2019: Umwaka w’amarira n’imiborogo mu birindiro by’abarwanya u Rwanda

Yanditswe na Musangwa Arthur
Kuya 16 Ukuboza 2019 saa 10:29
Yasuwe :
0 0

Umwaka wa 2019 usa n’utazasibangana mu mitwe yitwa ko irwanya Guverinoma y’u Rwanda, kuko usize abo udahitanye imigambi yabo iri mu kangaratete ndetse abandi bari mu mazi abira, kuko isaha iyo ari yo yose ibintu byabahindukiraho.

Kuva mu myaka ishize, umutwe wavugwaga cyane wari FDLR kuva mu myaka ya 2000, aho yashinzwe n’abagize uruhare muri Jenoside yakorewe Abatutsi mu 1994. Habanje gushingwa RDR, haza ALIR 1 na ALIR 2, nyuma yo kuba FDLR baza gutandukana havuka CNRD na RUD-Urunana.

Magingo aya FDLR na RUD Urunana ni imitwe ikomeje kubangamira umutekano w’u Rwanda, nubwo nayo itorohewe muri uyu mwaka urimo kugana ku musozo.

Umuyobozi wa FDLR yaguye muri gereza abandi bagwa mu bihuru

Muri Mata 2006 nibwo Dr Ignace Murwanashyaka wayoboraga FDLR yafatiwe mu Majyepfo y’u Budage avuye gusura abarwanyi muri RDC. Mu 2015 urukiko rwa Stuttgart rwamuhamije ibyaha hamwe na Straton Musoni wari umwungirije.

Muri Mata 2019 nibwo inkuru yabaye kimomo ko Murwanashyaka yaguye muri gereza atarangije igifungo cy’imyaka 13 yakatiwe, maze urwamutwaye rutangira kototera abamukoreye mu ngata.

Bidateye kabiri, muri uko kwezi kwa Mata nibwo Nsekanabo Jean Pierre uzwi nka Lt. Col Abega Kamara wari ushinzwe iperereza muri FDLR na Nkaka Ignace uzwi nka La Forge Fils Bazeye wari umuvugizi wayo, bagejejwe imbere y’urukiko kugira ngo baburane ku ifungwa n’ifungurwa ry’agateganyo.

Abo bombi inkuru y’ifatwa ryabo yabaye kimomo mu Ukuboza 2018, ko bafatiwe ku mupaka wa Bunagana bavuye muri Uganda mu nama yabaye hagati ya tariki 15-16 Ukuboza, yahuje abahagarariye RNC ya Kayumba Nyamwasa na FDLR.

Bivugwa ko byari ku butumire bw’ubuyobozi bwa Uganda, hagamijwe kunoza umubano hagati y’iyo mitwe y’iterabwoba n’inzego za gisirikare za Uganda no kunoza imikoranire mu migambi yo guhungabanya umutekano w’u Rwanda.

Umunyamabanga wa Leta muri Uganda ushinzwe ubutwererane bw’akarere, Philemon Mateke, byatangajwe ko ari we wari umuhuza wabo, na we uyu mwaka umusize atorohewe kuko nubwo Perezida Yoweri Museveni akomeje kumuryamaho, amakuru y’iperereza akomeje kumushyira hanze ko yari n’inyuma y’igitero abarwanyi ba RUD Urunana bagabye i Musanze ahazwi nko mu Kinigi mu ijoro ryo ku wa 4 Ukwakira, kigahitana abaturage 14.

Ibya FLN byasubiwemo

Umwaka ushize waranzwe n’ibitero binyuranye byagiye byigambwa n’umutwe wa FLN, wari ufite Nsabimana Callixte wiyise Sankara, nk’umuvugizi wawo.

Muri Nyakanga 2018 abantu bitwaje intwaro zirimo n’imbunda bateye abaturage mu Murenge wa Nyabimata babasahura amatungo, ibiribwa, imyenda n’amafaranga. Mu ijoro ryo ku wa 19 Kamena 2018 nabwo abantu bitwaje imbunda, bishe barashe abantu babiri muri Nyaruguru, bakomeretsa batandatu barimo n’Umunyamabanga Nshingwabikorwa w’Umurenge wa Nyabimata, Nsengiyumva Vincent, batwika n’imodoka ye na moto y’umuturage.

Mbere yaho tariki ya 10 Kamena 2018, amabandi yitwaje intwaro gakondo hamwe n’imbunda, yateye abaturage bo mu Murenge wa Ngera mu Karere ka Nyaruguru arabakomeretsa abatwara n’imitungo irimo amafaranga, televiziyo, inkweto n’ibindi. Ibyo bitero byatangiye kujya byigambwa n’umutwe wa FLN, mu ijwi rya Nsabimana Callixte nk’umuvugizi.

Muri Mata 2019 nibwo inkuru yabaye kimomo ko Nsabimana yafatiwe muri Comores. Ubwo yagezwaga imbere y’urukiko ku wa 23 Gicurasi 2019, Nsabimana yabwiye urukiko ko nta byinshi afite byo kwireguza kuko ibyaha 16 akurikiranyweho bimwe yabikoze ku giti cye ibindi bigakorwa n’umutwe yari abereye umuvugizi.

Ubu afunzwe by’agateganyo mbere yo gutangira kuburana mu mizi, aregwa ibyaha birimo iremwa ry’umutwe w’ingabo ritemewe, Icyaha cy’iterabobwoba ku nyungu za politiki, gukora no kugira uruhare mu bikorwa by’iterabwoba, gutanga amabwiriza mu gikorwa cy’iterabwoba, kuba mu mutwe w’iterabwoba, icyaha cyo kugambana no gushishikariza abandi gukora iterabwoba n’ibyaha by’ubwicanyi n’ubwinjiracyaha bw’ubwicanyi.

Aregwa kandi gufata bugwate, gukwiza amakuru atariyo cyangwa icengezamatwara rigamije kwangisha leta y’u Rwand amu bihugu by’amahanga, guhakana Jenoside, kwiba yitwaje intwaro, gutwika, kugirana umubano na leta y’amahanga hagamijwe gushoza intambara, gukora cyangwa gukoresha impapuro mpimbano, gukubita no gukomeretsa ku bushake no gutanga, kwakira no gushishikariza kwakira ibikomoka ku iterabwoba.

Amakuru ataremezwa ahamya ko Herman Nsengimana wasimbuye Nsabimana muri FLN, na we mu minsi ishize yacakiriwe mu mashyamba ya RDC hamwe n’abandi barwanyi benshi.

Abakuru ba FDLR bishwe umusubizo

Muri Nzeri 2019 nibwo Ingabo za Repubulika ya Demokarasi ya Congo, FARDC, zemeje ko zishe Lieutenant General Sylvestre Mudacumura wayoboraga umutwe wa FDLR, yicirwa mu gace ka Bwito mu Ntara ya Kivu y’Amajyaruguru.

Nyuma y’iminsi mike, nibwo FARDC, binyuze mu bikorwa byiswe ‘Sokola 2’ yeretse itangazamakuru bane mu barwanyi ba FDLR, bahoze ari abarinzi ba Gen Mudacumura.

Mudacumura yahoze mu Ngabo z’u Rwanda mbere ya Jenoside yakorewe Abatutsi mu 1994, yabaye mu mutwe w’abarindaga Perezida Juvenal Habyarimana ndetse yari umuyobozi wungirije wawo.

Nyuma yo gutsinda urugamba rwo kubohora igihugu n’ingabo zari iza RPA, Gen Mudacumura na bagenzi be bafashe iy’ishyamba, aho bakoreye ibyaha ndengakamere ku baturage bo mu Burasirazuba bwa RDC.

Mbere yo kwicwa, Mudacumura yashakishwaga n’urukiko mpuzamahanga mpanabyaha akekwaho ibyaha icyenda byiganjemo iby’intambara n’iyicarubozo yakoze hagati y’umwaka wa 2009 na 2010. Yagizwe Umugaba Mukuru w’Ingabo za FDLR nyuma y’itahuka rya rya General Paul Rwarakabije wawuyoboraga mbere ye.

Urukiko Mpuzamahanga mpanabyaha rw’i La Haye mu Buholandi rwamushyiriyeho impapuro zisaba ko atabwa muri yombi 13 Nyakanga 2012. Gusa yari atarafatwa.

Isasu ryavuze mu birindiro bya P5

Umutwe wa P5 umaze igihe ufite ibirindiro mu mashyamba ya RDC, ni umwe mu itarahiriwe n’imigambi yo gutera u Rwanda, nyuma yo gushingwa n’ihuriro ry’amashyaka atanu ariyo Amahoro People’s Congress, Forces Démocratiques Unifieés – Inkingi (FDU-Inkingi); People’s Defence Pact-Imanzi (PDP-Imanzi), Rwanda National Congress (RNC) na PS Imberakuri ya Bernard Ntaganda, maze uragizwa Kayumba Nyamwasa.

Uyu mutwe Kayumba aheruka kuwusaba kuvana abarwanyi bawo muri Kivu y’Amajyepfo ngo wegere umupaka wa Uganda aho bivugwa ko wari wizeye guhabwa inkunga ifatika kurusha izo wahabwaga uri hafi y’u Burundi, ariko inzira ntiyabwira umugenzi.

Ku wa 19 Mata ngo nibwo bimutse, bageze Kalehe bahura n’umutwe wa MRCD uyoborwa na Gen Irategeka, bababwira ko ngo bo batangiye akazi muri Nyungwe.

Bamaze kuruhuka ngo bakomeje urugendo "rutabahiriye na gatoya," kuko bageze muri Gatoyi i Masisi, bahuye n’ibico byinshi bya FARDC, bararaswa, bamwe bafatwa mpiri abandi bishyikiriza Monusco.

Ubwo bari imbere y’urukiko i Kigali, abenshi bahurizaga ku kuvuga ko bashyikirijwe u Rwanda ku wa 18 Kamena 2019, nubwo hari abo byamenyekanye ko batashye bucece bakanagera mu kigo kinyuzwamo abavuye ku rugerero i Mutobo, ariko mu iperereza bikaza gutahurwa ko urugendo rwabo rutacukirizwa aho, berekezwa mu nkiko.

Ubu abarwanyi 25 bayobowe na Rtd Major Mudathiru Habib bari kuburanira mu rukiko rwa gisirikare mu Rwanda, ndetse uyu we yarashwe ukuguru ku buryo kwangiritse bikomeye, ariko ntabura kurandatwa n’ingabo z’u Rwanda yiteguraga kugabaho igitero.

Gen Musabyimana wa RUD Urunana yarishwe

Mu ijoro ryo ku wa 4 Ukwakira rishyira ku wa 5 Ukwakira 2019, abagizi ba nabi biganjemo abitwaje intwaro gakondo bateye mu Murenge wa Kinigi mu Karere ka Musanze bica abaturage 14 abandi barakomereka.

Ku wa 6 Ukwakira nibwo Polisi y’u Rwanda yatangaje ko inzego z’umutekano zishe abagizi ba nabi 19 ndetse abandi batanu mu bagabye icyo gitero, bafatwa mpiri.

Nyuma y’urupfu rw’abambari be, ku wa 10 Ugushyingo 2019 Gen Musabyimana Juvenal uzwi nka Jean Michel Africa wayoboraga RUD Urunana, yishwe na FARDC.

Uyu yaguye mu gitero gikomeye FARDC yagabye mu gace ka Binza hafi y’umupaka w’iki gihugu na Uganda. Uyu mugabo wabaye mu ngabo za ex-FAR, yari umwe mu barwanyi b’umutwe wa FDLR/FOCA mbere y’uko ucikamo ibice akajya muri RUD-Urunana.

Vuruguvurugu muri RNC

Mu gihe abiyemeje gufata intwaro ngo barwanye u Rwanda bakomeje gutikira umunsi ku munsi, abibumbiye mu mutwe w’iterabwoba wa RNC nabo umwaka wa 2019 ubasize ahabi.

Uyu mwaka usize mu rungabangabo umuryango wa Benjamin Rutabana, wabuze kuva muri Nzeri ubwo yajyaga mu bikorwa by’uwo mutwe muri Uganda, ugashinja Kayumba Nyamwasa n’abandi bayobozi ba RNC kuba inyuma y’ibura rye.

Rutabana ngo yahagurutse i Bruxelles ku wa Gatatu tariki 4 Nzeri 2019 agana Entebbe muri Uganda. Yabanje guhagarara i Dubai mbere yo kugera ku kibuga cy’indege cya Entebbe ku wa 5 Nzeri saa 13:50. Yakomeje kuvugana kuri telefoni n’umugore we Diane Rutabana, ku wa 8 Nzeri ntiyongera kumva ijwi rye.

Amakuru ahamya ko Rutabana yagiranye ubwumvikane buke na bagenzi be b’abayobozi muri RNC kuko yarakajwe n’uko abarwanyi ba P5 bari mu nkiko i Kigali, mu gihe ubwo bajyaga gutabwa muri yombi, Kayumba yahaye itegeko Major Habib Mudathiru wari ubayoboye kubavana muri Kivu y’Amajyepfo bakajya ku mupaka wa Uganda, aho bazahabwa inkunga zihagije kurusha izo bahabwaga hafi y’u Burundi.

Icyo gihe ngo Kayumba yarenze ku nama zatanzwe na Rutabana, nyamara abo barwanyi bajya kwimuka, barakoresheje $12000 yoherejwe na Ben Rutabana kuri Western Union i Bujumbura.

Uburakari bwa Rutabana agashaka kwaka ibisobanuro Kayumba wagushije ingabo zabo mu biganza by’uwo bahanganye, ngo byaba impamvu yatumye ashaka ‘kumwumvisha’, kuko umusirikare muto yari ashatse kubaza byinshi ‘Jenerali’, ndetse bikekwa ko ubwo Rutabana yajyaga muri Uganda yari agiye mu bikorwa bya gisirikare, arenze ku gushaka kwa Kayumba.

Hejuru y’ibyo, bamwe mu bayobozi ba RNC muri Canada baheruka guhambirizwa bashinjwa gusuzugura ubuyobozi bukuru bw’ishyaka.

Mu birukanwe muri RNC harimo Simeon Ndwaniye wari Umuhuzabikorwa w’akarere ka Windsor na Jean Paul Ntagara wari Umuhuzabikorwa wungirije w’Intara ya Canada akaba n’umubitsi wayo, wari uherutse guhagarikwa ashinjwa gufatira umutungo w’ihuriro.

Harimo kandi Achille Kamana wari komiseri ushinzwe ubukangurambaga mu ntara ya Canada akaba n’umuhuzabikorwa w’akarere ka Ottawa-Gatineau, na Tabitha Gwiza wari komiseri ushinzwe abari n’abategarugori mu ntara ya Canada n’umubitsi mu karere ka Windsor.

Uyu Gwiza ni mushiki wa Ben Rutabana waburiwe irengero wari na komiseri ushinzwe kongera ubushobozi muri RNC, bakaba abavandimwe ba Adeline Rwigara.

Gwiza avuga ko kugeza ubu ikibazo cy’ibura rya Rutabana ahinduka umwanzi muri RNC, ku buryo urebye uko abakuru muri RNC babyitwaramo, ubona ko ari bo bari hejuru y’ibura rya Ben Rutabana.

Kugeza ubu amakuru anakomeje kuvugwa ko Kayumba Nyamwasa na we yaba atorohewe ku buyobozi bwa RNC, ku buryo isaha n’isaha ashobora kwirukanwa ku buyobozi bw’uyu mutwe mu bijyanye n’igisirikare, kimwe n’abandi bafatanya kuyobora.

Ntabwo ikibazo kirarangira

Nubwo hari abagerageje guhungabanya umutekano bakabyishyurira ikiguzi kiri hejuru, bigaragaza ko urugendo rukiri rurerure, ku buryo inzego zishinzwe umutekano ari ngombwa kugarira zigakomeza.

Umutwe wa FDLR uheruka kwimika Pacifique Ntawunguka "Omega". Mu kiganiro yahaye urubyiruko rugera kuri 200 rubarizwa mu muryango w’abanyeshuri barokotse Jenoside yakorewe Abatutsi mu 1994, mu 2016, Umujyanama wa Perezida wa Repubulika mu by’umutekano, Gen James Kabarebe, yahishuye uburyo Gen Ntawunguka wamubwiye ko azagaruka mu Rwanda ari uko nta mututsi ukirurimo.

Hari kandi n’umuyobozi mukuru wa FDLR, Gen Byiringiro Victor Rumuli bakunze kwita Victor Rumuri cyangwa Michel Byiringiro.

Uretse abo, mu minsi ishize nibwo Faustin Twagiramungu uba mu Bubiligi, yumvikanye ashishikariza abantu batandukanye kwinjira mu mitwe irwanya Leta y’u Rwanda, aho ubu ari umwe mu bayobozi b’ihuriro MRCD rifite umutwe wa FLN. Ni umutwe ahuriramo na Paul Rusesabagina wamenyekanye kubera Hotel Rwanda.

Ku wa Gatanu nibwo Perezida wa Repubulika ya Demokarasi ya Congo, aho iyi mitwe yose yabonye urubuga rwo gucura imigambi yayo, Felix Tshisekedi, yatangarije Inteko Ishinga amategeko ko mu bikorwa byo kurwanya imitwe yitwaje intwaro ikorera muri icyo gihugu, ingabo z’igihugu zimaze gufata abarwanyi 1712 b’umutwe wa CNRD.

Yavuze ko ubwo yageraga ku butegetsi, ibice bitandukanye by’igihugu byari byugarijwe n’ibikorwa by’imitwe yitwaje intwaro, ariko uyu munsi, kubera guhamagararira iyi mitwe gushyira intwaro hasi n’ibikorwa bya FARDC, amahoro amaze kugaruka muri Kasai, ndetse no muri Tanganyika ni mu gihe cya vuba.

Gusa ngo ikibazo gikomeye gisigaye mu majyaruguru mu bice bya Beni na Butembo, muri Ituri, mu bice bya Minembwe, Uvira, Baraka na Fizi, Shabunda na Kalehe.

Yakomeje ati “Ku baturuka Kalehe, ndashaka gushimira ingabo zacu zimaze gusenya 95% by’ibirindiro by’umutwe witwaje intwaro wa CNRD, aho abarenga 1712 bafashwe, barimo 245 bitwaje intwaro n’abayobozi 10 mu bya politiki b’uwo mutwe w’abagizi ba nabi.”

Yashimangiye ko ibikorwa Guverinoma ye yatangije byo gutsinsura imitwe yitwaje intwaro bidateze guhagarara, kugeza igihe iyi mitwe izavira burundu ku butaka bw’igihugu.

Ubwo Bazeye na Nsekanabo bari abayobozi muri FDLR bagezwaga imbere y'urukiko
Abantu bane barindaga Mudacumura barafashwe berekwa itangazamakuru
Muri Nzeri 2019 nibwo FARDC yemeje ko yishe Lieutenant General Sylvestre Mudacumura wayoboraga FDLR
Mudathiru wayoboraga abarwanyi ba P5 yafatiwe mu mashyamba ya RDC muri uyu mwaka
Rtd Maj Mudathiru hamwe n'abarwanyi 25 yari ayoboye ubu bari kuburanira mu rukiko rwa gisirikare mu Rwanda
Abarwanyi batanu mu bagabye igitero mu Kinigi bafashwe mpiri
Jean Michel Afurika wayoboraga RUD Urunana aheruka kwicwa na FARDC
Abarwanyi 19 mu bagabye igitero mu Kinigi bishwe n'inzego z'umutekano z'u Rwanda
Musoni Straton yaguye muri gereza mu Budage
Nsabimana Callixte aheruka kugezwa mu rukiko nyuma y'igihe avuga ko umutwe wa FLN urimo kugaba ibitero mu Rwanda

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Special pages
. . . . . .