Ibibazo by’ingutu bimaze iminsi muri ADEPR bizakemurwa na nde?

Yanditswe na Musangwa Arthur
Kuya 28 Nyakanga 2020 saa 03:05
Yasuwe :
0 0

Hashize iminsi havugwa ibibazo by’ingutu muri ADEPR birimo amakimbirane hagati ya Biro Nyobozi n’Inama y’Ubuyobozi, guheza no kwirukana bamwe, gusesagura umutungo n’ibindi bishingiye ahanini ku miyoborere y’iri torero, ku buryo hari abayoboke baryo bakomeje kwibaza amaherezo yabyo n’uzabikemura.

Mu mezi 10 ashize ADEPR yakunze kuvugwamo ibibazo bitandukanye birimo gufungwa k’Umuvugizi wayo wungirije, Rev Karangwa John, ushinjwa gukoresha impapuro mpimbano [yagizwe umwere mu kwezi gushize], kwirukanwa kw’abakozi n’abapasiteri n’ibindi.

Abakurikiranira hafi ubuzima bwa ADEPR na bamwe mu bayoboke bayo, bahuriza ibibazo by’iri torero mu byo bita ‘imiyoborere mibi’ ya Komite Nyobozi irangajwe imbere na Rev Karuranga Ephrem.

-  Amakimbirane hagati ya CA na Biro Nyobozi

Muri Gicurasi uyu mwaka, Biro Nyobozi ya ADEPR yashinjwe kugabanya imishahara y’abakozi b’itorero binyuranye n’amategeko ariko yo ikavuga ko mu bihe bidasanzwe ifite ububasha bwo gufata ibyemezo byihutirwa.

IGIHE yamenye ko Biro Nyobozi yegereye abashumba b’indembo n’abayobozi b’amatorero y’uturere ibamenyesha iby’impinduka mu mishahara, ibasaba kubyumvisha abandi bakozi bayoboye.

Mu Mujyi wa Kigali, abo mu Karere ka Nyarugenge basinye inyandiko yemera kugabanyirizwa umushahara ariko bigeze ku bo muri Gasabo na Kicukiro barabyanga.

Biro Nyobozi yamenyesheje Inama y’Ubuyobozi (CA) iby’izo mpinduka ku wa 13 Gicurasi 2020 ibinyujije mu butumwa bwa email.

Mu ibaruwa IGIHE ifitiye kopi Umuyobozi wa CA, Kayigamba Callixte, yasubije Umuvugizi wa ADEPR, Rev. Karuranga Ephrem, agaragaza ko baticaye ngo bahuze ibitekerezo ku cyemezo cyo kugabanya umushahara w’abakozi.

Ibi bikaba byari binyuranye n’amategeko shingiro ya ADEPR mu gace kayo ka 21, ateganya ko CA ariyo yemeza ibigendanye n’imishahara y’abakozi b’itorero.

-  Guheza bamwe no gutonesha abandi

Mu bibazo bikomeje kuvugwa muri ADEPR harimo guheza bamwe no gutonesha abandi. Kuri iyi ngingo hagarukwa ku bagenzuzi babiri baherutse kwirukanwa hagasigara umwe kandi bose barakoze ubugenzuzi bwashingiweho birukanwa.

Hari kandi kuba hari abafunzwe nyuma bakagirwa abere ariko bakirukanwa ku mirimo ndetse bagahezwa mu buzima bw’itorero, mu gihe Umuvugizi wungirije wa ADEPR, Rev Karangwa yafunzwe amezi umunani yafungurwa agasubizwa ku mirimo ndetse hakaba amakuru y’uko azahabwa imishahara y’ayo mezi yose.

IGIHE yamenye ko mu gihe yamaze atari mu kazi Rev Karangwa asaba ADEPR miliyoni 28 z’amafaranga y’u Rwanda z’imishahara y’amezi umunani yamaze adahembwa.

Nyuma yo gufungurwa kwa Rev Karangwa, Umuvugizi wa ADEPR, Rev Karuranga ku wa 23 Nyakanga yamugiriye inama yo kwandika ibaruwa agaragaza aho yari ari kugira ngo inzego z’itorero zibashe kumenya no kugena ibikurikije amabwiriza itorero rigenderaho ndetse n’imicungire y’abakozi baryo.

Ibi byatumye hari abibaza uburyo Rev Karuranga yakiriye mu kazi Rev Karangwa nk’umukoresha we atamubajije aho yari ari ndetse akamuha n’ibindi nkenerwa birimo imodoka.

Ubugenzuzi ku mikoreshereze y’umutungo ku cyicaro cy’itorero ADEPR, bwagaragaje ko hagati ya tariki 1 Mutarama kugeza tariki 30 Nzeri 2019, habayeho gutanga amasoko binyuranyije n’amategeko, umutungo w’itorero ucunzwe nabi, gusesagura umutungo n’ibindi.

Iri genzura ryakozwe n’abagenzuzi b’umutungo b’imbere muri ADEPR, ari bo Matabaro Evariste, Mukumburwa Joyeuse na Mukamurenzi Angelique.

Uretse Mukamurenzi, abandi babiri bahagaritswe mu kazi ndetse bahabwa n’inyandiko z’integuza yo gusesa amasezerano yabo. Amakuru agera kuri IGIHE ni uko ibi byakozwe nyuma yo kubasaba kuvuguruza ibyavuye mu bugenzuzi bakoze, abandi bakabyanga.

Icyo gihe Umuvugizi wa ADEPR, Rev. Karuranga Ephrem, yabwiye IGIHE ko ubu bugenzuzi batabwemera kubera inenge bufite.

Ku kuba babiri muri batatu bakoze ubugenzuzi barahawe integuza yo gusesa amasezerano yabo, Rev Karuranga yavuze ko ‘Ntaho bihuriye kuko ibyo bagaragaje nta n’ikibazo gihari ahubwo ni uko nyuma y’aho bakomeje kugira imyitwarire mibi no kubagira inama ntibazumve, hanyuma duhitamo gusesa amasezerano ariko ibyo gusesa amasezerano dukurikije ubugenzuzi ntabwo ari byo’.

-  Gatanya hagati ya ADEPR mu Rwanda n’iya Uganda

Umwaka ushize, abayobozi b’Itorero rya ADEPR muri Uganda bandikiye ubuyobozi bwa ADEPR yo mu Rwanda babumenyeshako bahisemo kwigenga bashingiye ku nama bagiriwe n’ubuyobozi bwa Uganda.

Muri iyi baruwa yanditswe tariki ya 13 Gicurasi 2019, aba bapasiteri bavuga ko icyemezo cyo kwitandukanya na ADEPR bagifashe nyuma y’umwiherero wabaye tariki ya 26 Mata 2019.

Muri uyu mwiherero ngo abayoboye ADEPR/Uganda babwiye ubuyobozi bukuru bwa ADEPR/Rwanda, ibibazo biri muri iri torero by’umwihariko ibijyanye n’umutekano muke dore ko bamwe muri bo bakomeje gushimutwa n’inzego zishinzwe umutekano muri Uganda bagakorerwa iyicarubozo ritandukanye.

Bakomeza bavuga ko abayobozi b’Itorero rya ADEPR mu Rwanda ntacyo bakoze ku bibazo babamenyesheje.

Bati “Twebwe nk’abayobozi b’Uturere byabaye ngombwa ko duhura tugashakira hamwe icyagarura amahoro n’umutekano mu Itorero dukurikije inama twagiriwe n’ubuyobozi bwa Uganda.”

Abayobora ADEPR Uganda bahise bafata icyemezo cyo guhindura izina ry’iri dini baryita PCIU (Pentecostal Church International of Uganda) batora n’ubuyobozi bushya.

-  Imicungire mibi y’umutungo

Ubugenzuzi ku mikoreshereze y’umutungo ku cyicaro cy’itorero ADEPR, bugaragaza ko hagati ya tariki 1 Mutarama kugeza tariki 30 Nzeri 2019, habayeho gutanga amasoko binyuranyije n’amategeko, umutungo w’itorero ucunzwe nabi, gusesagura umutungo n’ibindi.

Bimwe mu byagaragaye mu igenzura ni ibibazo n’amayobera ku cyuma gisya amabuye akavamo umucanga kiri mu Karere ka Bugesera (Crusher), aho cyari kimaze amezi 11 gikora ariko nta faranga na rimwe ryinjira mu isanduku y’itorero kandi cyaragombaga kwishyurwa miliyoni 9 Frw buri kwezi.

Muri iyi nyandiko y’ubugenzuzi IGIHE ifitiye kopi, abagenzuzi bavuga ko ‘bageze aho iki cyuma gikorera ntibahasange ugikoresha ndetse yari yabujije n’abakozi be kugira icyo bavuga yikanga ko hari amakuru baha abagenzuzi’.

Bati “Ibyo twari twaganiriye na bo ndetse n’ibyo twabonye kuri chantier biduhamiriza ko kuvuga ko crusher [icyuma gisya amabuye] itigeze ikora ari ibinyoma byambaye ubusa.”

Muri iyi raporo y’agateganyo abagenzuzi bagaragaza amafaranga miliyoni 80 Frw, yaguze ikibanza cyanditse kuri Mukamuganga Judith kiri haruguru ya Dove Hotel, bakavuga ko ‘ni menshi cyane ugereranyije n’uko ibibanza nk’icyo bigurwa’.

Bakomeza bavuga ko ikindi giteye impungenge ari uko uhagarariye icungamutungo ugomba gusinya impapuro zose zemeza ko amafaranga akwiriye gusohoka, yanze kubisinya nk’uwabigenzuye ko bikwiye.

Bati “Kugura ikibanza ku gaciro gahanitse cyane kuko ibibanza ku Gisozi bigurishwa hagati ya miliyoni 20 Frw na 30 Frw.”

Ubugenzuzi bugaragaza ko abayobozi ba ADEPR bafite abarinzi bishyurwa n’itorero kandi batabagenewe n’amategeko yaryo, ibi bigafatwa nko gusesagura umutungo.

Abagenzuzi bati “Kurihira abayobozi abo kubararira (abacunga umutekano bane ba EASCO), bakishyurwa binyuze muri EASCO ariko icyemezo kibibemerera ntacyometse aho bishyuriye...hakwiye kugaragazwa inyandiko isinye ibahesha izo avantage zo kurarirwa.”

Ubugenzuzi bugaragaza kandi abayobozi bahabwa amafaranga yo mu butumwa ariko ntihagaragare inyandiko y’ubutumwa [ordre de mission] na raporo y’ubwo butumwa, ibi bituma bifatwa nko gusesagura umutungo no kuwunyereza.

Ku micungire mibi y’umutungo, hari imodoka zaheze mu gishanga ubu zikaba ziri hanze aho basenye i Gikondo.

Umuvugizi wa ADEPR, Rev Karuranga Ephrem, avuga ko batemera ubu bugenzuzi kuko bufite inenge

-  Ikibazo cy’Impamyabumenyi

Ikibazo cy’Impamyabumenyi zigenwa n’itegeko ku bayobozi ba ADEPR ni kimwe mu bikomeje kwibazwaho. Mu mpera z’umwaka ushize, Umuvugizi Wungirije wa ADEPR, Rev. Karangwa John, yatawe muri yombi n’Urwego rw’Igihugu rw’Ubugenzacyaha (RIB) akurikiranwaho gukoresha inyandiko mpimbano.

Rev. Karangwa yatawe muri yombi mu Ukwakira 2019. Yashinjwaga icyaha cyo gukoresha inyandiko mpimbano, igihe yiyamamarizaga umwanya w’Umuvugizi wungirije muri ADEPR, kuko byasabaga ko uwiyamamariza uwo mwanya agomba kuba afite Impamyabumenyi yo ku rwego rwa (Bachelor’s).

Icyo gihe yatanze impamyabumenyi yo muri Philippines n’iyo muri Uganda, biza gukekwa ko ari impimbano atigeze ahiga, bituma atabwa muri yombi ngo hakorwe iperereza akurikiranweho icyaha cyo gukoresha inyandiko mpimbano.

Mu iburanisha ryo ku wa 10 Kamena 2020, Ubushinjacyaha bwari bwasabye urukiko ko Rev Karangwa, yafungwa imyaka irindwi agatanga ihazabu ya miliyoni 5 Frw, kubera icyaha cyo gukoresha inyandiko mpimbano.

Ubwo umucamanza mu Rukiko Rwisumbuye yasomaga urubanza ku wa 30 Kamena 2020, yavuze ko urukiko “Rwemeje ko nta bimenyetso simusiga bihamya Karangwa John icyaha cyo gukora no gukoresha inyandiko mpimbano. Rukijije ko Karangwa John atsinze.’’

Gusa ubushinjacyaha bwajuririye icyemezo cy’Urukiko rwisumbuye rwa Nyarugenge, aho dosiye yajuririwe mu Rukiko Rukuru.

Uretse Rev Karangwa, Umuvugizi wa ADEPR, Rev. Karuranga Ephrem, na we ayobora ADEPR adafite impamyabumenyi iteganywa n’Urwego rw’Igihugu rw’Imiyoborere, RGB, mu Itegeko rigena imitunganyirize n’imikorere by’imiryango ishingiye ku myemerere ryo mu 2018.

Ingingo ya 20 ivuga ibisabwa kugira ngo umuntu ahagararire umuryango imbere y’amategeko. Hari aho ivuga ko asabwa ‘kuba afite impamyabumenyi ya kaminuza mu by’iyobokamana cyangwa indi mpamyabumenyi ya kaminuza hiyongereyeho impamyabushobozi yemewe mu byerekeye iyobokamana yatanzwe n’ishuri ryemewe’.

Icyakora Urwego (RGB) rushobora gushyiraho amabwiriza agena ibindi abahagararira umuryango bagomba kuba bujuje hakurikijwe umwihariko w’ibikorwa iyo miryango igamije.

Rev Karuranga yize mu ishuri rya Tewolojiya rya ADEPR rizwi nka FATEK ariko Inama y’Igihugu y’Amashuri Makuru na Kaminuza (HEC) yahagaritse itangwa ry’impamyabumenyi n’ibindi bikorwa bijyanye no kwigisha muri iri shuri.

Rev Karuranga akaba ari umwe mu bagombaga guhabwa impamyabumenyi muri FATEK.

Rev Karangwa yarekuwe n'Urukiko Rwisumbuye rwa Nyarugenge ku wa 30 Kamena 2020

-  Kwirukana abakozi n’abapasiteri

Uretse abakozi bahagaritswe na ADEPR, hari n’abapasiteri yahagaritse nka Pasiteri Zigirinshuti Michel mu gihe abandi barimo na Habyarimana Désiré ubarizwa muri Paruwasi yo mu Gatenga bandikiwe amabaruwa yo kugawa kubera amakosa bakoze.

Mu ntangiriro za Nyakanga 2020 nibwo ADEPR yandikiye abakozi bayo biganjemo abavugabutumwa n’abapasiteri, bamwe bahagarikwa amezi atatu badakora inshingano zabo mu gihe hari n’abandikiwe bihanangirizwa kubera ko batandukiriye ku nshingano zabo.

Mu bahagaritswe harimo Pasiteri Zigirinshuti bivugwa ko yahowe amagambo y’inyigisho n’ubuhanuzi amaze iminsi atangaza ahanini afitanye isano n’indwara z’ibyorezo ndetse na Pasiteri Habyarimana Désiré wandikiwe yihanangirizwa kuko yasezeranyije umukobwa wo muri ADEPR binyuranye n’amategeko.

Uru rutonde rurerure runariho abandi bavugabutumwa barimo Mukansonera Edissa wabarizwaga muri ADEPR Rukiri wahawe ibaruwa imuhagarika mu kazi mu mezi atatu kubera ko yahukanye, agatandukana n’umugabo we.

Pasiteri Zigirinshuti Michel yahagaritswe muri ADEPR amezi atatu kubera amagambo y'ubuhanuzi yatangaje mu bihe bitandukanye
Pasiteri Habyarimana yavuze ko yafashe icyemezo cyo gusezeranya umukirisitu wo muri ADEPR ngo arinde itorero guseba no kwishyingira k'uwo mukobwa

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .