Ubutumwa bwihariye Musenyeri Antoine Kambanda azibandaho namara kwimikwa nka Cardinal

Yanditswe na Niyitanga Jean Paul
Kuya 10 Ugushyingo 2020 saa 03:17
Yasuwe :
0 0

Arkiyepiskopi wa Kigali, Musenyeri Antoine Kambanda uherutse gutorerwa kuba Cardinal n’abandi 12 batorewe rimwe na we bazimikwa ku wa 28 Ugushyingo 2020.

Bazaba binjiye mu mubare w’abajyanama ba hafi b’umushumba wa Kiliziya Gatolika ku Isi. Aba baba bafite amahirwe agirwa na bake yo kugeza ibitekerezo byabo kuri Papa maze bikaba bishobora no gushyirwa mu bikorwa vuba.

Arkiyepiskopi wa Kigali, Musenyeri Antoine Kambanda, yavuze ko ubutumwa bumuraje ishinga bushingiye ku kwita ku muryango kuko ari wo gicumbi cy’ubukirisitu.

Muri iyi minsi, mu miryango hagaragara ibibazo by’ingutu bibangamiye ubuzima n’imibereho. Amakimbirane yo mu miryango akomeje gutuma abashakanye bicana, batandukana, bacana inyuma, cyangwa bakabana barebana ay’ingwe maze ingaruka zikagera kuri bo ubwabo no ku bana babo.

Ubu bamwe mu bana baba ku mihanda bagaragaza ko intandaro yo kujya kuba ku muhanda ari amakimbirane yo mu miryango bavukamo.

Mu muryango Nyarwanda kandi ubu haravugwa ikibazo gikomeye cy’abangavu batwita imburagihe, akenshi izi nda baziterwa n’abagabo bakuze bafite imiryango ubundi bakagombye kuba basigasira abo bahohotera.

Rimwe na rimwe abo bangavu iyo bamaze kubyara ababyeyi babo barabatererana cyangwa bakabahoza ku nkeke rimwe na rimwe bagatorongera bakajya kubaho mu buzima busharira.

Abana bavuka kuri abo bangavu na bo bahura n’ubuzima bubi budakwiye ibibondo.

Ibi n’ibindi bibazo bitandukanye bigira ingaruka no ku iyogezabutumwa cyane cyane ko rihera mu muryango.

Mu kiganiro na IGIHE, Musenyeri Antoine Kambanda yatangaje ko mu gihe azaba amaze kwimikwa nka Cardinal, ubutumwa azihatira kugeza ku mushumba wa Kiliziya Gatolika ku Isi buzaba bushingiye ku kwita ku muryango kuko ari wo kiliziya y’ibanze.

Yagize ati “Umuryango ni ubutumwa bw’umwihariko nshinzwe. Ni wo gicumbi cy’ubukirisitu, ni wo kiliziya y’ibanze.”

Musenyeri Kambanda yavuze ko yagize amahirwe yo kuba ari we wahagarariye u Rwanda mu Nama y’Abepisikopi (synod) yo mu 2015 bigatuma yumva ibibazo umuryango ufite ku Isi yose muri za Kiliziya.

Avuga ko mu byo yumvise hari abahuje ibibazo n’umuryango Nyarwanda hakaba n’abafite iby’umwihariko ariko kandi ngo iyo nama yatumye agira amahirwe yo kubona ukwemera kuri hirya no hino no kubona ko imbaraga z’ivanjili zigihari.

Ngo kuri we, iki ni igihe cyiza cyo kugeza ibitekerezo bye ku Mushumba wa Kiliziya, akagaragaza uburemere umuryango ufite mu iyogezabutumwa.

Ati “Iyogezabutumwa rihera mu muryango, niho umwana amenyera Imana, niho amenyera isengesho rya mbere kandi niho akura umusingi w’ubukirisitu n’ukwemera bizamwambutsa ubuzima bwe bwose, kwita rero ku muryango mu iyogezabutumwa ni cyo kintu cya mbere numva mu Kiliziya bakwiye guha imbaraga.”

Abalayiki bafite umukoro ukomeye ku busugire bw’umuryango

Musenyeri Kambanda avuga ko abalayiki (abakirisitu) bafite inshingano ikomeye yo kwita ku muryango cyane cyane gutoza abana bato kumenya Imana n’ivanjili.

Ati “Abalayiki nibo bagize ingo, kandi ndimo ndavuga ubutumwa buhera mu ngo, abalayiki biri mu nshingano zabo by’umwihariko kwita ku iyogezabutumwa ryo mu muryango.”

Yavuze ko ibihe bya Guma mu rugo byatanze isomo rikomeye ku bakuru b’imiryango kuko byatumye bamenya neza ko ari bo bashumba b’ibanze b’imiryango yabo.

Ati “Guma mu rugo muri COVID-19 yatugaragarije ko mu gihe abantu batashoboraga kujya mu misa basengeraga mu rugo, umukuru w’umuryango akaba yayobora umuhimbazo w’ijambo ry’Imana […] ni we usobanurira abana ivanjiri y’uwo munsi, ni we ubatoza gusenga, buri mwana agashobora kuvuga isengesho […] ubwigishwa ni hariya buhera, niho kiliziya yubatse. Abalayiki rero bagize umusingi wa Kiliziya, kwita ku muryango ni ubutumwa bafite kandi twubakiyeho twese.”

Yagarutse ku nshingano z’abihaye Imana, avuga ko bakwiye gukoresha neza ingabire bahawe maze bagatanga umusanzu wabo mu kubaka umuryango na Kiliziya.

Yakomeje ati “Kwiyegurira Imana ni ingabire mu mateka roho mutagatifu abyutsa mu muntu akifatanya n’abandi mu ngabire yo kwita ku mbabare, kwita ku barwayi, kwigisha abato, kwita ku bantu bafite ubumuga, kwigisha no kujya kwamamaza ivanjiri mu mahanga. Abiyeguriye Imana icyo tubasaba ni ugushyira mu bikorwa no kubahiriza ingabire bahawe kugira ngo uruhare bategerejweho mu kubaka Kiliziya barugaragaze.”

Kugira ngo umuntu abe Cardinal biri mu bushake bwite bwa Papa kuko nta tora ribaho, bigakorwa mu busesenguzi bwe, akitoranyiriza abajyanama. Ba Cardinal ni bo batorwamo ba Papa, bivuze ko buri Cardinal aba ari umukandida.

Biteganywa ko Cardinal Kambanda azahita ahabwa imyambaro itukura iranga ba Cardinal namara kwimikwa ku wa 28 Ugushyingo 2020.

Arkiyepiskopi wa Kigali, Musenyeri Antoine Kambanda, yavuze ko ubutumwa bumuraje ishinga bushingiye ku kwita ku muryango kuko ari wo gicumbi cy’ubukirisitu

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .