Inzozi za Makeda, umukobwa wa Bongoman wamamaye mu Rwanda (Video)

Yanditswe na Munyengabe Murungi Sabin
Kuya 4 Mata 2017 saa 10:17
Yasuwe :
0 0

Makeda Mahadeo [Dj Makeda], umwe mu bakobwa bahanzwe amaso mu mwuga wo kuvanga imiziki mu Rwanda, yabitangiye asa n’uwikinira ariko yizeye ko umuhate n’imbaraga yabishyizemo bizamugeza ku rwego ruhambaye.

Dj Makeda yinjiye mu cyiciro cy’abavanga imiziki mu mwaka wa 2010 akigera mu Rwanda, yahawe ubumenyi bw’ibanze n’umwe mu nshuti ze nyuma yihahira ubundi bumenyi muri uyu mwuga ari nabwo bwanamufashije kuzamuka no kumenyekana mu Rwanda.

Makeda yavukiye muri Leta Zunze Ubumwe za Amerika mu mwaka wa 1987. Uyu mukobwa yakuriye muri Jamaica ari naho yigiye kugeza muri kaminuza avanayo impamyabumenyi y’icyiciro cya kabiri cya Kaminuza mu Buvanganzo bw’Icyongereza.

Ni umukobwa wabyawe na se w’Umunyarwanda Aloys Karamuheto [yamamaye nka Bongoman] naho nyina w’Umunya-Jamaica Ann Marie Witter. Bongoman, umubyeyi wa Makeda yari umuhanzi akaba n’umu Dj wamamaye mu Rwanda mu njyana ya Reggae, yacurangiye mu tubyiniro twakunzwe cyane mu Mujyi wa Nairobi ndetse n’i Kigali.

Bongoman yabaga igihe kinini muri Amerika, mu minsi ye ya nyuma yari asigaye atuye mu Rwanda, yaje kwitaba Imana mu Ukwakira 2010 aguye mu Bitaro bya CHUK nyuma y’ukwezi yari amaze aharwariye. Yapfuye afite imyaka 54 y’amavuko, hari hashize iminsi mike akorera Radio 10, muri uwo mwaka kandi yanaririmbye mu iserukiramuco rya FESPAD.

Makeda avukana n’abandimwe be barimo uwitwa Gicari na Jeffrey, uyu mukobwa yaje kuba mu Rwanda amaze kuba mukuru ku buryo mu myaka mike ahamaze atarabasha kumenya kuvuga Ikinyarwanda gusa mu byo akora yihata cyane kwiga kukivuga.

Uko yinjiye mu byo kuvanga imiziki

Makeda, ni umukobwa uhorana isura icyeye agakunda guseka no kumwenyura kenshi iyo aganira, ntibyoroshye kumubona afite agahinda ndetse ngo mu byo aharanira akiri ku Isi ni ukwishimisha, gusangira n’abandi amakuru abubaka no guharanira kubona abandi bafite umunezero.

Akiri mu mashuri yisumbuye yari umukobwa ushabutse ndetse aho yigaga muri Jamaica yakundaga guhora abwira bagenzi be ko yifuza kuzaba Dj. Ibyo yavugaga yabikomoraga kuri se kuko yakuze amubona acuranga ndetse ngo yari umunyabirori.

Makeda ngo yibuka ko mu biganiro yagiranaga n’umubyeyi we yamusabaga kuzamutoza kuba umu Dj undi akabimwemerera nta mususu ndetse akamushyigikira amubwira ko ‘bizashoboka’ none inzozi zabaye impamo.

Makeda agitangira kwinjira mu byo kuvanga imiziki yahereye mu kabyiniro kitwaga DMH club [ubu kafunze imiryango] kabaga i Nyamirambo. Yabyinjiyemo nyuma y’uko icyo gihe aho yasohokeraga hose yabangamirwaga n’uko aba Dj bariho icyo gihe batahuzaga n’ibyo amatwi ye yifuzaga kumva kuko bacurangaga imiziki adakunda gusa.

Ati “Kuba umu Dj nabitangiye nkigera mu Rwanda, narasohokaga cyane hanyuma ngahura n’aba Djs badacuranga indirimbo z’abahanzi nkunda nkumva ngomba nshaka gukora ibituma nishima. Numa nagerageje gutegura ibitaramo hanyuma nsaba umwe mu nshuti zanjye ngo anyigishe iby’ingenzi mu kuvanga imiziki nkoresheje porogaramu ya Virtual Dj ndayiga ndayimenya ntangira ubwo.”

Makeda avuga ko nta na rimwe yigeze ahutazwa mu kabyiniro arimo acuranga, gusa ngo akibitangira yahuye n’urucantege rw’abantu bamubwiraga ko nta mukobwa utaha amajoro ndetse ngo hari n’abamuryaniraga inzara ku bwo kumubona mu kabyiniro kenshi mu masaha akuze.

Ati “Ntekereza ko hari abantu babifata nk’ikintu gitangaje kubona umukobwa w’umu Dj ariko bakirengagiza ko abakobwa na bo ari abantu nk’abandi. Ikintu nahuye nacyo nkigera inaha, abantu bari bafite imitekerereze itanoze bavuga ngo ‘nta mukobwa ugomba kujya mu kabyiniro, ngo umukobwa agomba gutaha kare’, ariko mu by’ukuri hari byinshi birengagizaga. Igishimishije ni uko noneho hari aba Djs b’abakobwa bari kuzamuka usibye ko na bo bashobora kuba barahuye n’ikibazo nk’iki, usanga hari n’imiryango imwe n’imwe itemera ko umukobwa wabo aba umu Dj birinda ko yazajya ajya mu bitaramo nijoro.”

Yavukiye muri Amerika, akurira muri Jamaica ubu atuye mu Rwanda

Makeda wifitemo cyane imigirire y’imahanga, yavuze ko guhuza umuco w’u Rwanda n’uwo mu bihugu yanyuzemo byose bitigeze bimubera umutwaro ndetse ngo mu myaka amaze aje kuba muri Afurika yize isomo rikomeye ryo kumenya kwakira imibereho y’abantu muri buri gihugu.

Yagize ati “Mu by’ukuri ntabwo byoroshye guhuza iyo mico, hari umuco w’u Rwanda mbamo ubu, hari ibyo muri Jamaica hari na Amerika kandi byose biratandukanye. Gukurira muri Amerika nkiga muri Jamaica hanyuma nkaza hano, byari isomo ryiza ariko ntabwo byangoye cyane ahubwo byari ibyishimo.”

Yongeraho ati “Icyo nize ni ukwakira umuco uko umeze ntabanje kwibaza impamvu ibintu bimwe bikorwa mu buryo runaka cyangwa kwibaza byinshi bitari ngombwa. Mbere nkigera hano nakundaga kubaza ibibazo ku bintu bimwe bitewe n’uko nabonaga bitandukanye n’ibyo nabonye mu bindi bihugu, ariko ubu narize, namenye ko ngomba kwakira ibintu uko bimeze, nkakira abantu uko babayeho ntabanje kwibaza byinshi kandi ni byiza, buri gihugu kigira umuco wacyo.”

Makeda kandi yamamaye nk’umunyamakuru w’umwuga kuri Contact FM mu kiganiro The Switch, yanakoze ikindi cyakunzwe kuri Televiziyo y’u Rwanda cya Rise and Shine Rwanda, ubu akorera Journal.rw.

Uretse ibyo kuvanga imiziki n’itangazamakuru, Makeda yakinnye muri filime ‘Coming Back to Rwanda’ yayobowe na Allan Karakire ndetse hejuru ya byose akunda imideli no kwifotoza bya gihanzi.

Yavuze ko mu myaka amaze avuye muri Amerika amaze kubona itandukaniro rikomeye mu mideli, agereranyije n’ibindi bihugu ngo abahanzi[fashion designers] bo mu Rwanda bamaze kwigaragaza ku ruhando mpuzamahanga.

Makeda azwi mu myuga inyuranye mu bijyanye n'imyidagaduro, ni Dj, MC, umunyamakuru, sinema n'imideli

Ati “Nkunda kurimba cyane, nkunda iby’imideli. Imideli mu Rwanda iri gutera imbere ugereranyije n’ahandi, usanga noneho muri iki gihe abahanzi b’imideli mu Rwanda bamaze kugera ku rwego rukomeye, ubu bakora imideli ikunzwe ku rwego mpuzamahanga ku buryo ubona ko bafite itandukaniro. Ikindi ni uko basigaye bibanda cyane mu gukora imideli y’ibyakorewe mu Rwanda gusa, ni ikintu ubwanjye nkunda cyane.”

Makeda mu rukundo…

Makeda yahamije ko mu myaka amaze mu Rwanda yahakuye umusore w’Umunyarwanda biyumvanamo , yitwa Sacha bakundana mu buryo bufite icyerekezo ndetse aherutse kumwambika impeta y’urukundo ku buryo igisigaye ari ukunoza umushinga wo gukora ubukwe bakabana by’iteka.

Ati “Mfite umukunzi, yanyambitse impeta kandi nifuza kugira umuryango wanjye.”

Makeda afitanye isano ya hafi n’abo mu muryango w’umugore wa Perezida Pasiteri Bizimungu. Se [Bongoman] ni mukuru wa Séraphine Bizimungu, uyu mubyeyi na we akaba ari umuvandimwe wa Nyiranyamibwa Suzanne.

Ikiganiro IGIHE yagiranye na Dj Makeda

Makeda yakuriye muri Jamaica none ubu atuye mu Rwanda
Makeda avuga ko imideli yo mu Rwanda imaze kugera ku rwego ruhambaye
Ubu akora iby'itangazamakuru muri Journal.rw
Uyu mukobwa yakuriye muri Jamaica ndetse akunda Reggae cyane
Makeda n'umukunzi we bari mu buryohe bw'urukundo
Makeda ati "Mfite umukunzi kandi ndifuza kugira umuryango"

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Special pages
. . . . . .