Iki gikorwa cy’ubugiraneza cyabaye hagurwa ibikoresho byifashishwa mu mwuga wo kudoda no kuboha, binyuze mu bufatanye buri hagati yayo n’umuryango w’abakinnyi ba Golf (PMC) watanze inkunga ya 10.650.000 Frw.

Mu gitondo cyo kuri uyu wa Gatanu, tariki ya 22 Ugushyingo 2024, ni bwo bamwe mu bagize Rotary Club of Kigali Golf bahuriye mu kigo cya Rwanda National Union of the Deaf (RNUD), gifasha abafite ubumuga bwo kutumva.

Bafatanyirije hamwe kumenya imibereho yabo ndetse no kwiga ururimi rw’amarenga, ariko banasiga babahaye ibikoresho byo kubafasha kwiga umwuga w’ubudozi no kuboha binyuze muri Koperative Nyereka Ibiganza byawe ikorera Huye

Hakurikiyeho kugeza ibikoresho ku muryango udaharanira inyungu witwa Empower the Future, ufasha abana babaga mu muhanda bagasubira mu buzima busanzwe ndetse n’imiryango yabo igafashwa kwihangira imirimo.

Umuyobozi wa Empower the Future, Kayitare Emile, yavuze ko ibikoresho bahawe bizatuma iterambere n’intego bafite byihuta kandi imiryango myinshi ikabasha kwifasha.

Ati “Tureba abana bari mu muhanda tukabazana, bagasubira mu ishuri ndetse abandi bakihangira imirimo. Twahawe rero imashini zizadufasha kwihutisha akazi kandi ibyo dukora bibe bifite ireme, byihute na bo bagire ibyo binjiza binyuze mu masoko tubona abagurira ibyo bakoze.”

Mu bikoresho bahawe harimo imashini itera ibipesu, ishyira ibirango ku myenda byasabaga ko bajya kure bagiye gushaka aho babafasha kandi bikabatwara n’andi mafaranga n’umwanya.

Umuyobozi wa Rotary Club of Kigali Golf, Nkunda Apollo, avuga ko intego ihari ari ugukomeza kugira uruhare mu iterambere ry’abaturage.

Ati “Twanejejwe no kubagezaho ibi bikoresho kandi bizabagiraho akamaro kanini, ni ibintu byiza. Natwe biduhesha ishema iyo tubona dukora igikorwa gituma abantu batera imbere. Tuzakomeza gukorana kugira ngo turebe ko umubare munini w’Abanyarwanda wazamuka mu iterambere.”

Rotary Club of Kigali Golf yashinzwe muri uyu mwaka wa 2024, ikaba ari na yo Rotary club imaze igihe gito mu ziri mu Rwanda.

Abanyamuryango ba Rotary Club of Kigali Golf bigishijwe ururimi rw'amarenga

Ururimi rw'amarenga ruri mu byigishirizwa muri RNUD

Ururimi rw'amarenga rwifashishwa mu kuganira n'ufite ubumuga bwo kutumva

Buri wese yigishijwe uko yakwandika izina rye hakoreshejwe amarenga

Hatanzwe imashini zidoda

Abanyamuryango ba Rotary Club of Kigali Golf bafashe ifoto y'urwibutso n'aba RNUD

Imashini zidoda zizatuma abafite ubumuga bwo kutumva babasha kubona imirimo

Imashini zatanzwe harimo izidoda n'ibikoresho byo kuboha

Bamwe mu bagore bahisemo inzira yo kwiteza imbere

Abanyamuryango ba Rotary Club of Kigali Golf bagize umwanya wo kuganira n'abo muri Empower The Future

Ahobantegeye Claudine yifatanya n'abandi mu gukarishya ubumenyi mu kudoda

Imashini zatanzwe zizafasha abari muri Empower The Future kujya bishyirira ibirango ku myenda

Empower The Future yageneye impano Rotary Club of Kigali Golf

Perezida wa Rotary Club of Kigali Golf, Nkunda Mugisha Apollo, yashimye umuhate abagore batishoboye bashyira mu kwiteza imbere

Abanyamuryango ba Empower The Future bari banezerewe

Abanyamuryango ba PMC bashyikiriza aba Rotary Club of Kigali Golf inkunga y'arenga miliyoni 10 Frw

Amafoto: Kasiro Claude