Iki gikorwa cyabereye kuri Mamba Sports Club i Kigali ku wa 7 Ugushyingo 2026, gihuza abagore mu myitozo ngororamubiri, ibiganiro n’inzobere no gusangira ubumenyi bubafasha kubungabunga ubuzima bwabo.

Her Wellness Experience ni gahunda ya She Shape Wellness igamije gufasha abagore gusobanukirwa imibiri yabo, kwitabira imyitozo, kurya neza no gufata ibyemezo bishingiye ku bumenyi mu kwita ku buzima.

Iki gikorwa cyubakiye ku nkingi enye zirimo kumenya umubiri wawe, kuwukoresha binyuze mu myitozo, kuwugaburira neza no kongera ubumenyi ku buzima.

Mu byari biteganyijwe harimo gusuzuma ubuzima n’ibipimo by’umubiri, ndetse n’imyitozo ya Hot Studio Pilates, Yoga, Reformer Pilates, CrossFit na Padel. Buri witabiriye yari afite amahirwe yo guhitamo imyitozo ibiri muri iyo itanu.

Harimo kandi ibiganiro by’inzobere ku myitozo ngororamubiri, imirire, ubugororangingo n’imikorere y’imisemburo, bigahuzwa no gusangira ifunguro rishingiye ku mirire iboneye.

Dr Christelle Giraneza Uwantege, umuganga akaba n’umufatanyabikorwa wa She Shape Wellness mu bijyanye n’ubuzima n’ubuvuzi, yashimangiye ko imyitozo yongera imbaraga ifitiye abagore akamaro karenze guhindura imiterere y’umubiri.

Ati “Nk’umuganga, nemera ntashidikanya ko buri mugore akwiriye kwibonera akamaro ko gukora imyitozo ngororamubiri n’iyongera imbaraga. Guterura ibiremereye ntibigamije gusa kubaka imikaya cyangwa guhindura uko imibiri yacu igaragara; binagamije gukomeza amagufwa, kunoza uburyo umubiri utunganya kandi ugakoresha intungamubiri, gushyigikira imikorere myiza y’imisemburo, kwirinda indwara zidakira no gukomeza kugira imbaraga n’ubushobozi bwo kwikorera uko tugenda dusaza.”

Yakomeje ati “Ndifuza ko abagore benshi bitabira imyitozo, bakarwanya imyumvire ivuga ko guterura ibiremereye atari iby’abagore, kandi bagasobanukirwa ko kugira imbaraga ari ugushora imari mu buzima bwabo bw’igihe kirekire, mu kwigirira icyizere no mu mibereho myiza yabo.”

Ati “Abagore bafite imbaraga bubaka imiryango ikomeye, kandi buri mugore akwiriye kugira amahirwe yo kugira izo mbaraga!”

Sonia Kamikazi, umwe mu bitabiriye iki gikorwa, yavuze ko imyitozo ngororamubiri ikwiye kuba kimwe mu bigize ubuzima bwa buri munsi.

Ati “Imyitozo ngororamubiri si amahitamo gusa, ni ngombwa. Si abagabo bonyine bagomba gukora siporo, kuko n’abagore bakwiye kwiga kwita ku mibiri yabo kugira ngo bagire ubuzima bwiza mu gihe kizaza.”

Ines Agasha na we yavuze ko imyitozo ngororamubiri ifasha umuntu kwita ku mubiri no kuruhura imitekerereze. Yashimiye She Shape Wellness yateguye iki gikorwa, igaha abagore umwanya wo kwiga no gusangira ubunararibonye ku buryo bwo kubungabunga ubuzima bwabo.

Old Mutual yagize uruhare muri iki gikorwa ibinyujije muri Thrive, porogaramu yayo igamije guteza imbere imibereho myiza binyuze mu kwita ku myitozo ngororamubiri, imirire, imitekerereze n’imicungire y’imari.

Simonetta Perles Niteka, ushinzwe Kwamamaza n’Itumanaho muri Old Mutual, yavuze ko kwifatanya na She Shape Wellness bibafasha kwegera amatsinda y’abagore no gushyigikira ibikorwa bibafasha kugira ubuzima bwiza.

Ati “Kwitabira Her Wellness bidufasha kwegera amatsinda y’abagore no kuba mu biganiro bibafasha guteza imbere imibereho myiza yabo.”

Yasobanuye ko Old Mutual yifuza gukomeza gukorana n’amatsinda ateza imbere ubuzima bw’abaturage, ikagira uruhare mu bikorwa n’ibiganiro bibafasha kwimenyereza imibereho myiza.

She Shape Wellness ni urubuga rukorera i Kigali, rwibanda ku buzima n’imyitozo ngororamubiri by’abagore. Rufite umuryango w’abagore barenga 300, rukabafasha binyuze mu myitozo ibongerera imbaraga, uburezi ku buzima n’ibikorwa bibahuza.

Her Wellness Experience 2026 ni igikorwa cya mbere muri gahunda She Shape Wellness iteganya kujya itegura buri mwaka, hagamijwe gufasha abagore kurenga kumenya akamaro ko kwita ku buzima, bakabigira umuco mu mibereho yabo.