Ibyo wamenya ku Mujyi wa Bonn ugiye kwakira Rwanda Day

Yanditswe na Karirima A. Ngarambe
Kuya 24 Nzeri 2019 saa 10:22
Yasuwe :
0 0

Iminsi irabarirwa ku ntoki ngo Abanyarwanda baturutse imihanda yose bakoranire mu Mujyi wa Bonn uherereye mu Burengerazuba bw’u Budage, mu munsi udasanzwe uzwi nka Rwanda Day.

‘Rwanda Day’ ni umunsi umaze kumenyerwa nk’uhuza Abanyarwanda bo mu gihugu, ababa mu mahanga n’inshuti z’u Rwanda, bagahuzwa n’intego imwe yo kuganira ku cyarushaho guteza imbere igihugu cyabo. Kuri iyi nshuro uteganyijwe ku wa 5 Ukwakira 2019.

IGIHE yasuye uyu Mujyi wa Bonn, ibategurira amafoto n’amateka y’uyu mujyi Perezida Paul Kagame n’abandi bayobozi bakuru b’igihugu, bazagiriramo ibiganiro n’Abanyarwanda batuye mu mahanga.

Bonn iri mu mijyi itandatu minini y’u Budage hamwe na Cologne, Hambourg, Munich, Frankfurt ndetse n’Umurwa Mukuru Berlin, ari naho hakoraniye za Minisiteri n’ibindi biro mpuzamahanga, aha hakaba ari naho kandi hari ibiro bikuru by’Ambasade y’u Rwanda mu Budage.

Uyu mujyi bamwe bita Bonnois uyobowe na Meya witwa Ashok-Alexander Sridharan.

Ibarura ryakozwe mu 2014 ryerekanye ko muri icyo gihe Umujyi wa Bonn uri ku buso bwa hegitari 14 122wari utuwe n’abantu bagera kuri 313 958 bangana n’abaturage 2. 223 kuri Km2.

Umujyi wa Bonn uherereye ku nkengero z’uruzi rwa Rhin, mu Majyepfo ya Leta ya North Rhine-Westphalia mu ntera y’ibilometero 25 uvuye mu Majyepfo y’Umujyi wa Cologne no mu bilometero 54 mu Majyaruguru y’Umujyi wa Coblence.

-  Bonn, umujyi wibarutse ibihangange

Bonn ni agace kanditse amateka kubera ibihangange mu ngeri zitandukanye zirimo abahanzi, abanyabugeni n’abanyepolitiki bakanditsemo amateka kuva mu myaka yo hambere.

Muri bo harimo Ludwig van Beethoven, uyu yabaye umwanditsi n’umucuranzi wa piano. Yacuranze ibihangano birimo “Per Elisa’’, “A melody of tears’’ n’izindi zatumye aba ikirangirire. Beethoven yavukiye mu Budage ku wa 15-16 Ukuboza 1770, yitaba Imana aguye i Vienne ku wa 26 Gicurasi 1827.

Ludwig van Beethoven afatwa nk’uwanditse amateka adasanzwe azahora yibukwa mu Budage ndetse umuziki we wizihira abakunzi bawo.

Urugo rwa Beethoven n’iz’abaturanyi be zahinduwe ingoro ndangamurage zigaragaza umurage yasize. Abahasura bareba ibikorwa bye n’imurika riva imuzi ubuzima bwe.

Bonn kandi yanazamuwe bigizwemo uruhare n’umunyabugeni ushushanya Joseph Vivien wavukiye mu Bufaransa ariko ibihangano bye akabikorera igice kinini mu Budage. Uyu mugabo watumbagije izina rya Bonn ni ho yatabarukiye mu 1734.

Bonn ni umujyi ushingiye cyane ku bukungu bw’ibigo n’imiryango mpuzamahanga. Mu bigo by’ubucuruzi biwubarizwamo birimo DHL ikora iby’ubwikorezi iwufitemo ibiro bikuru.

Hari na Deutche Telekom, ikigo gikomeye mu itumanaho, unacumbikiye icyicaro cya Radio Mpuzamahanga y’u Budage izwi cyane no mu Rwanda ya DW (Deutsche Welle). I Bonn kandi niho hari ibiro bikuru by’Umuryango w’Abibumbye bishinzwe imihindagurikire y’Ikirere (CNUCC).

Bonn ni umujyi ufite igice kimwe gicumbikiye ibikorwa bya Guverinoma y’u Budage.

Kuva mu 1949 [nyuma y’Intambara ya Kabiri y’Isi] kugeza mu 1990 Bonn niyo yari Umurwa Mukuru w’u Budage bw’Uburengerazuba mu gihe Berlin yari Umurwa w’u Budage bw’Uburasirazuba.

Ukwihuza k’u Budage mu 1990 niko kwanzuriwemo ko Berlin igirwa Umurwa Mukuru mu 1991. Bonn yakomeje kuba icyicaro cya guverinoma kugeza mu 1999–2000.

Bonn ku ikubitiro yatangiye ari izina ry’umugezi wavumbuwe mbere y’ivuka rya Yesu mu kinyejana cya mbere.

-  Ahantu nyaburanga mu Mujyi wa Bonn

Mu nyubako z’amateka ziri mu Mujyi wa Bonn harimo Basilika y’Abaroma igizwe n’amagorofa atanu. Iri mu biranga umujyi ndetse hagendwa cyane n’abawusura. Iyi kiliziya yitwa Bonner Münster, yubatswe hagati y’ikinyejana cya 11 n’icya 13.

Uyu mujyi unafite ingoro ndangamurage zihuriye muri Museumsmeile ihuriyemo ibiranga amateka, ubugeni, siyansi n’ikoranabuhanga.

Ingoro ya Koenig ifatwa nk’iy’umujyi yahariwe ibikorwa bigaragaza umurage gakondo ndetse yibanda ku kubungabunga urusobe rw’ibinyabuzima.

Bonn ifite ingoro yayo yihariye yubatswe mu 1715-1740, nyuma y’isenywa ry’inyubako yahahoze. Hari umuhanda ukikijwe n’ibiti bihuza ingoro ya Baroque na Kaminuza ya Bonn.

-  Umujyi w’umuvinyo

Bonn iri mu mijyi inyuzwamo umuvinyo mwinshi woherezwa mu duce dutandukanye tw’u Budage.

Uduce twa Ahrtal turi hafi ya Bad Neuenahr tuzwiho kugira imirima ihingwamo amapera aho abakora imivinyo bahinga ibihingwa itunganywamo.

-  Bonn icumbikiye ibigo byinshi bya Loni

Umujyi wa Bonn ubarizwamo ibigo n’imiryango 18 ishamikiye kuri Loni. Ishami ry’Umuryango w’Abibumbye rizwi nka “UN Campus’’ ryafunguwe muri Nyakanga 2006, ritangijwe na Kofi Atta Annan wabaye Umunyamabanga Mukuru wa Loni na Chancelière w’u Budage, Angela Merkel, iza kongererwa igihe muri Nyakanga 2013.

UN Campus yakira inama mpuzamahanga zirimo nk’igamije kwiga ku mihindagurikire y’ibihe.

Mu myaka isaga 20 ishize, Bonn yabaye igicumbi cy’imiryango idaharanira inyungu ifite inshingano zo gukora hagamijwe kubaka ahazaza heza no gushaka imikoranire n’ibindi bigo.

U Budage ni igihugu kinini kigizwe n’intara zigera kuri 15, giherereye mu Burayi bwo hagati, gikikijwe n’Inyanja ya Ruguru; gihana imbibi na Danemark, inyanja ya Baltique mu Majyaruguru, Pologne na Repubulika ya Tchèque, Iburengerazuba, Autriche n’u Busuwisi mu Majyepfo, u Bufaransa, Luxembourg, u Bubiligi n’u Buholandi mu Burasirazuba.

Mu 1933 nibwo ubutegetsi bwagiye mu maboko y’abo bita abanazi bayobowe n’umuhezanguni Adolf Hitler, wishe abantu benshi mu Burayi agategura n’umugambi w’ishyirwa mu bikorwa rya Jenoside yakorewe Abayahudi. Uyu yaje gutsindwa mu 1945 nyuma y’intambara ya Kabiri y’Isi.

Nyuma y’ayo mateka akomeye y’ubwicanyi, u Budage bwariyunze buvamo igihugu gikomeye kandi kiri mu bikize cyane ku Isi. Gifite inganda zikomeye kandi zizewe mu mikorere y’ibijyanye n’indege, imodoka n’ibindi bikoresho by’ikoranabuhanga.

U Budage buri mu bihugu bifite umubare uri hasi cyane w’abashomeri ugereranyije n’ibindi bihugu by’u Burayi.

U Budage ni kimwe mu bihugu byatumye habaho Umuryango w’Ubumwe bw’u Burayi (EU). Buri ku mwanya wa kabiri nyuma ya Leta Zunze Ubumwe za Amerika mu byakira abimukira benshi ku Isi.

Inzu y'ubuyobozi bukuru bw'Umujyi wa Bonn iriho idarapo ry'u Budage
Ikibumbano cy'umuhanzi ukomeye mu mateka ya Bonn witwaga Beethoven
Ahanditse amateka iruhande rw'icyo kibumbano cya Beethoven
Hagati y'inzu y'ubucuruzi uko haba hameze, tuhasura hari ku cyumweru abantu ari bake mu nzira
Amb. Igor César atembera muri Bonn akikijwe n'abo bafatanyije mu gutegura Rwanda Day
Mu mihanda y'umujyi rwagati ku cyumweru usanga abantu ari bake hatuje
Iyo hasa neza imiryango n'inshuti zabo mu Budage bakunze gusohoka bagasangirira hanze
Aha Amb. Igor César yasobanuriraga umunyamakuru wa IGIHE mu Burayi Karirima, amateka y'uyu mujyi wa Bonn
Amb. Igor César, ibumoso bwe hari Umujyanama wa Mbere wa Ambasade y'u Rwanda mu Budage, Nshimiyimana Benedicto, iburyo bwe ni Umunyamabanga wa mbere, Umulisa Claudette Birori na Philbert Gakuba utuye mu Budage baganira itegurwa rya Rwanda Day
Bonn ni umujyi abahatuye bakunze gukoresha amagare cyane kugira ngo barinde ibidukikije badakoresheje imodoka zizana ibyuka bibi
Bakoresha cyane kandi uburyo bwo gutwara abantu hamwe nko muri za Bus, Trams, gari ya moshi mu gusigasira ibidukikije birinda kongera imyuka mibi mu kirere
Inzira z'imihanda migari igana ku kibuga cy'indege cya Cologne
Uru rukuta ni urwarokotse ubwo hagwaga ibisasu bikomeye mu ntambara zabayeho zikomeye mu Budage, barukora neza rusigara ruhagaze ku buryo rusurwa na ba mukerarugendo, hakavugirwa amateka
Agace karwo kasigaye urebeye ku ruhande
Aho bategera Bisi ku mihanda itandukanye haba hateganyijwe
Abagenda n'amaguru cyangwa amagare bagira ibyapa bito bibayobora agace barimwo cyangwa bashaka kujyamo
Inzu y'Iposita ya kera
Trottinette Electrique, zifasha abantu kugenda mu mujyi badakoreshje imodoka, uzisanga henshi mu mahuriro y'imihanda cyangwa imbere y'inzu zicururizwamwo
Unaniwe ushobora kwinjija igare muri Bus cyangwa muri Gariyamoshi, bakora ibishoboka byose ngo abantu be kugenza imodoka mu mujyi kubera kurinda ibidukikije
Inzira z'ibyuma bita Escalator bijyana abantu bagana ahari Gariyamoshi
Gare ya Gariyamoshi (Train) iri mu mujyi hagati i Bonn ihuza ibihugu n'imijyi iri mu nkengero
Umujyi uwusangana isuku yaho abanyamaguru baca bajya guhaha cyangwa gutembera bisanzwe
Aho bategera gariyamoshi na za Bus uhasanga n'amaduka bahahiramwo ngo byorohere abavuye mu kazi
Kaminuza ya Bonn, iri muzikomeye muri iki gihugu
Umuhanda ugana ku ngoro ya Perezida w'u Budage ya kabiri
Inzu y'icyicaro gikuru cy'ikigo gikomeye cyitwa GIZ
Hano ni inzu ikorerwamo ibijyanye n'ubuhanzi cyangwa ibihangano yitwa Bundeskunsthalle - "Le Centre National d’Art et d’Expositions de la République Fédérale d’Allemagne“
Uyu muhanda ni ugana mu bice bikubiyemo ibigo bikomeye muri Bonn
Icyicaro gikuru cya Radio DW Deutsche Welle kiri i Bonn mu Budage
Iburyo bwa DW hari inzu ndende ikoreramwo icyicaro gikuru cya DHL ishinzwe ubwikorezi kandi ikoresha abantu benshi muri Bonn no hirya no hino mu Budage ndetse no ku Isi
Inzu iri inyuma ndende ni icycaro cya Loni, igice kita ku bidukikije ku Isi gikorera i Bonn
Inzu zisanzwe zo guturamo
Umuhanda usanga urimo inzira za Tram, ikoresha ziriya nsinga z'amashanyrazi ziri hejuru, hakagendamwo imodoka zisanzwe na Bisi, amagare nayo afite umwanya wayo n'abanyamaguru bakagira umwanya wabo

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Special pages
. . . . . .