Uruhare ntagereranywa rwa Imbuto Foundation mu guteza imbere abagore mu Rwanda

Yanditswe na Cyprien Niyomwungeri
Kuya 8 Werurwe 2018 saa 07:30
Yasuwe :
0 0

Umugore ni inkingi ikomeye mu iterambere rirambye ry’umuryango, bityo iyo ahawe agaciro, uburenganzira bwe bukubahirizwa, ndetse akitabwaho uko bikwiye umusanzu we uba ntagereranywa mu kubaka igihugu.

Imibare yerekana ko abagore ari 52% by’abaturage b’u Rwanda bangana na miliyoni 11.4, kudaha agaciro ubushobozi bwabo no kubasiga inyuma bisobanura neza ko nta terambere ryagerwaho.

Madamu Jeannette Kagame abinyujije mu Muryango Imbuto Foundation, abereye Umuyobozi w’Ikirenga, yabonye kare ko abagore ari ikiraro kigana ku iterambere u Rwanda rwiyemeje, aharura inzira yo kubateza imbere binyuze mu mishinga na gahunda bitandukanye bijyanye no guteza imbere uburezi, ubuzima, ubukungu, urubyiruko n’umuryango muri rusange.

Uburezi bw’umukobwa ni nyambere

Urwego rw’uburezi bw’umwana w’umukobwa ni rumwe mu zitaweho cyane dore ko hambere umuco utamwemereraga kwiga nka musaza we.

Mu 2005, Umuryango Imbuto Foundation watangije gahunda y’ubukangurambaga bwo guteza imbere uburezi bw’abakobwa, kubatinyura no kubagira inama mu mahitamo y’amasomo yabo.

Madamu Jeannette Kagame, kandi ahemba abakobwa bitwaye neza mu bizamini bya leta bazwi nk’Inkubito z’Icyeza. Kugeza ubu abakobwa 4665 bamaze guhembwa mu gihugu hose. Ibi byiyongeraho ubukangurambaga bwo kwigisha umwana w’umukobwa, aho abarenga 60 000, bamaze kugerwaho n’ubu bukangurambaga kandi buratanga umusaruro.

Madamu Jeannette Kagame ashyikiriza ibihembo umwe mu bakobwa b'Inkubito z'Icyeza bahembwe mu mwaka wa 2017

Raporo ya Minisiteri y’Uburezi yo mu 2011, igaragaza ko abakobwa mu mashuri y’incuke bari 51.4%, amashuri abanza bari 50.9%, mu mashuri yisumbuye bari 51.5%. Abakobwa bigaga siyansi bari 48.7%, imyuga ari 38.8% naho Kaminuza bakaba 43.2%.

Raporo nk’iyi yo mu 2016 igaragaza ko mu bana bitabira amashuri y’incuke, 50.8% ari abakobwa naho abahungu bakaba 49.2%. Mu mashuri abanza abakobwa ni 50.1% naho abahungu bakaba 49.9%, mu yisumbuye ni abakobwa ni 52.9% naho abahungu ni 47.1%. Mu mashuri y’imyuga TVET, abakobwa ni 41.1%%. Mu mashuri makuru na za Kaminuza, abakobwa ni 44.6%.

Imbuto yafashije abakobwa kwitinyuka mu bijyanye n'amasomo y’imyuga TVET

Binyuze muri gahunda ya ‘Edified Generation’ kuva mu 2003, Imbuto Foundation ifasha abana b’abahanga bananirwaga gukomeza amashuri yisumbuye kubera kubura ubushobozi. Bahabwa ibikoresho bikenewe, bakishyurirwa amafaranga y’ishuri, aho umunyeshuri umwe atangwaho amadolari 300 buri mwaka. Kugeza uyu munsi mu bafashijwe harimo abakobwa 4,379 bamaze gufashwa.

Ab’indashyikirwa barazirikanwa

Kuva mu 2007, Madamu Jeannette Kagame, ashyigikira urubyiruko atanga ishimwe ku Banyarwanda b’indashyikirwa n’ibigo cyangwa imiryango iteza imbere urubyiruko; ibihembo bizwi nka “YouthConnekt Champions and Celebrating Young Rwanda Achievers Awards (CYRWA).”

Ibi bihembo bitangwa buri myaka ibiri, kugeza ubu abagera kuri 48 bamaze kubihabwa. Aba barimo abagore n’abakobwa bahembwe hagendewe ku bikorwa by’indashyikirwa bagezeho kandi bifitiye abandi akamaro.

Nko mu 2009, bamwe mu bagore bashimiwe barimo Inès Mpambara, Stephanie Nyombayire bombi bakora mu Biro by’Umukuru w’Igihugu na Dr Diane Karusisi uyobora Banki ya Kigali.

Mu 2011, mu rubyiruko rw’Indashyikirwa barindwi hahembwe abagore batatu barimo Epiphanie Nyirabarame uzwi muri siporo; Jacqueline Murekatete mu bikorwa by’ubutabazi na Ornella Umubyeyi mu buhanzi bufasha imfubyi.

Mu 2013, abagore bahembwe barimo Clarisse Iribagiza washinze ikigo gikora ibijyanye n’ikoranabuhanga rishingiye kuri telefoni ngendanwa, cyitwa (Hehe Ltd); Esther Mbabazi, usanzwe ari umupilote muri RwandAir, akaba ariwe Munyarwandakazi wa mbere watinyutse akaba umupilote w’indege za gisivili.

Hari kandi Isabelle Kamariza, Perezida w’Ishyirahamwe Solid Africa, (Umuryango ufasha mu kwita ku barwayi batagira kivurira mu bitaro Bikuru bya Kaminuza bya Kigali (CHUK); Chance Tubane n’umusizikazi Violette Uwamariya.

Mu 2015, Diana Teta, Umuririmbyi akaba n’Umwanditsi w’indirimbo, Dianne Dusaidi; Kellya Uwiragiye, ufite ibikorwa byo kuzirikana abafite ubumuga bwo kutavuga no kutumva, cyane cyane binyuze mu itangazamakuru, Media for Deaf-Rwanda na Dr. Alice Niragire, Umuganga wa mbere w’Umunyarwandakazi wazobereye mu byo kubaga.

Mu 2017 nabwo Madamu Jeannette Kagame yacyeje urubyiruko rw’indashyikirwa harimo abagore n’abakobwa nka Aimée Laetitia Umubyeyi washatse ibisubizo byo gukemura ikibazo cy’amashanyarazi aho atuye; Malaika Uwamahoro, Umuhanzi w’imivugo n’umubyinnyi na Vanessa Bahati washinze Umuryango Jordan Foundation, wita ku bana bafite ubumuga bwo kutabona.

Umubyeyi Aimée Laetitia yahembwe nk'uwashatse ibisubizo byo gukemura ikibazo cy’amashanyarazi aho atuye
Bahati Vanessa, washinze umuryango, Jordan Foundation, wita ku bana bafite ubumuga bwo kutabona na we ari mu bahembwe
Kellya Uwiragiye yahembwe na IMBUTO Foundation mu 2015
Mbabazi Esther yabaye umugore wa mbere utwara indege mu Rwanda

Ubuzima bw’umugore ku isonga

Imbuto Foundation yemeza ko ubuzima bw’imyororokere bw’abana b’abakobwa bukwiye kwitabwaho mbere na mbere n’ababyeyi, abarezi n’abatanga serivisi z’ubuzima, kugira ngo babarinde ingaruka zirimo inda zitateganyijwe no gucikiriza amashuri.

Gahunda ya 12+ yatangijwe mu 2014, ikaba igenewe abana bafite hagati y’imyaka 10 na 12, bahabwa ubumenyi ku buzima bw’imyororokere, imibanire, imiyoborere no kwiteza imbere.

Yatangijwe na Imbuto Foundation mu turere 10 ari two Burera, Gakenke, Gicumbi, Karongi, Musanze, Ngororero, Nyabihu, Rubavu, Rulindo na Rutsiro. Kugeza ubu abarenga 30,000 bamaze gusoza izi nyigisho zitangwa n’abajyanama n’abakobwa bari hagati y’imyaka 18-25 babihuguriwe.

Mu 2010 kandi yari yatangije gahunda yo gutanga amasomo ku buzima bw’imyororokere ku bangavu bafite hagati y’imyaka 10 na 24 yaba abari mu ishuri n’abataririmo. Iyi gahunda igamije kubongerera ubumenyi ku bwandu bwa virusi itera Sida no kugabanya ibyago byo gutwara inda zitateguwe.

Urubyiruko n’abangavu 293 652 bamaze guhabwa amasomo ku buzima bw’imyororokere, kwipimisha virusi itera Sida, ubujyanama mu kuyirinda no kwisiramuza.

Imbuto Foundation ntiyitaye ku rubyiruko gusa kuko n’abakuru yabashyize ku mutima binyuze mu mushinga wa ‘Family Package’, watangiye mu 2001 ugamije gushyigikira Abanyarwanda mu kugabanya virusi itera Sida mu bamaze kwandura ndetse no kurandura ubwandu buturutse ku babyeyi. Abagore 26,647 bafashijwe kubyara abana bazima bo baranduye.

Gahunda y‘Imali’ yakungahaje benshi

Iterambere ry’umugore ryubakiye no ku kugera kuri serivisi z’imari, kwizigamira binyuze mu matsinda, gutinyuka kwegera amabanki n’ibindi bigo by’imari bagahabwa inguzanyo.

Mu 2007, Imbuto Foundation yatangije gahunda yiswe ‘Imali’, nk’uburyo bwo guteza imbere imibereho myiza y’abapfakazi n’imfubyi batunze imiryango binyuze mu bikorwa byo kubahugura no kubashyigikira mu bikorwa bibyara inyungu.

Mu bo iyi gahunda yafashije barimo abagore 884, bibumbiye mu makoperative abarizwa mu turere 14.

Nta gushidikanya ko iyi gahunda yatanze umusanzu ku kuba abagore batunze konti mu mabanki n’ibigo by’imari mu gihugu bariyongereye bakava kuri 5.1% mu 2006 bakagera kuri 21.8% mu 2013. Mu 2012 abagore bagerwagaho na serivisi z’imari bari 36%, ariko mu 2016 bari bageze kuri 62.9%.

Imbuto Foundation yitaye ku burezi bw'umwana w'umukobwa

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Special pages
. . . . . .