mu maso ubundi bakabayoboka bazi ko bafite imigambi myiza ya politiki, byahe byo kajya! Ari ukwihimura no kwihisha ingaruka ibyaha bakoze bishobora kubagiraho.

Icyakora ni ukureba hafi, bitabaye ibyo abo biyita abanyapolitiki ntibakabaye byararangiye n’ubundi bafunzwe. Hari abaje kumenya nyuma ko u Rwanda ari igihugu kigendera ku mategeko, nubwo hari abakomeje gushotora amategeko, bazi neza ko hari umurongo utukura bashobora kurenga itegeko rikabatamaza.

Ikindi, biteye kwibaza uburyo aba banyabyaha bakomeje gushyigikirwa n’amahanga muri politiki zabo zidashinga. Akenshi ni abanyamahanga babaroshyaryoshya babizeza inkunga yo guhangana na RPF, nk’aho nta Banyarwanda bazima bahari bafitiye imigambi myiza igihugu. Niba koko bashaka abanyapolitiki bazima bo guhangana na RPF, hari ibihumbi by’Abanyarwanda bagendera ku mategeko.

Bigaragaza ko ubwoko bwa demokarasi bashakira Abanyarwanda aho bafata abanyabyaha bakabagira abanyapolitiki, icyo yazazana cyateruzwa amaboko abiri. Ikigamijwe rero, ni igisenya imbaraga zose zashyizwe mu kubaka igihugu kigendera ku mategeko.

Abo banyabyaha bashyigikira mu izina rya demokarasi, bakwiriye kumenya ko hari ubwo iyo politiki bihishamo ishobora kuzabatamaza. Ni ikimenyetso kandi cy’agasuzuguro abo babashyigikira bafitiye Abanyarwanda.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .