Impamvu Macron ari we muyobozi wa mbere mpuzamahanga wasuye Liban

Yanditswe na Ndahayo Emmanuel
Kuya 7 Kanama 2020 saa 04:02
Yasuwe :
0 0

Hatarashira amasaha 48 nyuma y’iturika ryashegeshe Beirut, umurwa mu mukuru wa Liban, Perezida w’u Bufaransa, Emmanuel Macron, yasuye agace kari hafi y’icyambu cya Beirut, ari na cyo cyabaye intandaro y’iri turika ryateye umutingito uri ku gipimo cya 3.3.

Mu ishati yererana ikunje amaboko, Macron yazengurutse imihanda yuzuye ibisate by’ibirahuri n’amatafari y’inzu zasenywe, agenda apepera abaturage, aganira n’abandi bayobozi ndetse ari na ko asubiza ibibazo by’abanyamakuru.

Buri aho yageraga, Macron yafataga umwanya akavugisha abaturage. Ntiyatinye kwegera abahogoye akabahoza, abafite umujinya akabumva ndetse n’uwashatse ifoto yayibonye.

Mbere y’uko agera i Beirut, Minisitiri w’Ubutabera wa Liban, Marie-Claude Najem, nawe yagerageje kuzenguruka ahumuriza abaturage bazabiranyijwe n’uburakari, gusa ingano y’amazi yatewe yatumye asubira inyuma, ijwi rye riburizwamo imbere y’urwamo rw’imbaga yamusabaga “kwegura nta mananiza”.

Kuri Macron, ibintu byari bitandukanye. Abaturage b’i Beirut bamwakiriye “nk’umucunguzi” ufite ijambo n’urufunguzo rwo gufasha igihugu cyabo cyari gisanzwe kiri mu kangaratete k’ibibazo na mbere y’iri turika.

Ubukungu bwa Liban busanzwe bwaraguye. ifaranga ry’igihugu ryataye agaciro ku kigero cya 80% ndetse ibiciro by’ibiryo n’imyenda bizamuka ku bigero bya 190% na 172% muri Gicurasi uyu mwaka.

Banki y’isi ivuga ko uyu mwaka uzarangira 40% by’abanya-Liban bari mu bukene, ikigero Minisitiri w’Ubukungu muri Liban, Raoul Nehme, avuga ko ‘cyamaze kurenga’. Liban ni cyo gihugu cya gatatu ku Isi gifite ideni rinini ugeranyije n’umusaruro mbumbe wacyo.

Macron nawe yari azi ibyo ajemo. Uyu mugabo yazanye ijwi ry’ihumure, asezeranya abaturage ubufasha ndetse avuga ko ari bo bamuzanye aho kuba Leta yabo.

Macron yafashe umwanya uhagije wo kwihanganisha abaturage ba Liban

Nyuma y’uru rugendo, Sara Assaf, umwe mu bakoresha imbuga nkoranyambaga muri Liban yagize ati “birababaje kandi biteye agahinda. Ariko ku nshuro ya mbere [nyuma y’iturika] nagize icyizere ni ubwo Perezida w’u Bufaransa yageraga mu gihugu cyanjye akatubwira amagambo yagaragaje ko yumvise ubwoba bwacu kandi yiteguye kudufasha gutekana nanone”, yongeyeho ko “nta muyobozi wa Liban wari bubashe gukora ibimeze gutyo”.

Amagambo Macron yavugiye muri urwo rugendo yiganjemo guhumuriza abaturage ba Liban. Yavuze ko agiye gutegura inama mpuzamahanga igamije gushakira ubufasha igihugu cya Liban. Yaba ibaye iya gatanu imeze gutyo mu myaka 20 ishize.

Yongeyeho ko igihugu cye “kitazaterana Liban kuko Abafaransa n’Abanya-Liban bafitanye igihango gikomeye”.

Uyu mugabo kandi yanasabye ko Umuryango mpuzamahanga ushyiraho ‘komite ihuriweho yo kugenzura ibyabaye byose kugira ngo iri turika ribeho’, yongeraho ko ataje ‘kwifatanya na Leta ya Liban ahubwo yaje kwifatanya n’abaturage’ ndetso ko binabaye ngombwa ‘azashyigikira ibihano mpuzamahanga ku buyobozi bwa Liban igihe cyose butiteguye guhindura imikorere’.

Akiva ahabereye isanganya, Macron yagiye kuvugana n’abayobozi bakuru ‘bose’ ba Liban, akomereza mu biganiro n’imiryango itegamiye kuri Leta mbere yo kujya mu kiganiro n’abanyamakuru, aho yavugiye ko ‘ataje kuzanzamura ubuhangange bw’u Bufaransa mu gihugu bwahoze bukoronije’.

Amarembo y’u Bufaransa mu Burasirazuba bwo hagati

Umubano w’u Bufaransa na Liban umaze ikinyejana kirenga. U Bufaransa nibwo bwakoronije Liban kugera mu 1943. Nyuma yabwo, ibi bihugu byubatse umubano utajegajega. Ururimi rw’Igifaransa rugenderwaho, rwigishwa mu mashuri kandi rukoreshwa n’inzego nkuru za Leta.

Ibi byafashije u Bufaransa kubona irembo ribwinjiza mu mikorere y’u Burasirazuba bwo Hagati, agace iki gihangange zidakunze kugiramo amaboko kandi gakungahaye kuri peteroli nyinshi cyane.

Usibye gutuma Igifaransa kiba ururimi rwa kabiri rukoreshwa cyane muri Liban, Abafaransa banakoresheje Ubukirisitu mu kwinjiza umuco wabo muri Liban, bituma icyo gihugu kiba icya mbere mu Burasirazuba bwo Hagati gifite Abakirisitu benshi aho 40.5% bya miliyoni esheshatu zigituye ni Abakirisitu.

Liban kandi yakiriwe mu muryango w’ibihugu bikoresha Igifaransa, ‘Francophonie’.

Izi mbaraga u Bufaransa bwakoresheje zabyaye umusaruro ugaragarira mu bucuruzi hagati y’ibihugu byombi.

Agaciro k’ubucuruzi hagati ya Liban n’u Bufaransa kari gahagaze kuri miliyoni €934 muri 2016, mu gihe ibigo by’ubucuruzi birenga 4,500 byo mu Bufaransa, byohereza ibicuruzwa byabyo muri Liban.

Macron yavuze ko u Bufaransa butazatererana abaturage ba Liban

Ishoramari ry’u Bufaransa muri Liban ryari rihagaze kuri miliyoni €534 muri 2015 naho ibigo birenga ijana by’Abafaransa byashoye imari yabyo muri Liban, byibanda ku bikorwa bibyara inyungu itubutse nk’itumanaho, ubucuruzi bwa peteroli na serivise z’imari.

Abanya-Liban barenga 150.000 na bo batuye mu Bufaransa, kandi ingendo hagati ya Beirut na Paris zihoraho.

Muri make, u Bufaransa bufata Liban nk’umufatanyabikorwa ukomeye bitewe n’aho iherereye, biha u Bufaransa amahirwe akomeye yo kugira ijambo n’uruhare mu Karere k’u Burasirazuba bwo Hagati. Akarere budasanganywemo imbaraga nk’ibindi bihangange nka Amerika n’u Bwongereza.

Gusigasira inyungu z’u Bufaransa muri Liban

Nk’uko tumaze kubibona, inyungu z’u Bufaransa muri Liban ni nyinshi. Ikibazo ni uko zigenda zigabanuka kubera imiterere n’ihindagurika rya politike muri Liban.

Imwe mu mpamvu nyamukuru y’izi mpinduka ni ugukura k’umutwe wa Hezbollah. Uyu ni umutwe ufite ijambo rikomeye cyane muri Liban kandi wakomeje kwaguka kuva washingwa ahagana mu 1975.

Kugeza ubu, uyu mutwe ufatwa nka Leta mu yindi bitewe n’imbaraga ufite mu bushorishori bw’ubuyobozi bukuru bwa Liban.

Amacengezamatwara ya Hezbollah arwanya kwivanga kw’ibihugu by’amahanga mu mikorere y’ibihugu by’Abarabu. Ibi byatumye kuva uyu mutwe washingwa, warajujubije ibihugu by’I Burayi na Amerika, ari na byo uri gukorera u Bufaransa muri Liban.

James Andre, Umwanditsi Mukuru wa France24, yavuze ko n’ubwo igice cy’abanya-Liban benshi bishimiye uruzinduko rwa Macron, atari ko byagenze ku bashyigikiye Hezbollah.

Ati “Abakirisitu bo muri Liban bishimiye uruzinduko rwa Macron ariko sinizeye neza ko abashyigikiye Hezbollah bari bwishimire uru ruzinduko”.

Yongeyeho ko uruzinduko rwa Macron rugamije kuzahura ubuhangane bw’u Bufaransa muri Liban ‘bwagiye bugwa mu myaka ishize’.

Ati“U Bufaransa bwagiye butakaza ubuhangange bwabwo muri Liban mu myaka myinshi ishize. Umubare w’abanyashuri biga Igifaransa uri kugabanuka, Igifaransa ntikigifite agaciro nk’ako cyahoranye, aya rero ni amahirwe ku Bufaransa yo kongera kwigaragaza nk’igihugu gikomeye muri Liban”.

Amakuru kandi avuga ko Perezida Macron yagerageje gusura Liban mu minsi ishize ariko ntibyamukundira kuko atashakaga kwigaragaza nk’ushyigikiye Leta yari ihanganye n’abigaragambya. Iyi myigaragambyo imaze amezi arenga icyenda muri Liban.

Kujyayo muri ibi bihe bitoroshye ngo ni umwanya mwiza yabonye wo kwereka abaturage ba Liban ko igihugu cye kigifite inyota yo kubafasha no kubateza imbere. Aha rero icyitezwe ni uko Abanya-Liban barushaho kwiyumvamo u Bufaransa nk’uko byahoze, bityo inyungu za politike n’ubucuruzi Leta y’I Paris ifite i Beirut zigasigasirwa.

Piotr Smolar, umunyamakuru wa Le Monde, yavuze ko ibyo Macron yakoreye i Beirut ari igitego yatsinze, ati “Iki gihe kizaba icy’ingenzi cyane mu byaranze politike y’Ububanyi n’Amahanga ya Perezida Emmanuel Macron”.

Ibi kandi byatumye abaturage barenga 60,000 basinya urwandiko rusaba ko Liban iyoborwa n’u Bufaransa mu gihe cy’imyaka 10 iri imbere, kugira ngo ishyireho inzego nzima kandi ihagarike ruswa yoretse icyo gihugu. Cyrille watangije urwo rwandiko yavuze ko rugamije “kwerekana akababaro k’Abanya-Liban kuri Leta yabo”.

Asubiza kuri ibyo bibazo, Macron yavuze u Bufaransa butagamije kuyobora Liban, ati “Ntibishoboka kunsaba gusimbura abayobozi banyu. Ntibishoboka kandi ntibyanaba igisubizo. Ni inshingano zanyu kwandika amateka yanyu”.

Icyizere cya Macron imbere mu Bufaransa gikomeje kuzamuka, aho cyageze kuri 50% bwa kabiri mu myaka ibiri ishize. Abakurikirana politike y’u Bufaransa bemeza ko iki gikorwa na cyo kizamwongerea igikundiro mu gihe akomeje urugamba rwo kwitegura matora ateganyijwe mu 2022.

Perezida Macron yasabwe na benshi mu baturage ba Liban kubafasha mu guhindura imiyoborere y'icyo gihugu

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .