{Urubanza rw’amateka, aho Umukuru w’Igihugu wa Mbere ukiri ku butegetsi yitabye Urukiko Mpuzamahanga Mpanabyahaba (ICC), Ubushinjacyaha bwagaragaje ko nta bimenyetso bihagije bishinja Perezida wa Kenya Uhuru Kenyatta.}

Kuri uyu wa Gatatu, Kenyatta yitabye urukiko, ariko nta jambo na rimwe yavuze. Steven Kay, Umwunganira mu mategeko yarubwiye ko umukiriya we yahisemo ko amusubiriza buri kibazo yabazwa. N'aho Umucamanza yamusabye kuvuga ngo "yego" cyangwa "oya", Kenyatta ntiyabumbuye umunwa, yazamuye akaboko amwereka ko Umwunganira ari we usubiza.

Ubushijacyaha bwagaragarije urukiko ko budafite ibimenyetso bihagije byo gushinja Uhuru Kenyatta ku byaha ashinjwa byibasiye inyokomuntu, busaba ko urubanza rwakwimurirwa igihe kitazwi.Ibi ariko, Uwunganira Kenyatta yabwiye urukiko ko niba nta bimenyetso bimushinja, ikirego gikwiye gukurwaho.

Ubushinjacyaha bwashinje Leta ya Kenya ko yanze gutanga amakuru ahagije, na Uhuru Kenyatta akabigiramo uruhare nk’uyiyoboye. Byongeye kandi, ngo abari gutanga ubuhamya batewe ubwoba.

Umucamanza w’Umuyapani Kuniko Ozaki wayobye urubanza yabajije Ubushinjacyaha igihe urubanza rwabera ruramutse rusubitswe, buvuga ko butatanga itariki, kuko butazi igihe Leta ya Kenya yazabufasha kwegeranya ibimenyetso.

Ubushinjacyaha bwagaragaje ko abatangabuhamya bagiye baterwa ubwoba muri Kenya, kandi ngo ntibwahawe uburyo bwo gukurikirana ibiganiro Kennyatta yagiye agira kuri telefone.

Uruhande rwunganira Kenyatta rwagaragaje ko nta na kimwe rutakoze mu kugaragaza ko ari umwere, kugeza n’aho berekanye amakonti ya banki akoreshwa na Kenyatta mu kugaragaza ko nta nkunga yateye imvurururu zakurikiye amatora yo mu 2007 nk’uko abishinjwa.

Urukiko ntirurafata umwanzuro ku byo ababuranyi bombi basabye.

Kenyatta ashinjwa kuba yaragize uruhare mu bwicanyi bushingiye ku moko bwakurikiye amatora y’Umukuru w’Igihugu mu 2007, kuko yarashyigikiye Mwai Kibaki watsinze amatora ariko Umukandida Raila Odinga akavuga ko amajwi yibwe.

Kenyatta na Kibaki baturuka mu muryango w’aba Kikuyu, ashinjwa ko yateye inkunga umutwe w’aba Kikuyu “Mungiki” ukica abo batavuga rumwe. Izo mvururu zaguyemo inzirakarengane zirenga 1000.

Perezida Kenyatta yahagurutse muri kenya nk'umuturage usanzwe.Yagiye ku kibuga cy'indege adaherekejwe bikomeye n'abashinzwe umutekano nk'uko bisanzwe. Mu kurengera ubusugire bw'igihugu ayoboye, Perezida Kenyatta yasigiye inshingano zo kuyobora igihugu Visi Perezida William Ruto.

Urukiko rwa ICC rwashinzwe muri 2002 rufite inshingano zo guhana ibyaha bya Jenoside n’ibyibasiye inyokomuntu. Kugeza ubu ariko rubonwa nk’igikoresho cya politiki, kuko mu bo rumaze guhamagaza hafi ya bose ari abo ku mugabane w’Afurika , bitavuze ko ahandi ari ba miseke igoroye.

[email protected]