Iyi gahunda ya ‘Urumuri Program’, yatangijwe ku mugaragaro ku wa 6 Werurwe 2025, hagamijwe gufasha ba rwiyemezamirimo b’urubyiruko barimo abakobwa, abagore n’abafite ubumuga bafite imishinga iri munsi ya Miliyoni 500 Frw, imaze nibura amezi atandatu ikora.

Igamije gufasha ba rwiyemezamirimo bafite intego yo kwagura ibikorwa byabo barengera ibidukikije, gukoresha neza umutungo kamere, kubafasha kubona inguzanyo idafite inyungu guhera kuri Miliyoni 5 Frw kugera kuri 30 bitewe no kubaherekeza mu gihe cy’amezi atandatu bagafashwa kuyishyira mu bikorwa.

Ba rwiyemezamirimo bagera kuri 427 ni bo bandikishije ibigo byabo, muri bo hatoranywamo abagera 138 bahawe amahugurwa ajyanye n’imicungire n’imikoreshereze y’ifaranga no kubyaza umusaruro imishinga yabo ibungabunga ibidukikije.

Adeline Mukayirere ni umwe muri ba rwiyemezamirimo ukorera mu Murenge wa Runda, Akarere ka Kamonyi mu Ntara y’Amajyepfo, wagize amahirwe yo guhabwa iyi nguzanyo idafite inyungu nyuma yo kuva muri ayo mahugurwa.

Uyu afite ikigo cyatangiye gukora mu 2015 cyitwa Davet Ltd gikora ibijyanye n’ubuhinzi n’ubworozi. Ni umushinga wo kubyaza umusaruro imyanda y’amatungo n’amayezi akayikoramo ifumbire mborera, yifashishwa mu kuzamura umusaruro w’ubuhinzi mu gace atuyemo.

Mukayirere avuga yahisemo umushinga wo gutunganya imyanda kubera ko yabonaga ko ifumbire y’imborera isigaye yarabaye nke.

Ati “Impamvu nahisemo gutunganya ifumbire nkoresheje imyanda y’amatungo n’amayezi, ni uko nabonaga ubukene buhari bw’ifumbire y’imborera ari ikibazo cyari gihari biturutse ku ikoreshwa rikabije ry’ifumbire mvaruganda, bituma nkora uyu mushinga buryo bwo kubungabunga ibidukikije.”

Akomeza avuga ko indi mpamvu nyamukuru yahisemo gutanga uyu mushinga yari ukubera ko yizeye isoko rinini ryaho azajya acuruza, kubera ko aho atuye hari koperative ikora ubuhinzi kuri hegitari 200.

Mu kwezi kumwe akusanya imyanda y’ibisigazwa byo mu matungo n’ibihingwa birimo ibyatsi by’umuceri, ibigori, ibisheke n’ibindi bigera kuri toni 40 na 50.

Nyuma yo gukusanya bahita bakuramo itabora akenshi iba iri ku kigero cya 5% cya toni zose bakusanyije, nyuma yaho igashyirwa mu byobo byabugenewe biba bishobora kubika nka toni 10 na 12 z’imyanda.

Iyo myanda ishyirwa muri ibyo byobo iba ipfundikiwe kugira ngo gaz byasohoraga ikomeze igumemo, gusa igasfungurwa inshuro enye mu kwezi, ubwo ni ukuvuga inshuro imwe buri cyumweru.

Nyuma y’izo nzira zose ihita ihindukamo ifumbire y’imborera, akayigurisha ku bahinzi bakorera muri icyo gishanga begeranye.

Ambasaderi w’u Budage mu Rwanda, Heike Uta Dettmann, yagaragaje ko yanejejwe cyane n’iterambere Mukayirere Adeline amaze kwigezaho, harimo no kugirira akamaro ab’aho atuye.

Ati “Byanshimishije cyane kuba nitabiriye iki gikorwa, kuko ni inkuru nziza yerekana rwiyemezamirimo w’umugore ufite ubushake, ndetse n’ibitekerezo byiza byo guteza imbere aho atuye binyuze mu mishinga akora kandi ufite aho uhuriye no kubungabunga ibidukikije.”

Umunyamabanga Nshingwabikorwa wa BK Foundation, Ingrid Karangwayire, yavuze ko impamvu bahisemo gukomeza gufasha imishinga ibungabunga ibidukikije, ari ukugira ngo bashyigikire gahunda ya Leta yo kurengera ibidukikije na gahunda isanganywe zo kurengera ibidukikije.

Ati “Twifuje gukurikiza intambwe ya leta mu kubungabunga ibidukikije. Amahirwe twagize ni ukubona umufatanyabikorwa GIZ, bituma dushobora gukorana mu ishyirwa mu bikorwa rya gahunda y’Urumuri Program.”

Muri gahunda BK Foundation yari isanzwe ikora zo gufasha ba rwiyemezamirimo bato kwiteza imbere, imaze gufasha abarenga 200 barimo 60% by’abagore.

Kubindi bisobanuro ku bikorwa bya BK Foundation, mushobora gusura urubuga: www.bkfoundation.rw

Mukayirere amaze guha akazi abaturanyi na bo biteza imbere

Abayobozi ba BK Foundation n'Ambasaderi w'u Budage mu Rwanda bakurikiye ibyo Mukayirere yakoraga ahatunganyirizwa ifumbire y'imborera

Ubwo Mukayirere yerekanaga uburyo atunganyamo ifumbire

Abakozi ba BK Foundation bari kumwe n'aba GIZ bafashe ifoto y'urwibutso na Mukayirere Adeline wahawe inguzanyo ya miliyoni 30 Frw

Mukayirere Adeline ni umugore witeje imbere abikesha kubyaza umusaruro imyanda y'amatungo n'amayezi

Umushinga wa Mukayirere wahawe na Bk Foundation miliyoni 30 Frw mu guteza imbere ibikorwa bye

Umunyabanga Nshingwabikorwa wa BK Foundation, Ingrid Karangwayire (ubanza uhereye ibumoso) yavuze ko biteguye gukomeza gushyira mu bikorwa gahunda ya leta yo kurengera ibidukikije