{Ubucamanza bwa Misiri bwagize umwere Hosni Moubarak wahoze ayobora icyo gihugu ku byaha yaregwaga byo gutegeka kwica imbaga y’abigaragambyaga bamusaba kuva ku butegetsi mu mwaka wa 2011.}

Moubarak yagizwe umwere hamwe n’abandi batanu bari abayobozi bakuru bashinzwe umutekano barangajwe imbere na Habib al-Adly wahoze ari Minisitiri w’umutekano.

Ibiro ntaramakuru by’Abafaransa AFP bivuga ko Hosni Moubarak yaregwaga urupfu rw’abantu barenga 846 bishwe mu gihe cy’imyigaragambyo bashaka impunduramatwara mu Misiri mu mwaka wa 2011.

Iyo myigaragambyo yatumye ahirikwa ku butegetsi yari amazeho imyaka 30, yamaze iminsi 18 abaturage bahangana na polisi batwika bimwe mu biro byayo, polisi nayo irabarwanya yicamo benshi.

Jeune Afrique kivuga ko urukiko rwamugize umwere no ku byaha bya ruswa yashinjwaga ku bijyanye na Gaz Misiri yagurishije muri Isiraheri ku giciro gito ugereranije n’ibiciro biri ku isoko.

Uyu mukambwe w’imyaka 86 yaje mu rukiko n’indege avanywe mu bitaro bya gisirikare byo mu mujyi wa Cairo aho yari arwariye.

AFP itangaza ko uru rubanza rwagombaga kuba rwaraciwe tariki ya 27 Ugushyingo rukaza gusubikwa kuko umucamanza urushinzwe yavugaga ko atarangije gusoma amadosiye yarwo y’amapagi ibihumbi 2.

Muri Nzeli 2012 Hosni Moubarak yari yarakatiwe igifungo cya burundu ariko icyo cyemezo kiza guseswa rusubirwamo.