ADEPR yemeje ihagarikwa rya Rev. Karangwa, imusaba gutanga imfunguzo z’imodoka

Yanditswe na Ishimwe Israel
Kuya 30 Nzeri 2020 saa 06:40
Yasuwe :
0 0

Itorero rya ADEPR ryemeje ko Rev. Karangwa John wari Umuvugizi wungirije yahagaritswe ku mirimo ye mu buryo bw’agateganyo mu gihe cy’amezi atatu.

Ibaruwa ihagarika Rev. Karangwa John yashyizweho umukono n’Umuvugizi wa ADEPR, Rev. Karuranga Euphrem, kuri uyu wa 30 Nzeri 2020.

Ku wa 26 Kanama nibwo Inama y’Ubuyobozi ya ADEPR (CA) yahagaritse Umuvugizi wungirije mu itorero, Rev Karangwa John bitewe n’ibyaha akurikiranyweho mu butabera byo gukoresha inyandiko mpimbano.

Uru rwego ntirwahise rumumenyesha icyo cyemezo ndetse yagumye mu nshingano ze nkuko yabihamirije IGIHE.

Yagize ati “Sindabona ibarwa impagarika, igihe nta barwa mfite ndacyari mu mirimo. N’ubu ndi mu kazi.’’

Kuri uyu wa Gatatu nibwo Rev. Karuranga yamumenyesheje ko yahagaritswe nkuko ibaruwa IGIHE ifitiye kopi ibyerekana.

Yagize ati “Nkwandikiye nkumenyesha ko uhagaritswe by’agateganyo mu gihe cy’amezi atatu abarwa uhereye igihe umwanzuro wafatiwe ku wa 26/09/2020 nkuko byemejwe n’Inama y’Ubuyobozi ya ADEPR, CA.’’

Yamwibukije kandi ko agomba gutanga ibikoresho byose by’akazi afite mbere yo kuva mu nshingano.

Ati “Mboneyeho kugusaba gushyikiriza Umunyamabanga Mukuru w’Itorero kontake n’ibyangombwa by’imodoka ifite plaque RAC 816W n’ibindi bikoresho by’akazi waba ufite bitarenze ku wa 1/10/2020 saa Tatu za mu gitondo.’’

Rev. Karangwa John yatawe muri yombi mu Ukwakira 2019 ashinjwa gukoresha inyandiko mpimbano, igihe yiyamamarizaga umwanya w’Umuvugizi wungirije muri ADEPR, kuko byasabaga ko uwiyamamariza uwo mwanya agomba kuba afite Impamyabumenyi yo ku rwego rwa (Bachelor’s).

Icyo gihe yatanze impamyabumenyi yo muri Philippines n’iyo muri Uganda, biza kumenyekana ko ari impimbano atigeze ahiga.

Ku wa 30 Kamena 2020 nibwo Urukiko rwisumbuye rwa Nyarugenge rwemeje ko Rev Karangwa ari umwere ariko Ubushinjacyaha buhita bujurira icyo cyemezo.

Rev. Karangwa John agifungurwa yasubiye mu mirimo anahabwa ibigenerwa umukozi birimo imodoka. Mu mezi umunani yamaze atari mu kazi yasabaga ADEPR miliyoni 28 Frw z’imishahara atahembewe.

Nyuma yo gufungurwa kwe, Umuvugizi wa ADEPR, Rev Karuranga ku wa 23 Nyakanga 2020 yamugiriye inama yo kwandika ibaruwa agaragaza aho yari ari kugira ngo inzego z’itorero zihamenye zinagene ibikurikije amabwiriza itorero rigenderaho n’imicungire y’abakozi baryo.

Rev. Karangwa yatorewe kuba Umuvugizi wungirije wa ADEPR Ushinzwe Ubuzima bw’Itorero ku wa 20 Gicurasi 2017. Ni umwanya yagezeho nyuma y’igihe yari amaze ayobora Ishami rya ADEPR muri Uganda.

Indi nkuru wasoma: Umuvugizi wungirije wa ADEPR, Rev. Karangwa yahagaritswe, we ati “nta baruwa ndabona, ndi mu kazi’’

ADEPR yemeje ihagarikwa rya Rev. Karangwa wari Umuvugizi wungirije
Umuvugizi wungirije wa ADEPR, Rev Karangwa John, yakundaga kubwira abapasiteri ati "Bashumba umuntu ashobora kukugira igitambo na we ukamugira inkwi zo kugitwika''. Hari abahuje aya magambo no kuba yariziritse kuri Rev. Karuranga kugeza bombi basohokanye muri Biro Nyobozi ya ADEPR

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .