Ubuzima bwa Guverineri Mureshyankwano wakuranye amahirwe akagira n’ishaba muri politiki

Yanditswe na Mathias Hitimana
Kuya 6 Werurwe 2018 saa 05:30
Yasuwe :
0 0

Mureshyankwano Marie Rose ni umugore umwe uri mu ba Guverineri b’Intara z’u Rwanda, amaze imyaka hafi ibiri agiriwe icyizere cyo kuyobora n’Umukuru w’Igihugu. Ni Umunyapolitiki wivugira ko yaturutse kure, izingiro ry’amahirwe ye muri urwo ruhando rikaba kuri FPR Inkotanyi.

-  Mureshyankwano yavukiye mu cyaro mu muryango wifashije

-  Yabaye mwarimu imyaka irenga 10

-  Yabaye impunzi acyurwa n’Inkotanyi

-  FPR Inkotanyi yaramuzamuye ava ku bwarimu, aba Depite, abuvaho aba Guverineri

-  Ni umurokore utambira Imana

Nubwo ari Umunyapolitiki ufite akazi gakomeye ko kwita ku Ntara y’Amajyepfo, ntikamuherana kuko agenera umwanya umuryango we, akanibuka ko hari Imana isumba byose, akajya mu rusengero, akirekura akayitambira.

Mureshyankwano w’imyaka 60 y’amavuko, yeruriye Flash FM ubuzima bwe, mu kazi no mu muryango, yerekana amahirwe yagize akaba afite byinshi bimunezeza.

Ahereye ku nkomoko ye, Mureshyankwano yavukiye mu muryango mugari kandi w’abakungu.

Yagize ati “Twavutse turi abana icyenda iwacu, abakobwa batandatu n’abahungu batatu. Nkurira mu muryango hari amatungo, inka n’ihene. Icyo gihe hari muri Komine Karago muri Gisenyi, ubu ni muri Nyabihu.”

Yakuriye ku gitsure cy’ababyeyi, bamutozaga gukora, ati “Twarakoraga cyane, mama yaradukoreshaga ku buryo twajyaga kwiga dusize duhinze ibirayi bizatwishyurira amashuri.”

Mureshyankwano avuga ko nta bibazo yagize cyane kuko atatinze kubona umugabo. Ubu bafitanye abana batatu, barimo babiri biga muri kaminuza.

Ashima Inkotanyi

Mu nzira y’ubuzima, avuga atanyuze ku ruhande ko Inkotanyi zamufashije kugera aho ageze ubu.

Yagize ati “Mu gihe cya Jenoside njye ntabwo nahigwaga, nta bibazo nagize ariko kubera nyine ya ngengabitekerezo batwigishaga, tutaramenya Inkotanyi, batubeshya. Naje guhunga njya muri Congo ariko nza kugirirwa umugisha ba bandi nahungaga aribo Nkotanyi twibwira ko bazatwica nibo baducyuye, batugarura mu gihugu.”

Mureshyankwano yaje kuyoboka Umuryango wa FPR Inkotanyi mu 2000, inzira ya politiki ku buryo bweruye itangira ubwo.

Mbere yo kugaragara cyane muri politiki, Mureshyankwano yabanje kuba umwarimu imyaka irenga 12; umwarimu mu mashuri abanza mu Karere ka Rutsiro (1992-2001) naho kuva mu 2001 kugeza mu 2005 yigishaga kuri Bumba Complex School.

Uyu mugore yabaye Umuhuzabikorwa w’Inama y’Igihugu y’Abagore mu Karere ka Rutsiro, ava muri ako karere mu 2005 kugeza kuwa 4 Ukwakira 2016 ari Umudepite mu Nteko Ishinga Amategeko, Umutwe w’Abadepite.

Mu kazi yakoze kose, Mureshyankwano yishimira ko hari abana yigishije, ari n’Umudepite akagira uruhare mu itorwa ry’amategeko atandukanye.

Mu mwanya arimo, agira ati “N’uyu munsi numva hari byinshi nkora kandi bifitiye abaturage b’Intara y’Amajyepfo akamaro.”

Kugira ngo yumve ko akazi kagenze neza, Mureshyankwano avuga ko azinduka, agategura umunsi.

“Niba navuze ngo ndagera ku kazi saa moya za mu gitondo, mbyuka nibura saa kumi n’imwe n’igice, guhera nka saa kumi n’ebyiri ngatangira kureba muri telefone, nkareba uko Intara yaramutse … nkaba mfite n’uburyo nahaye abakozi gahunda.”

Guverineri w'Intara y'Amajyepfo, Mureshyankwano Marie Rose, yavukiye mu cyaro mu muryango wifashije

Yita ku muryango, akanishimira gusohokana nawo

Muri iki gihe Mureshyankwano ntabonana kenshi n’abana be, kuko abakobwa be babiri biga muri kaminuza, umuhungu yiga mu mashuri yisumbuye ariko abitaho cyane, ati “Iyo bahari njya ngira umwanya wo kuganira nabo.”

Avuga ko umugabo we nawe akora mu Ntara y’Uburengerazuba, amubona kenshi mu mpera z’icyumweru.

Yagize ati “Nko mu mpera z’umwaka n’ikindi gihe mfata akanya n’umuryango wanjye, umugabo n’abana, tugasohokera ahantu, tugafata akantu … Ejo bundi twari twagiye muri Nyungwe kuri cya kiraro bita Canopy, tukigendaho, twavayo tugaca ahantu tukishima, tukabyina, mbese nabyo ndabikunda. Ni na ngombwa ko umuntu anaruhuka mu mutwe.”

Mu kazi kenshi agira, Mureshyankwano avuga ko anakunda gufata akanya ko gukora siporo.

Amafunguro Mureshyankwano akunda

Kubera imyemerere ye ya kirokore, Mureshyankwano ntanywa inzoga naho amafunguro akunda aya Kinyarwanda, adakaranze.

Yagize ati “Nkunda kurya ibintu bitagira amavuta, ibintu bya Kinyarwanda nk’ibihaza, ibirayi bitogosheje, ibigori bibisi bitari impungure n’amashaza y’urunyogwe.”

Guverineri w’umurokore utambira Imana

Mureshyankwano ni umukirisitu wirekura cyane agatambira Imana, iyo ageze mu rusengero.

Yagize ati “N’ibyo nagezeho byose mbikesha Imana yanjye, Imana ishobora byose n’ubuyobozi bwiza bw’igihugu cyacu. Iyo ndi mu rusengero mba nishimye cyane kandi nkaririmba, nkirekura, byaba na ngombwa nkanabyina.”

Guverineri Mureshyankwano mu biganiro n'abaturage ashinzwe

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Special pages
. . . . . .