00:00:00 IGIHE NETWORK KN KINYARWANDA EN ENGLISH FR FRANCAIS

Ibitaravuzwe ku mugambi wanuganuzwe wo guhirika Perezida Tshisekedi

Yanditswe na Musangwa Arthur
Kuya 21 August 2022 saa 11:50
Yasuwe :

Muri Gashyantare nibwo byamenyekanye ko Perezida Félix Tshisekedi yavuye igitaraganya i Addis-Abeba muri Ethiopia, aho yari yitabiriye inama ya 35 y’abakuru b’ibihugu bigize Ubumwe bwa Afurika (AU).

Yatashye bwangu mu gihe uwari umujyanama we mukuru mu by’umutekano, François Beya, yahatwaga ibibazo n’urwego rushinzwe iperereza, ANR, ku byaha birimo gushaka kugirira nabi ubutegetsi.

Beya yafunzwe ku wa 5 Gashyantare aregwa ibyaha byinshi kandi bikomeye. Icyakora, ku wa 16 Kanama yarekuwe by’agateganyo ku mpamvu z’uburwayi. Ubu ari i Paris mu Bufaransa, aho yagiye kwivuza.

Beya akurikiranywe hamwe na Colonel David Cikapa wari ushinzwe porotokole (protocole) ye, umujyanama we wihariye Guy Vanda, Brigadier Tonton Twadi Sekele, Commissaire supérieur Principale Lily Tambwe Mauwa na Lieutenant-colonel Pierre Kalenga Kalenga.

Urubanza rwe ruhishura byinshi ku bikorwa ashinjwa, birimo uburyo ibihugu bya Tanzania na Zimbabwe bishinjwa kuba inyuma y’umugambi wo guhitana Tshisekedi.

Ni ibirego bikubiye mu nyandiko z’ibazwa rye Beya muri ANR, zabonywe na Jeune Afrique.

Zigaragaza ko hagati ya tariki 28 Gashyantare na 7 Gicurasi, François Beya yumviswe nibura inshuro cumi. Ku nshuro zitandukanye, yumviswe hari umuyobozi mukuru wa ANR, Jean-Hervé Mbelu Biosha, yanagize uruhare mu gushyiraho mu 2019.

Muri ayo mabazwa yose, abagenzacyaha babajije Beya ku mubano we na Joseph Kabila wahoze ayobora icyo gihugu, anabazwa ku mugambi wo guhirika Tshisekedi no kwiharira amakuru.

Yashinjwe ko ajya gufatwa, Beya yari akomeje kurengera cyane inyungu za Joseph Kabila, wabanje kumugira umuyobozi w’Urwego rw’abinjira n’abasohoka (DGM), mbere yo kuba umujyanama wa Tshisekedi.

Mu ibazwa ryo ku wa 14 Werurwe, Beya yabwiye abamuhataga ibibazo ati "Kabila ntabwo ari umuyobozi wanjye! Ibiganiro byose twagiranaga byakozwe kinyamwuga, kandi perezida yari abizi, abikurikirana."

Yavuze ko baherukaga kuvugana ubwo yashakaga icyemezo cyo kujya muri Afurika y’Epfo. Beya ngo ni we wemezaga ingendo ze mu mahanga, abihawemo uburenganzira na Tshisekedi.

Afurika y’Epfo akomeje kugenda igarukamo nk’ibihugu bihozwaho ijisho cyane nk’ibirindiro bya Kabila n’umuvandimwe we Zoé Kabila, kimwe n’ibihugu bya Zimbabwe na Tanzania.

Umugambi wo guhirika Tshisekedi

Inyandiko zigaragaza ko mu nshuro eshatu zitandukanye, abakozi ba ANR babajije Beya amakuru yari afite ku "mugambi wo guhirika umukuru w’igihugu wateguriwe muri Tanzania na Guverinoma y’icyo gihugu, Joseph Kabila na bamwe mu basirikare."

Beya ngo yaje gusubiza ko nta makuru na make yigeze abifiteho. Ikindi gihugu cyagarutsweho ni Zimbabwe, bikekwako ko cyahungiyemo Général John Numbi wahoze ari umuntu wa hafi wa Kabila.

Uyu musirikare washyiriweho impapuro zo kumuta muri yombi, ashinjwa kwinjiza "bamwe mu bahoze ari abasirikare muri batayo Simba baba muri Angola na Namibia, kugira ngo bahirike ubutegetsi buriho."

Ba maneko bashinje François Beya ko mu ibanga rikomeye, yagiye muri Zimbabwe muri Gicurasi 2021 mu gihe byari bizwi ko agiye i Bangui, maze ahura na Gen Numbi.

Inyandiko zabonywe zigaragaza ko uko gukekwa kwashingiwe ku buhamya bw’umusirikare mukuru utaratangajwe umwirondoro.

Uwo musirikare wabajijwe guhera mu 2021, yemeye ko yakomeje kuvugana na Gen Numbi ndetse afasha mu guhuza Numbi na Beya, wamwijeje kuzamusura.

Icyo gihe ngo yavuze ko colonel uba i Harare yahawe inshingano zo kumwakira agezeyo, akamugeza ku rugo rwa Gen Numbi.

Beya yabiteye utwatsi, avuga ko aheruka muri Zimbabwe ahagana mu 2000, kandi ngo ntiyari kujyayo umukuru w’igihugu atabizi.

Yavuze ko uwo musirikare ari umushinjabinyoma washyizweho n’umuyobozi mukuru wa ANR, Jean-Hervé Mbelu.

Yasabye ko hagenzurwa ingendo ze na pasiporo ye, kugira ngo bigaragare neza ko atigeze ajya i Harare.

Ku bijyanye no kuvugana na John Numbi, yavuze ko batongeye kuvugana kuva yahunga igihugu.

Ati "John Numbi yamfataga nk’umwanzi we." Icyo gihe yabarizwaga muri gereza ikomeye ya Makala, yoherejwemo ku wa 4 Mata.

Yakomeje ati "Kugambanira umuvandimwe wanjye, oya!"

Beya ahubwo yavuze ko arimo kuzira agatsiko kamugambaniye, ko akomeye kuri Tshisekedi kandi ko ariko bizakomeza atari no mu kazi.

Yanashinjwe ko ari umwe mu bagize uruhare mu gushyiraho ihuriro Union sacrée nyuma y‘ugushwana kwa Kabila na Tshisekedi, ariko ngo asa n’aho ritakimushishikaje.

Yasubije ati "Nakoreye Mobutu Sese Seko, nkorera Kabila, uyu munsi kugambanira umuvandimwe wanjye, oya!"

"Kubera uburyo nakuze, ntabwo nshobora gutuka umuntu, noneho perezida Tshisekedi, we hanze y’inshingano ze ni n’umuvandimwe nzi kuva kera. Anshyiraho, nungukiye ku rukundo rwe n’icyizere. Ntabwo mbona ukuntu nagambanira umuntu nka we."

Yabajijwe ku mikoranire na CIA no kwikubira amakuru

Inyandiko zabonywe kandi zigaragaza ko mu kumuhata ibibazo, Beya yanabajijwe ku nyandiko zafatiwe mu rugo rwe, zirimo ngo izagaragaje ko yagizwe umwe muri ba maneko b’Urwego rw’iperereza rwa Leta zunze ubumwe za Amerika, CIA.

Yasubije ati "Ntabwo ndi umwe mu bakozi ba CIA, ariko habaho imikoranire hagati y’inzego."

Uyu mugabo wari ushinzwe guhuza amakuru y’iperereza akayageza kuri Tshisekedi, yanashinjwe ko hari amwe yagumanaga.

Harimo urugendo ngo Kabila yagiriye i Bukavu ku itariki itaratangajwe, ashishikariza urubyiruko kwikiza Tshisekedi, amugaragaza nk’umuntu udashoboye yashyize ku buyobozi atabikwiye.

Nyamara, Beya we yavuze ko "Kuva yava mu nshingano, [Kabila] atigeze ajya i Bukavu." Yahamije ko we ubwe ndese na Tshisekedi, bakurikiraniraga hafi ingendo z’uwamubanjirije.

Mu bindi bibazo Beya yabajijweho, harimo ibijyanye n’umutekano wa Tshisekedi.

Mu ibazwa rya mbere ryo ku wa 28 Gashyantare muri ANR, hagarutswe ku ruzinduko Tshisekedi yagiriye muri Grand Kasaï mu Ukuboza 2021.

Mu itsinda rya Perezida ngo hagaragayemo abanyamahanga barimo abanya-Liban babiri, bari bateje ikibazo ku mutekano.

Beya ariko yavuze ko umwe yari umukanishi w’imodoka za perezida, undi akaba inshuti y’umuhungu we.

Ikindi kirego, ngo Perezida Tshisekedi yaje kumara amasaha atanu mu muhanda wa Kabinda, adafite uburyo na bumwe bw’itumanaho.

Beya yavuze ko yabimenye, ahita amenyesha umuyobozi w’ibiro bya gisirikare mu ngoro y’umukuru w’igihugu, Général Franck Ntumba, ko iyo nzira idashoboka, ahubwo bibaye byiza Tshisekedi yakoresha kajugujugu, ariko ngo asanga yamaze kugenda.

Beya ngo yavuganaga bya buri kanya n’abasirikare barimo Général Ntumba, Général Christian Tshiwewe ukuriye umutwe ushinzwe kurinda Tshisekedi (Garde républicaine) na Général Célestin Mbala, umugaba mukuru wa FARDC.

Mu gihe cy’ibazwa, umwe mu bamuhataga ibibazo ngo yamubajije ko hamaze iminsi havugwa imigambi yo guhitana perezida, niba yarigeze abimumenyesha n’ingamba zidasanzwe zafashwe.

Icyo gihe yemeje ko yabiganiriye na Général Ntumba, aramusubiza ati "Papa, ntugire ikibazo, ndimo kubigenzura."

Ngo yanabiganirije umuyobozi w’umutwe ushinzwe kurinda perezida, na we amwizeza ko bakomeza kubyitaho.

Beya yanashinjwe ko yakoresheje inzego z’umutekano mu nyungu ze bwite, aho yajyanye bamwe mu bashinzwe umutekano mu rugo rwe bwite, i Mitendi mu nkengero za Kinshasa.

Abakozi ba ANR ngo baje kujyayo gusaka, basangamo imbunda zirindwi zo mu bwoko bwa AK47.

Izo ntwaro ngo zakuwe aho hantu ku wa 10 Werurwe. Beya yasubije ati "Nta kintu na kimwe nzi kuri izo mbunda muvuga za AK47."

Mu ibazwa kandi, ngo banashatse kumenya byinshi ku muzigo wari ugenewe inama nkuru y’umutekano ya Congo (CNS), wakiriwe mu Ukuboza 2020 na David Cikapa, wari umuyobozi ushinzwe protocole ya François Beya, bareganwa muri iyi dosiye.

Ni umuzigo warimo ibikoresho bya gisirikare byatanzwe n’ikigo Morane Tactical cyo mu Bubiligi.

Harimo imyenda itatu ya gisirikare, inkweto za botine (bottines), imikandara ibiri n’ikoti (gilet) ridatoborwa n‘amasasu, ingofero n’umupira.

Cikapa yabajijwe n’iperereza rya gisirikare ku wa 31 Ukuboza 2020 ndetse arafungwa.

Icyakora abakora iperereza bavuga ko yaje kurekurwa ku itegeko rya François Beya, ibintu we atemera.

Ati "Nashatse kumenya imiterere ya dosiye, nyuma y’iminsi mike ararekurwa, ariko nta tegeko natanze iryo ariryo ryose."

Cikapa yatanze ubuhamya ko uyu mujyanama wa Tshisekedi nta kintu yari azi kuri iyo myambaro ya gisirikare.

Ku ruhande rwa Beya, we ashidikanya ko kuri wa muzigo hari hananditseho ko ugenewe inama nkuru y’umutekano ya RDC.

François Beya yarekuwe nyuma y'amezi menshi muri gereza
Joseph Kabila avugwa mu mugambi wo gushaka guhirika Tshisekedi wamusimbuye

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .