Uko umuhango wo gushyingura mu cyubahiro Padiri Rugirangoga Ubald wagenze (Amafoto na Video)

Yanditswe na Akayezu Jean de Dieu
Kuya 2 Werurwe 2021 saa 09:30
Yasuwe :
0 0

Ishavu n’agahinda byasaze Abanyarwanda n’inshuti zabo baherekeje bwa nyuma Padiri Ubald Rugirangoga uherutse kwitaba Imana, nyuma y’imirimo ikomeye yakoze yo gusana imitima ya benshi yari yarashegeshwe n’amateka ashaririye y’igihugu cyo kimwe n’ibibazo by’iyi Si.

Padiri Ubald yitabye Imana ku wa 7 Mutarama 2021 nyuma y’igihe yari amaze arwariye COVID-19 muri Leta Zunze Ubumwe za Amerika. Urupfu rwe rwaturutse ku bibazo by’ubuzima yasigiwe n’iki cyorezo.

Kuri uyu wa Kabiri tariki 2 Werurwe 2021, nibwo habaye umuhango wo kumusezeraho bwa nyuma no kumushyingura mu cyubahiro, mu Karere ka Rusizi ahazwi nko ku Ibanga ry’Amahoro.

Centre Ibanga ry’Amahoro, ni agasozi gaherereye mu Kagari ka Kamatita, Umurenge wa Gihundwe, Akarere ka Rusizi mu Burengerazuba. Ni muri Diyosezi Gatolika ya Cyangugu, Paruwasi Nkanka, Santarari Muhari. Ni agasozi gafite ubuso busaga hegitari 25 ndetse hari ibikorwa yagizemo uruhare.

Ibikorwa byo gusengera abarwayi bagakira indwara zitandukanye zirimo ibyorezo n’izindi zabaga zarabaye akarande, Padiri Ubald ntabwo yabikoreraga mu Rwanda gusa kuko n’umunsi yandura Coronavirus ari nayo yaje kugeza ku rupfu rwe yari amaze iminsi muri Amerika mu bikorwa by’amasengesho.

Uretse muri Amerika, Padiri Ubald yatumirwaga henshi mu bihugu by’amahanga mu bikorwa byo gusengera abarwayi no kubibutsa ko abantu bose ari bene mugabo umwe bakwiye kubana mu mahoro n’urukundo.

Ni nayo mpamvu umuhango wo kumuherekeza iyo bitaza kuba icyorezo cya COVID-19, wari kwitabirwa n’ingeri nyinshi z’abantu baturutse imihanda yose haba mu Rwanda no hanze yarwo.

Ababanye na we bose batanze ubuhamya bugaruka ku mirimo yakoze ndetse yashimiwe umurage yasigiye abakirisitu n’Abanyarwanda muri rusange ushingiye ku ndangagaciro yo guca bugufi no guharanira amahoro. Abo mu muryango we bakomoje ku buryo yababereye urugero rwiza rw’umuntu urangwa n’urukundo.

UKO IGIKORWA CYO GUSEZERA BWA NYUMA NO GUSHYINGURA MU CYUBAHIRO PADIRI UBALD CYAGENZE

-  Andi mafoto ubwo hashyirwaga indabo ku mva ya Padiri Ubald Rugirangoga

Abihayimana batandukanye bashyira umusaraba ku mva ya Padiri Rugirangoga Ubald
Padiri Ubald yashyinguwe hubahirizwa amabwiriza yo kwirinda Coronavirus arimo kwambara agapfukamunwa no gukaraba intoki hifashishijwe hand sanitizer
Umushumba wa Diyosezi ya Ruhengeri, Musenyeri Harorimana Vincent, ashyira indabo ku mva ya Padiri Ubald
Umuryango wa Padiri Ubald ushira indabo ku mva ye

13:00: Umuhango wo guherekeza Padiri Rugirangoga Ubald urahumuje. Isanduku irimo umubiri wa Padiri Ubald yururukijwe mu mva, hakurikiraho igikorwa cyo kuyishyiraho indabo.

Mbere yo gutwikira imva, Umushumba wa Diyosezi ya Gikongoro, Musenyeri Hakizimana Célestin wari umaze igihe ayobora iya Cyangugu yayoboye isengesho ryo gusabira umugisha Padiri Ubald, nyuma hakurikiraho imihango yo kumuha icyubahiro no kumushyingura.

Ubald Rugirangoga aruhukure mu mahoro!

Hari hateguwe indabo zo gushyira ku mva ya nyakwigendera
Uyu muhango witabiriwe n'abihayimana benshi
Isanduku irimo umurambo wa nyakwigendera yururutswa mu mva
Padiri Rugirangoga Ubald yasezeweho avugwa imyato kubera umuhamya bwiza n'umurage yasize
Padiri Rugirangoga Ubald yashyinguwe mu Karere ka Rusizi ku Ibanga ry’Amahoro
Benshi bafashwe n'ikiniga bararira ubwo baherekezaga Padiri Ubald
Kubura uwo wakundaga birababaza...
  • Igitambo cya misa kirahumuje!

12:25: Mu butumwa Musenyeri Hakizimana yasomeye abitabiriye iki gitambo cya Misa yavuze ko “Tugiye guhamba umubiri wagenewe gupfa w’umuvandimwe wacu Padiri Ubald Rugirangoga.”

Yakomeje agira ati “Dusabe Imana izamuzure afite imbaraga, imushyire mu mubare w’abatowe, izamugirire impuhwe ku gihe cy’urubanza kugira ngo azasenderezwe ibyishimo bidashira.”

Nyuma yo gusoza igitambo cya Misa yo gusezera kuri Padiri Ubald, isanduku irimo umurambo we igiye kujyanwa aho agomba gushyingurwa mu mbuga ya ‘Centre Ibanga ry’Amahoro’.

Mbere yo kururutswa mu mva, umubiri we wabanje guterwa ‘Ububani’ ahabwa umugisha aherekezwa yifurizwa kuzazuka nka Lazaro.

Bamuherekeje baririmba indirimbo imenyerewe mu guherekeza abitabye Imana ivuga ko ’Twaremewe kuzajya mu Ijuru”.

Musenyeri Hakizimana Célestin yasabye abakirisitu by’umwihariko abihayimana kugera ikirenge mu cya Padiri Ubald
  • Ubutumwa bwa Musenyeri Hakizimana

12:20: Igitambo cya Misa yo gusezera kuri Padiri Ubald cyitabiriwe n’Abepiskopi Gatolika batatu barimo Musenyeri Sinayobye Edouard uherutse kugirwa Umushumba wa Diyosezi ya Cyangugu ari nayo nyakwigendera yabarizwagamo.

Hari kandi Umushumba wa Diyosezi ya Ruhengeri, Musenyeri Harorimana Vincent ndetse n’Umushumba wa Diyosezi ya Gikongoro, Musenyeri Hakizimana Célestin [ni nawe wari umaze igihe ayobora iya Cyangugu nyuma y’urupfu rwa Musenyeri Bimenyimana Jean Damascène].

Musenyeri Hakizimana wavuze mu izina rya bagenzi be, yihanganishije abo mu muryango wa Ubald, abakirisitu, Abanyarwanda n’inshuti zabo by’umwihariko abari bafitanye igihango na Padiri Ubald.

Yasabye abakirisitu by’umwihariko abihayimana basigaye kugera ikirenge mu cya Padiri Ubald bakanagerageza kusa ikivi yari yaratangiye haba mu byo gusengera abarwayi bagakira ndetse no kuba umusamburo w’ubumwe n’ubwiyunge.

Yavuze ko “Tuzibe icyuho asize maze aho ari azajye yishimira ko yasize abagabo, yasize intwari zakomeje ndetse zikanonosora ibikrowa bye byo gukiza abarwayi.”

Musenyeri Hakizimana yashimiye kandi Ketsey Long [uyu yanahawe urwibutso azajya yibukiraho Padiri Ubald], abitwa Les Amis d’Ubald ndetse n’abandi bantu batandukanye by’umwihariko abafashije kugira ngo umubiri wa Padiri Ubald ugere mu Rwanda.

  • Ubutumwa bw’uhagarariye Leta

12:00: Umuyobozi w’Akarere ka Rusizi, Kayumba Ephrem, ari nako karere umuryango wa Padiri Ubald ukomokamo, yagaragaje ko urupfu rwa nyakwigendera nubwo rubabaje ariko hari igishimishije muri rwo.

Yagize ati “Ndagira ngo aka kanya twese twishime! Impamvu ni uko arwaye twarabimenye, amaze kwitaba Imana agahinda karatwica ariko nyuma twasigaye twibaza ngo azashyingurwa hehe?”

Yakomeje agira ati “Niyo mpamvu aka kanya twakwishima ariko tukanashimira ababigizemo uruhare bose kugira ngo uyu munsi none ube ubereye hano ku Ibanga ry’Amahoro. Twese nk’abakirisitu cyangwa Abanyarwanda dufite agaciro ariko twatakaje umuntu w’ingenzi.”

Meya Kayumba yavuze ko Ubald yagiriye igihugu akamaro by’umwihariko akaba azibukwa mu bikorwa bya Sinodi Gacaca ya Gikirisitu kandi na nyuma yabyo akaba yarakomeje urugendo rw’ubumwe n’ubwiyunge.

Yakomeje avuga ko ibikorwa yakoze, Umushumba uherutse kuragizwa Diyosezi ya Cyangugu, Sinayobye Edouard, akwiye guharanira ko byasigasigwa bityo Cyangugu igakomeza imihigo kandi n’ubuyobozi buzabigiramo uruhare.

Ati “Ubu ngubu Diyosezi ya Cyangugu irazwi ahantu hose kubera ibikorwa yayikoreyemo, birimo n’ibyo umuvandimwe we yavuze. N’ubwo Ubald yagiye ndizera ko Cyangugu izakomeza kwandika amateka yayo mu kunga Abanyarwanda.

Yakomeje agira ati “Natwe nk’ubuyobozi ubufatanye ntabwo buzahwema, bugomba gukomeza kubakira kuri iyo ntambwe yatangiriye mu bihe bikomeye ariko bikaba bigeze aho bishoboka.”

Umuyobozi w’Akarere ka Rusizi, Kayumba Ephrem, yavuze ko nyuma y’urupfu rwa Padiri Ubald benshi bibazaga aho azashyingurwa ariko basubije agatima impembero ubwo yazangwaga ku Ibanga ry’Amahoro
  • Meya Kayumba na Ubald bafitanye amateka!

Kayumba yavuze ko azi cyane Ubald kuko ubwo yabyirukaga yari Umusaseridoti muri Paruwasi ya Nyamasheke ku buryo ajya no kwigira amasakaramentu icyo gihe yari ahari.

Avuga ko ikintu azi gikomeye kuri Ubald, ari uko yangaga urunuka ubunebwe aho buva bukagera ku buryo atakundaga umwana ufite ibyo byose.

Ati “Ku bana bato twibuka Ubald nk’umuntu utarakundaga ubunebwe cyangwa ubujiji, murabizi ko icyo gihe Kiliziya ntabwo zari nyinshi ariko uwazaga kubazwa yitegura guhabwa amasakaramentu, iyo bakubwiraga ko wagiye mu muryango urimo Ubald wagombaga kwiga cyane ukamenya amasengesho yose kuko iyo yakubazaga ukabitsindwa wahitaga witegura kuzagaruka umwaka utaha.”

Mu gukorana umurava, ngo kera yigeze gukora impanuka ubwo yari agiye gutanga amasakaramentu ari kuri moto.

Ati “Ibyo ni ibigaragaza umurava yakoranaga no kutiganda. Ariko ubwamamare bwe bwaje ubwo yaronkaga ingabire yo gusengera abarwayi bagakira.”

Meya Kayumba yavuze ko n’ubwo byaje kugera mu 1994, abantu bagakora Jenoside i Nyamasheke ariko bidakuraho ko Padiri Ubald yari yaragize uruhare mu kwigisha ubumwe n’ubwiyunge kuko yabitangiye akiri muto.

Ubuyobozi bw’Akarere ka Rusizi kandi bwashimiye Ubald kuba yarakundaga gufatanya cyane n’inzego zabwo ku buryo igikorwa cyose yateguraga yabagishaga inama kandi na we akabagira inama ku byo bwabaga bwifuza gushyira mu bikorwa nk’ubuyobozi.

Meya Kayumba yasoje avuga ko “Padiri Ubald ugiye tukigushaka ariko Imana yagukunze kuturusha. Aka gasozi k’Ibanga ry’Amahoro tuzi neza ko kazahorana umugisha kubera ubuvugizi bwawe. Uruhukire mu mahoro.”

Meya Kayumba yavuze ko Padiri Ubald yagiriye igihugu akamaro ndetse azibukwa mu bikorwa bya Gacaca Nkirisitu

-  Ubuhamya bw’Umunyamerika wari umaze imyaka 12 akorana na Padiri Ubald

11:35: Umunyamerika Katsey Long yari amaze imyaka irenga 12 akorana bya hafi na Padiri Ubald, haba mu ngendo zitandukanye yakoraga ku Isi zigamije kwigisha ubumwe n’ubwiyunge, igitabo yanditse ndetse na filime mbarankuru bakoranye.

Yavuze ko “Nkuko mwese mumuzi, Padiri Ubald ni umuntu ufite ishyaka, iyo afite ibitekerezo arabikurikirana, mu bitekerezo bye rero yumvaga ko ngomba kumufasha.”

Katsey yavuze ko ubwo Ubald yajyaga muri Leta Zunze Ubumwe za Amerika, yari agiye mu bikorwa byo kogeza inkuru nziza no gushishikariza abantu ubumwe n’ubwiyunge.

Ngo yageze muri Amerika nyuma aza kurwara icyorezo cya COVID-19.

Ati “Twese twarakirwaye, ariko njyewe nza gukira nkajya muba hafi mu bitaro. Yagize ububabare buhanitse ariko agakomeza gusaba abantu kumusengera ari nako nawe abasabira.”

Yakomeje agira ati “Yamaze ibyumweru bitandatu mu bitaro, kubera ko uburwayi butamworoherezaga kuvuga cyane ariko yakomeje kuba hafi y’Imana. Rwari urugero rutoroshye twakoranye ariko yumvaga ko Nyagasani amufitiye gahunda muri urwo rugendo rutoroshye.”

Umunyamerika Katsey Long yari amaze imyaka irenga 12 ari inshuti ya hafi na Padiri Ubald
Yatanze ubuhamya bw'uburyo babanye bakora ibikorwa bitandukanye by'ubugiraneza
Katsey Long asanzwe atanga umusanzu wihariye mu bikorwa bigamije gutanga amahoro no kwimakaza ihame ryo kubabarirana ari naryo Padiri Ubald yaharaniraga mu buzima bwe
  • Murumuna wa Ubald yavuze ubuzima bushaririye yakuriyemo

Murumuna wa Padiri Ubald, Rugwizangoga Revelien, yavuze ko mukuru we kuva mu bwana bwe yakuranye umutima mwiza, urukundo rw’abantu, ubushake, intumbero n’imbaraga.

Ababyeyi bamubyara, Se yari Kabera Jacques mu gihe Nyina yitwaga Mukaruhamya Anesia.

Rugwizangoga yavuze ko “Mukuru wanjye, yari umubyeyi, yari inshuti nziza akaba n’umujyanama w’ikirenga kubera ubunararibonye yari afite namwe mwese mumuziho. Kandi nk’umusaseridoti mwiza nzi neza ko yabaye inshuti ya bose, umujyanama wa bose.

Yakomeje agira ati “Umutima we wahoraga ufunguye kuri bose, imiryango y’inzu ye yahoraga ifunguye.”

Rugwizangoga yavuze ko mu muryango wabo bavuka ari bane, babiri bariho uwa gatatu yazize Jenoside yakorewe Abatutsi mu 1994. Yavuze ko umuryango wabo wari uw’abakirisitu bakunda Imana, aho nyina yari muri Regiyo Mariya naho Papa we akaba muri Korali.

Ati “Yabyirukiye mu mibereho myiza y’icyo gihe kuko se yari umwarimu mu mashuri abanza, ariko siko byakomeje kuko yaje kwicwa mu 1963, icyo gihe Ubald yari afite imyaka irindwi asigarana na nyina nawe ukiri muto kuva icyo gihe Ubald yatangiye inzira y’umuruho.”

Nk’umwana w’imfura, yafashaga nyina kurera abo bavukana, akabifatanya no kwiga; byatumye ubuzima bwe bukomeza gukomera.

Mu buto bwe, Ubald yari umujyanama wa nyina kandi uko yakuraga ni ko yarushagaho kwitwara neza n’ubwo yakuriye mu muruho, mu rwango rushingiye ku macakubiri, byose yarabyihanganiye arabirenga agira urukundo, ubusabane no kunga Abanyarwanda nk’umuco w’uburere yatojwe na nyina n’Imana yamuhanze.

Murumuna wa Padiri Ubald, Rugwizangoga Revelien, yavuze ko umuvandimwe we yakuranye umutima mwiza
Rugwizangoga yibuka ko Padiri Ubald yakuriye mu buzima bugoye ariko agaharanira kwitwara gitwari

10:50: Hagezweho umuhango wo guhazwa [guhabwa ukarisitiya], nawo usigaye ukorwa mu buryo budasanzwe aho abakirisitu batemerewe guhaguruka mu myanya yabo ngo bajye ku murongo nk’uko byari bisanzwe bikorwa muri Kiliziya Gatolika.

Nyuma yo guhazwa hakurikiraho igice cyo gushimira, aho abitabiriye iyi misa bari kubifashwamo n’uruhurirane rw’amajwi meza y’Ababikira n’aba Freres bibumbiye muri Chorale ‘Abagabuzi b’Amahoro ya Christ Umwami’ ikorera ivugabutumwa hano muri Paruwasi ya Nkanka.

Ni mu ndirimbo imenyerewe cyane muri Kiliziya Gatolika benshi bazi nka ‘Ndaje ngo nkore ugushaka kwawe’.

-  Ibyo wamenya kuri ‘Centre Ibanga ry’Amahoro’

Padiri Ubald yabonye izuba muri Gashyantare 1955, avukiye mu yahoze ari Segiteri Rwabidege, Komini ya Karengera, Perefegitura ya Cyangugu. Kuri ubu ni mu Murenge wa Ruharambuga, muri Paruwasi Gatolika ya Mwezi.

Padiri Ubald warokotse Jenoside yakorewe Abatutsi mu 1994, nyuma yayo yatangije ibikorwa by’isanamitima kuri Paruwasi ya Mushaka iherereye mu Karere ka Rusizi. Intego ye yari iyo kunga Abanyarwanda bakongera bakabana batishishanya.

Muri iyi paruwasi ya Mushaka yahuje abishe n’abiciwe bagera muri 446 bibumbiye mu matsinda 10.

Nk’umuntu wagezweho bikomeye na Jenoside yakorewe Abatutsi mu 1994, Padiri Ubald Rugirangoga yiyumvisemo igitekerezo cyo gushaka ahantu abakiristu bazajya bahurira bagasenga basaba amahoro, bakivugururamo urukundo, bagasaba imbabazi bakanazitanga.

Yateganyaga ko aho hantu abakirisitu bajya bahakirira ibikomere bikomoka kuri Jenoside n’ibindi bibazo abantu bahura na byo mu buzima bwa buri munsi birimo n’indwara zinyuranye.

Musenyeri Jean-Damascène Bimenyimana wari Umushumba wa Diyosezi Gatorika ya Cyangugu ni we weretse Padiri Ubald isambu yaje kwitwa Ibanga ry’Amahoro. Padiri Ubald yarahashimye, cyane ko ari no ku nkombe z’Ikiyaga cya Kivu, yahagereranyije n’aho Yezu yakundaga kwigishiriza rubanda.

Ubald yahise ko atangira imirimo yo kuhatunganya. Yahimitse Bikiramariya Umwamikazi w’Urukundo, Bikiramariya Umwamikazi w’Amahoro, ahakora inzira ntagatifu zirimo inzira ya Rozari, inzira y’ishapure y’ububabare bwa Bikiramariya n’inzira y’umusaraba.

Izo nzira zose zitangirira kwa Bikiramariya w’i Kibeho maze zigasoreza kwa Yezu Nyirimpuhwe, ahari ingazi 21 zishushanya izo Yezu yazamutse agiye gucirwa urubanza na Pilato. Ubu bari kuhubaka Kiliziya nini kandi nziza cyane izahabwa umugisha mu ntangiriro z’umwaka utaha.

Tariki ya 27 Ugushyingo 2008, Musenyeri Bimenyimana yaturiye igitambo cy’Ukaristiya kuri ako gasozi maze atangaza ko kiswe ‘Agasozi k’Ibanga ry’Amahoro’.

Tariki ya 5 Kanama 2016, Musenyeri Bimenyimana yahaye umugisha za nzira ntagatifu n’amashusho. Kuri uwo munsi yanatangaje ku mugaragaro ko Agasozi k’Ibanga ry’Amahoro kabaye ubutaka butagatifu buzajya bukorerwaho ingendo nyobokamana z’abakiristu n’abandi bantu bose babyifuza.

By’umwihariko, buri tariki 13 za buri kwezi, itariki y’amabonekerwa y’i Fatima, Abakiristu benshi cyane barahateranira maze bagasenga. Mu ijoro riba ryabanjirije iyo tariki abakiristu benshi babishoboye baraharara maze bakarara basenga bakanahabwa isakaramentu ry’imbabazi.

Mu kiganiro IGIHE iherutse kugirana n’Umushumba wa Diyosezi ya Cyangugu, Musenyeri Hakizimana Célestin, yatangaje ko ubwo Padiri Ubald yajyaga muri Amerika mu ntangiriro za 2020, yari yagiye mu bikorwa birimo no gushaka inkunga yo gukomeza kubaka ibikorwa remezo ku Ibanga ry’Amahoro.

Agasozi kitiriwe Ibanga ry'Amahoro gafite amateka yihariye

10:20: Hagezweho umwanya wo gutura. Chorale ‘Abagabuzi b’Amahoro ya Christ Umwami’, iri kuririmba indirimbo yo gushima yiswe ‘Akira Ituro’ iri mu zimenyerewe cyane mu gutura igitambo cy’Ukarisitiya.

Mu majwi meza, aba baririmbyi bari guhanika bagira bati “Mana waturemye, ukaduha ubuzima, turabuguhaye ngo ubusubirane […] akira, akira Mawe ntacyo dusize, tugutuye ituro ryo kugushima no kugusingiza…]”

Umuhango wo gusezera Padiri Ubald witabiriwe n’abihayimana batandukanye

Abitabiriye uyu muhango bari bicaye bahanye intera mu kwirinda Coronavirus
Bahawe udutabo turimo amateka ya nyakwigendera
Musenyeri Hakizimana Célestin yayoboye igitambo cya Misa yo gusezera Padiri Ubald

10: 15: Abo Ubald yasaniye imitima ntibihebe!

Musenyeri Hakizimana yavuze kandi ko ibikorwa byaranze Padiri Ubald birimo gusana imitima ya benshi, kubatoza kubana mu mahoro no mu bumwe n’ubwiyunge.

Yasabye abo yasaniye imitima kudaheranwa n’agahinda ngo bihebe, bibwira ko umubyeyi wabo apfuye ahubwo bakwiye kwishima kuko agiye kuba hafi y’Imana.

Ati “Abo yasaniye imitima ntibihebe kuko bafite umuvugizi iruhande rw’Imana kuko ibyo yatangiye azabikomeza kandi akabisohoza.”

Musenyeri Hakizimana yasoje gusobanura ivanjili afatanya n’abakirisitu bitabiriye Misa gusubiramo inshuro eshatu basabira Imana ngo ihe Padiri Ubald kurukukira mu mahoro.

Bati “Nyagasani umuhe iruhuko ridashira maze umwiyereke iteka aruhukire mu mahoro.”

  • Amafoto yo gusezera bwa nyuma kuri Padiri Ubald
Yapfukamye hasi ubwo yasezeraga kuri Padiri Ubald

9:50: Musenyeri Hakizimana atangije misa asaba abakirisitu guherekeza Padiri Ubald mu byishimo kuko ubuzima bwe bwari bwuzuyemo akanyamuneza.

Ati “Tumuherekeze mu byishimo kuko na we yaranzwe n’ibyishimo kandi yamamazaga Yezu muzima, watsinze urupfu maze na we arutsinde maze aho yicaye atuvuganire kurushaho.”

Musenyeri wa Diyosezi ya Cyangugu, Hakizimana Célestin, wasomye ivanvili yo mu gitabo cya Yohani 11: 17-27. Yagarutse ku nkuru ya Yezu azura Lazaro.

Musenyeri Hakizimana yavuze ko Padiri Ubald atari ashaje ndetse kuba apfuye akiri muto adakenyutse ahubwo ari umunsi we wari wageze.

Musenyeri Hakizimana yasabye abakirisitu n’abantu bose kurangwa n’ibikorwa byiza bakiri mu Isi kuko aribyo bizabakomangira umuryango w’Ijuru ugafunguka.

Yifashishije ijambo ry’Imana mu isomo rya Kabiri ryasomwe mu gitabo cy’Ibyahishuwe, avuga ko Padiri Ubald yabonye Isi nshya n’ijuru rishya kandi abantu bose bakwifuza kuzamusangayo.

Ati “Natwe rero bavandimwe, Ijuru n’Isi nshya bitangirira hano. Tugomba gutegura Isi yacu n’Ijuru bishya twigana aho tuba.”

9:40: Igikorwa cyo gusezera kuri Ubald kiratangiye. Hagiye gutangira igitambo cya Misa kiritabirwa n’abantu batarenze 20 bo mu muryango wa Ubald, abayobozi muri Diyosezi ya Cyangugu ndetse na bamwe mu bihayimana bafasha mu gutura igitambo cy’Ukarisitiya.

Igitambo cya Misa cyo gusezera kuri Padiri Ubald kigiye kuyoborwa na Musenyeri Vincent Harorimana wa Diyosezi ya Ruhengeri afatanyije na Musenyeri Hakizimana Celestin, Umushumba wa Diyosezi ya Gikongoro akaba n’Umuyobozi wa Diyosezi ya Cyangugu [iherutse kuragizwa Musenyeri Sinayobye Edouard].

Chorale ‘Abagabuzi b’Amahoro ya Christ Umwami’ ibumbiye hamwe Aba-Freres n’Ababikira bo muri Paruwasi ya Nkanka ni yo yaririmbye muri iki gitambo cya Misa.

Ni umuhango witabiriwe n'abantu bake kubera ingamba zashyiriweho kwirinda ikwirakwira rya Coronavirus

09:30: Abantu batandukanye by’umwihariko abatuye muri ibi bice bigize Paruwasi ya Mushaka no hirya no hino mu Karere ka Rusizi bari kugenda basezera kuri Padiri Ubald ariko nk’uko amabwiriza yo kwirinda icyorezo abiteganya bari kumara kumusezera bagataha.

Abajya kumusezera barimo abitwaje indabo bari gushyira iruhande rw’isanduku irimo umubiri wa Padiri Ubald ndetse nk’uko bigenda mu mahame y’Abakirisitu Gatolika bari kubanza kunama bakamusabira umugisha kugira ngo Imana imutuze aheza.

Kuva ahagana saa Moya za mu gitondo Kiliziya yubatse kuri Centre Ibanga ry’Amahoro, yari ifunguye ari naho umurambo wa Padiri Ubald warajwe uvanywe i Kigali nyuma y’igitambo cya Misa cyo kumusezeraho cyabereye muri Paruwasi Regina Pacis kiyobowe na Antoine Cardinal Kambanda.

Abantu bazindukiye kuri Centre Ibanga ry’Amahoro, gusezera bwa nyuma kuri Padiri Ubald benshi mu batuye muri ibi bice bafata nk’umubyeyi wabatoje ubumwe n’ubwiyunge no kubana mu mahoro.

IGIHE ibinyujije mu itsinda rigari ry’abanyamakuru bari ku gasozi kazwi nko ku ‘Ibanga ry’Amahoro’, yakurikiranye uko imihango ijyanye no guherekeza bwa nyuma Padiri Ubald yagenze.

Padiri Ubald yakundwaga n'ab'ingeri zose, abato n'abakuru
Abanyeshuri baturiye mu gace yashyinguwemo, babanje kujya kumusezeraho bwa nyuma mbere yo kujya ku masomo
Abihayimana Gatolika benshi bitabiriye Misa yo gusezera bwa nyuma kuri Padiri Ubald
Padiri Ubald Rugirangoga ni umwe mu bomoye ibikomere bya benshi bari barabaye imbata y'amateka ashaririye y'u Rwanda
Urupfu rwe rwashegeshe abanyarwanda b'ingeri zose hatitawe ku idini uwo ariwe wese asengeramo
Imva iza gushyingurwamo Padiri Ubald yamaze gutegurwa
Abantu biganjemo abo mu muryango wa nyakwigendera mu bamuherekeje
  • Centre Ibanga ry’Amahoro iri mu ntambwe nke uvuye ku Kiyaga cya Kivu
Centre Ibanga ry'Amahoro iherereye neza hafi n'inkombe z'Ikiyaga cya Kivu

Kanda hano urebe andi mafoto

Amafoto: Niyonzima Moïse

Video: Mbabazi Jean de Dieu


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .