00:00:00 IGIHE NETWORK KN KINYARWANDA EN ENGLISH FR FRANCAIS

Uburyo Tshisekedi yagambaniye Kabila wamushyize ku butegetsi

Yanditswe na Mwene Ndabarasa
Kuya 5 April 2023 saa 10:28
Yasuwe :

Mu mwaka wa 2019, Repubulika Iharanira Demokarasi ya Congo yabonye umuyobozi mushya: Felix Antoine Tshisekedi wo mu ishyaka rya UDPS ryashinzwe na Se, Etienne Tshisekedi, warwanyije ubutegetsi bwa Perezida Mobutu igihe kirekire.

Perezida Tshisekedi yageze ku butegetsi abifashijwemo n’uwo yari asimbuye, Perezida Joseph Kabila, kuko amatora yerekana ko Tshisekedi yari uwa gatatu nyuma ya Emmanuel Ramazani Shadary na Martin Fayulu bivugwako ari we wari watsinze amatora.

Byatangiye abarwanya Perezida Kabila bose bishyize hamwe ngo bagire umukandida umwe, Felix Tshisekedi, Moïse Katumbi na Martin Fayulu bemeza ko bose bazashyigikira Fayulu uzahangana na Ramazani Shadary, mu nama yabereye mu Busuwisi.

Nyuma gato, Kabila na Tshisekedi bagiranye amasezerano y’ibanga, Tshisekedi atera umugongo ihuriro ryari ryemeje umukandida Martin Fayulu.

Mu bafashije gushyiraho amasezerano hagati ya Kabila na Tshisekedi barimo François Beya uzwi ku kazina ka ’Mr Sécurité’. Mu gihe cya Perezida Kabila, yayoboye ibiro bishinzwe iperereza mu gihe cy’imyaka 12, naho ku bwa Tshisekedi yabaye umujyanama mu by’umutekano mbere yuko atabwa muri yombi.

Harimo kandi Gaston-Thethe Kabwa Kabwe, mubyara wa Perezida Kabila, wari umujyanama wa Perezida Tshisekedi, waguye mu bitaro muri Afurika y’Epfo muri Kamena 2021.

Undi nkingi ya myamba muri aya masezerano ni Vital Kamerhe wari Perezida w’Inteko ishinga amategeko mu gihe cya Kabila, yanabaye umukuru w’ibiro bya Perezida Tshisekedi nyuma aza gufungwa ashinjwa kunyereza amafaranga, nubwo aheruka kwinjizwa muri guverinoma.

Undi yari Fortunat Biselele wari umujyanama wa Perezida Tshisekedi, ubu afungiwe muri Gereza ya Makala i Kinshasa. Ntitwakwibagirwa Maj Gen Delphin Kahimbi wari ukomeye mu gihe cya Perezida Kabila, muri Gashyantare 2020 akaza gusangwa iwe mu rugo yapfuye.

Tshisekedi akimara kujya ku butegetsi, yahise abona ko nta maboko afite haba mu butegetsi ndetse no mu gisirikari.

Nubwo Tshisekedi yari agiye ku butegetsi, yari akeneye abamufasha mu kumenyekana ku isi, kugira ingufu mu gihugu no hanze yacyo ndetse no kumenya uko igihugu kiyoborwa, cyane ko atari yarigeze aba Minisitiri, depite cyangwa guverineri mu buzima bwe bwa politiki.

Kuba Kabila yarahereje Tshisekedi ubutegetsi, ntabwo yari ananiwe kuguma ku butegetsi kuko bizwi neza ko muri Congo - Kinshasa nta matora abayo, ahubwo usabwa kuba warishyiriyeho abakora muri Komisiyo y’Amatora bagutangaza ko watsinze, ndetse no mu rukiko rushinzwe kurinda itegeko nshinga rwemeza ibyatangajwe na Komisiyo y’Amatora.

Perezida Kabila yaramaze imyaka isaga 18 ari ku butegetsi, aho inzego zose z’igihugu zashyizweho na we harimo igisirikari, inzego z’iperereza, ubucamanza ndetse na Komisiyo y’amatora.

Ihuriro rya Kabila, Front Commun pour le Congo (FCC) ryari rifite imyanya irenga 2/3 by’inteko ishinga amategeko yose, mu gihe yari afite abaminisitiri 42 kuri 65 bagize guverinoma.

Inyiturano ya Tshisekedi yabaye kwigizayo abamushyize ku butegetsi, ku buryo ibyo yasezeranye na Kabila bita agaciro. Yafunze Gen Kahimbi nyuma apfa arozwe, hakurikiraho Maître Kabwa Kabwe na we bivugwa ko yishwe n’uburozi. Naho Kamerhe na Beya barafunzwe, bambikwa icyasha bari bakomeye muri politiki.

Impinduka zikomeye zigizayo abo Tshisekedi yitaga aba Kabila, ni umwaka ushize mu kwezi kwa cumi ubwo yashyiragaho umukuru w’ingabo bakomoka hamwe, Lieutenant-General Christian Tshiwewe wari ukuriye ingabo zimurinda. Yasimbuye Lt Gen Celestin Mbala wahise yoherezwa mu kiruhuko cy’izabukuru, ariko mu by’ukuri yazize kwitwa umuntu wa Kabila.

Tshiwewe nk’umuntu wari ushinzwe kurinda Tshisekedi, yagize uruhare rukomeye mu gisirikari cya Congo igihe Kabila na Tshisekedi bari batangiye kutumvikana, aho yakoresheje amafaranga menshi agura abajenerali ngo bajye kuri Tshisekedi, abatabishaka akabashyiraho igitutu ko azabafunga, kuko nta musirikari ujya mu bya politiki.

Tshiwewe yabaye umukuru w’ingabo mu gihe Tshisekedi yazamuye ingengo y’imari y’ingabo z’icyo gihugu, aho igeze kuri miliyari y’amadorali, akaba kandi afite akazi katoroshye ko amatora agomba kuba uyu mwaka igisirikari cyose cyumvira Tshisekedi, bakibagirwa Kabila.

Tshisekedi yaje no kwigarurira inteko Ishinga Amategeko, ubwo uwari Perezida wa Sena Alexis Thambwe-Mwamba yeguzwaga, noneho abari abadepite bo mu ishyaka rya Kabila bakajya mu rya Tshisekedi kugirango bagumane imyanya.

Abo badepite kandi beguje uwahoze ari Minisitiri w’Intebe wo mu ishyaka rya Kabila, Sylvestre Ilunga muri Mutarama 2021, nyuma y’ukwezi kumwe beguza na Perezida w’Inteko ishinga amategeko, Jeanine Mabunda.

Mu myaka itanu ishize, Tshisekedi yarwanaga no kwigarurira icyizere n’ubuyobozi mu gihugu.

Ubwo amatora yegereje, ntacyo afite yashyira ku meza, nibwo yitwaje u Rwanda, aho agiye n’aho avuye intero ni imwe, ngo u Rwanda rwaramuteye, kuko aziko imvugo yo kwanga u Rwanda ikoreshwa cyane n’abandi banyapolitiki nka Martin Fayulu, mu kwigarurira abayoboke.

Nubwo Tshisekedi yabashije kwipakurura Kabila, aracyafite ibibazo by’urusobe birimo cyane cyane abamurwanya bakomeye bityo agatinya gutegura amatora, n’ingabo zidashoboye no gutsinda umutwe wa M23 ahubwo zigafatanya n’imitwe yitwaje intwaro irimo FDLR igizwe na bamwe mu bakoze Jenoside mu Rwanda, ikaba igendera ku ngengabitekerezo ya jenoside nk’umurongo wa politiki.

Si Kabila gusa Tshisekedi yagambaniye, kuko akijya ku butegetsi yifashishije u Rwanda yemera amasezerano y’ubuhahirane, ariko kubera inyota yo gukunda ubutegetsi ariko adashoboye, aza kuyasesa.

Uwashaka gufatanya na Tshisekedi yabanza agasubiza amaso inyuma, akareba ibyo yakoreye abamushyize ku butegetsi.

Kabila yagize uruhare rukomeye mu kugeza Tshisekedi ku butegetsi bwa RDC
Ubu bucuti ntibwateye kabiri, ubu Tshisekedi na Kabila ntibacana uwaka

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .