Rwanda Day: Igihangano cya Perezida Paul Kagame, gishinga imizi mu murage wa Gihanga ( Igice cya mbere)

Yanditswe na Nsanzabera Jean de Dieu
Kuya 4 Ukwakira 2019 saa 04:01
Yasuwe :
0 0

Benshi mu banyarwanda, bakunze gusesengura no kujora ibiriho bitangaje byagezweho mu Rwanda, ari nako babitangarira ubutitsa, bakibaza n’inkomoko yabyo mu muco n’amateka y’u Rwanda.

Muri iki gice cy’amakuru ku muco n’amateka y’u Rwanda, IGIHE, yabasesenguriye byimazeyo, isanisha rya Rwanda Day, imaze imyaka izenguruka mu mahanga kuri ubu ikaba igeze no mu Budage n’umurage dukomora ku bakurambere mpangarwanda, barwubatse rugahamya igitinyiro.

Abazasoma iyi nkuru, murarushaho gusobanukrwa ko “u Rwanda rufite aho ruvuka, rukagira n’aho ruvoma".

Nk’uko tubikesha igitabo “Intwari y’Izahabu, Yakebanuye u Rwanda rukongera kubaho, " cyanditswe n’Umusizi Nsanzabera Jean de Dieu, inzobere mu muco n’amateka y’u Rwanda, tugiye kubavira imuzi umurage-nkomoko Abanyarwanda bafite, utuma bogoga amahanga, bamamaza u Rwanda, igihugu cya Benimana.

Umurage ndagwabuvivi, washyizeho igenantekerezo rituma abayobozi u Rwanda bashyiraho umunsi wa’’ Rwanda Day’’ umunsi ngarukamwaka w’u Rwanda mu bihugu by’ibituranyi n’inshuti z’iyo giterwa inkingi n’inkenke, aho Abanyarwanda batuye mu mahanga, basabana n’Abanyarwanda batuye mu gihugu, bakongera guhuza urugwiro n’ubusabane bwo kubaka u Rwanda bahaweho umurage n’abakurambere mpangarwanda.

Umurage ukomeye unoza Politiki y’ububanyi n’amahanga n’ubutwererane mu buryo budahigwa, u Rwanda rumaze kuwukatazamo mu buryo bw’ikirenga, aho rumaze guhamya umubano n’amahanga, bikaba bihamywa n’urujya n’uruza rw’abagenderera u Rwanda.

Abaza kurusura barwigiraho, abashoramari baza bikoreye agatubutse, ubutumwa bw’amahoro mu bihugu byinshi byo ku isi, kwita ku mpunzi n’abimukira, gufasha abazahajwe n’ibiza no korohereza abagana u Rwanda, bakurirwaho Viza.

Reka tuzikure ak’Abakurambere tuzimbura imwe mu mirage yasizwe na Gihanga cyahanze u Rwanda, ituma Kagame Paul Umukuru w’igihugu cy’u Rwanda na Leta arangaje imbere, yiyemeza guhanga umunsi wahariwe u Rwanda mu bihugu by’amahanga, ariwo dukunze kwita ’’Rwanda Day" ndetse n’izindi Politiki twifashisha mu kubaka ububanyi n’amahanga buhamye bugamije kwamamaza ubutwari bw’igihugu no guhamya igitinyiro cyarwo cyambuwe n’abahisi.

Imirage Gihanga yasigiye u Rwanda ni myinshi, ariko uwo tugiye kubatekerereza muri iyi nkuru twanzitse, ni uw’ububanyi n’amahanga n’ubutwererane, ari nawo wabaye imvano y’ubuhanga buhanitse bwatumye himakazwa" Rwanda Day’’ mu bihugu byinshi, nta mbebya!.

Gihanga I Ngomijana, umwami wa mbere, ari na we wahanze u Rwanda, yatwaye u Rwanda ahasaga mu wa 1091-1124. Ahanga igihugu cyi Gasabo, arema imirongo migari kizubakirwaho kugeza mu bisekuruza bya kure atakiriho. Niyo yatumye kiba igihugu gihamije igitinyiro, cyaje kwaguka kivamo igihugu cy’u Rwanda, twese tuganjemo.

Zimwe mu nkingi zikomeye yahaye u Rwanda zatumye rukomera rukaramya uburambe n’igitinyiro, ni umurage w’ububanyi n’amahanga, ari nawo Umukuru w’igihugu cy’u Rwanda Kagame Paul, yazunguye mu kwimakaza ububanyi n’amahanga, n’ubutwererane butabara abari mu kaga n’ibihugu byazahajwe n’umutekano muke.

Nk’uko umwanditsi Nsanzabera yabidutekerereje mu bitabo bye birimo: Imizi y’u Rwanda, Intwari z’imbanza, zubatse u Rwanda rugahamya igitinyiro, Intwari y’izahabu yakebanuye u Rwanda rukongera kubaho, Umurage wa Gihanga w’u Rwanda rutugendamo n’u Rwanda tugendana, Umurage wa Gihanga w’igihugu gisangiwe gisobetse ubusabane n’ibindi, biduha ibirari bya Gihanga wahanze Ingoma y’i Gasabo isanga ibindi bihugu bisaga 28 ikaba iya 29, byari bigandagaje kuri ubu butaka bwitwa Rwanda, nuko yiyemeza gusura ibihugu byamutanze guhangwa, ngo abihahemo ubumenyi bw’iyubakabihugu, ndetse anatsure umubano uzatuma ahamya ubucuti n’abamubanjirije gukonda amashyama bakayahangamo ibihugu.

Nibwo yahereye ku Ngoma y’ u Bungwe (Huye, Nyamagabe, Nyaruguru na Gisagara) yari ikantarange agirana umubano w’akadasohoka na Rwamba watwaraga icyo gihugu muri ibyo bihe, yungamo agana mu Bunyabungo (Kivu y’Epfo) yo ni iyo giterwa inkingi, arema umubano w’akadasohoka na Ngabo watwaraga icyo gihugu muri ibyo bihe, asozereza mu Budaha n’u Bwishaza (Karongi na Rutsiro) yari iyo bigwa kwa Jeni rya Rurenge. Ahamya umubano n’ibyo bihugu ubumwe burahama.

Ariko mbere y’uko ajya iyo giterwa inkingi n’inkenke, yabanje kunoza ubumwe n’umubano mu bihugu by’ibituranyi bya hafi birimo; u Buliza (mu Burengerazuba), mu Bwanacyambwe (mu Majyepfo) mu Burasirazubaa hakaba ingoma y’u Rweya.

Aho hose Gihanga, yagenze asura amahanga mu mizo ye ya mbere y’ihangwa ry’igihugu cy’i Gasabo, yahakuye impano zishimikira ubumwe yifuzaga, niho yakuye abagore be bane yatunze mu mateka ye, aribo babyaranye nawe abana Cyenda, babaye inkomoko y’imiryango migari 10 ikomoka kuri Gihanga (Abanyiginya).

Yanahawe impano z’inzobere mu myuga itandukanye zo muri ibyo bihugu yagenze, zamufashije guhanga Itorero ry’igihugu nk’ishuri ryo mu Rwanda rwo hambere, ari nabo babaye abatoza b’ikubitiro b’iryo torero.

Gihanga akimara gukubuka muri ibyo bihugu yari yagendereye, nibwo yaremye igenamigambi ry’imirongo migari, azubakiraho igihugu n’abazamuzungura, bagahuza ubumwe n’ibyo bihugu, kugeza ubwo babaye igihugu kimwe cyubakitse kandi gikomeye, aho kurunda uduhugu duto tw’akajagari gusa, tutagize icyo twakwigezaho.

Mu igenamigambi rya mbere ( Plan A ) rya Gihanga mu mushinga wo kubaka u Rwanda no guhuza ibihugu mu rwego rwo kurwagura, harimo kwagura igihugu no guhuza ibihugu, akoresheje ububanyi n’amahanga n’ubutwererane. Intwaro Gihanga yahisemo gukoresha mu rugamba rwo guhuza ibihugu no kwagura u Rwanda akoresheje ububanyi n’amahanga, zari ugutatu;

Gihanga yahisemo gushyingirana n’abagore bo mu bihugu yasanze byarahanzwe mbere ye, mu rwego rwo guhuza amaraso n’imiryango y’abasangwabutaka, bityo kuzahuza n’ibihugu ntibizagorane, kuko bituwe n’imiryango imwe ifitanye isano ( Abakwe, Abakazana, Abuzukuru, Ababyara, Abishywa, Abisengeneza, ba nyirarume, ba nyirasenye, ba nyinawabo, ba nyirakuru, ba sekuru......). Ku buryo buri wese mu batuye ibyo bihugu uko ari 29, basanga bafitanye isano y’amaraso, ikubiye mu ruhererekene rw’imiryango itandukanye.

Mu gutanga urwo rugero, amateka agaragaza ko Gihanga, nta mugore n’umwe yigeze ashaka wo mu muryango mugari akomokamo, nk’aho yashatse Nyirampigiye ( Umwenengwekazi), Nyangobero ( Umushikazi), Nyamususa ( Umusingakazi w’Umurenge ) na Nyirampingiye ( Umusingakazi w’Umurenge).

Mu kubaka ububanyi n’amahanga, Gihanga yahisemo intwaro yo kugira ubuntu no gutanga, ibyo yabigezeho ubwo yashyiragaho gahunda yo kugabira inka amahanga azengurutse u Rwanda mu rwego rwo kubizeza ubupfura, ubumuntu n’ubumana, buzatuma bahuza bakagira igihugu kimwe. Muri ibyo bihe, nibwo yashyizeho gahunda ya mbere mu mateka y’u Rwanda yiswe : ’’ Gabirwa ( Jabana)’’.

Yabikoze mu rwego rwo kugwiza amashyo y’inka yo kugabira abami, abatware n’abaturage b’ibindi bihugu mu rwego rwo kubaka ububanyi n’amahanga, buzageza ku kuba igihugu kimwe, no kubereka ubupfura, burekura bugatanga, bukagabira n’abo butazi. Kuva ubwo, yimakaza umuco wo kubaka igihugu bishingiye ku kurekura ugatanga no kugira ubuntu utabihatiwe.

Gihanga, yahisemo kwitwaza intwaro yo kunywana, kugirana ubucuti bw’akadasohoka n’abami b’ibihugu by’Abasangwabutaka, bakagirana n’imimaro ihamye, nyuma akazabasaba ubuhuza bw’igihugu byabo bikarema igihugu kimwe.

Kugeza ubwo aya mateka yandikwaga, Kagame Paul ntiyigeze atezuka ku murage wa Gihanga, urimo n’uw’ububanyi n’amahanga no kugira ubuntu bwimakaza ubutwererane. Yagize ingendo nyinshi mu bihugu bitandukanye byo ku Isi, ahanga za Ambasade nyinshi mu bihugu bitandukanye, haba mu Burayi, Aziya, Amerika na Afurika, ashakira u Rwanda umubano.

Igikomeye ari nacyo gikuru, ni uko amahanga agomba kongera kumenya u Rwanda nk’igihugu cy’amata n’ubuki, igihugu cy’amahoro n’umutekano ntakemangwa n’ubuyobozi bwiza ntajorwa. Igihugu gifite ubusugire bwacyo, atari cya kindi bavogera uko bashaka nk’Insina ngufi bacaho urukoma uko babyifuje. Bakamenya u Rwanda nk’igihugu kizira icyaha n’icyasha, kikaba intaho y’Imana.

Umugambi wo guhamya umubano ugaba utyo, awusangiye na Gihanga, ni ukugira ngo aharure inzira zose Umunyarwanda azanyuramo atazahuriramo n’inzitizi zatuma adakomeza kujya mbere. Ni ukugira ngo Abanyarwanda bakomeze kugira ubwinyagamburiro ku Isi yose, aho bashatse kuba no gukorera bashaka imibereho, ntibagire inzitizi. Aho bashatse gukorera ubucuruzi hose, ntibagire ababakoma mu nkokora. Akomeze kurema u Rwanda ruhamije igitinyiro n’icyubahiro mu mahanga yose yo ku isi.

Mu gice gikurikira, tuzarushaho kubasesengurira ibihamya bitandukanye mu ihuzabitekerezo bya Gihanga na Kagame Paul bombi batwaye u Rwanda mu bihe bitandukanye, ku igenantekerezo ryabo mu mushinga wo kubaka u Rwanda bakoresheje ububanyi n’amahanga. Ni ikimenyetso karundura, gihamya ko u Rwanda rwubakiye ku murage w’Abakurambere, kandi kugeza magingo aya rutarawuvamo.

Abayobozi b’u Rwanda, barangajwe imbere na Kagame Paul, bagira aho bavuka n’aho bavoma, niyo mpamvu Abanyarwanda baba mu gihugu n’ababa hanze yacyo, tutazavomera ibizi by’ibirohwa, kuko isoko nzima twafukuriwe n’Abakurambere mpangarwanda, turushaho kuyibungabunga .

Rwanda Day iba buri mwaka, igahuza abanyarwanda bo mu gihugu n'abo hanze yacyo bagasabana bakungurana ibitekerezo

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza