00:00:00 IGIHE NETWORK KN KINYARWANDA EN ENGLISH FR FRANCAIS

Uko yakoranye na The Ben n’umwihariko we mu gutunganya amashusho: Ikiganiro na John Elarts

Yanditswe na Nsengiyumva Emmy
Kuya 20 December 2023 saa 09:35
Yasuwe :

Ni umusore ukiri muto mu myaka no mu gihagararo, ariko ufite ubuhanga n’ubushobozi budasanzwe bwo kurebera mu ijisho rya camera akabona ibizatuma amaso yawe aryoherwa n’urunyuranyurane rw’amashusho meza, indirimbo ikarushaho gufata amarangamutima.

Ndashaka kukubwira umusore witwa John Elarts, kandi ndahamya ko wamumenye niba uri mu bakabakaba miliyoni bamaze kureba indirimbo ya Mugisha Benjamin [The Ben], yise ’Ni Forever’, ukaba warabonye ’Pyramid’ ya Kevin Kade, ’No Body’ ya Bwiza na Double Jay, ’Rata’ ya Yago n’izindi.

Ngaho tekereza umuntu The Ben yagiriye icyizere nk’umwe mu bahanga bagombaga kumufasha kugira ngo indirimbo aherutse gushyira hanze ibashe gusohoka iri ku rwego rwe nk’umuhanzi ukomeye mu karere ariko wari unamaze igihe yaricishije irungu abakunzi b’umuziki we.

Nta wundi ni Kubwimana Jean, umaze imyaka irenga umunani yariyeguriye umwuga wo gufata amashusho y’indirimbo, kuyobora ifatwa ryayo ndetse no kuyatunganya [bizwi nka Video Director].

Uretse kuba yarakoze indirimbo ‘Ni Forever’ ya The Ben, hari izindi ndirimbo nyinshi zaba iz’abahanzi bo mu Rwanda, abo mu Burundi ndetse n’ahandi yagiye atunganya mu buryo bw’amashusho.

Ni Umuyobozi w’Ikigo JEAK MEDIA, gikora ibijyanye no gufotora, gukora amashusho y’ibikorwa bitandukanye byaba iby’indirimbo z’abahanzi, videwo zo kwamamaza ibigo bitandukanye n’ibindi.

Mu kiganiro cyihariye yagiranye na IGIHE, John Elarts yagarutse ku rugendo rwe mu gutunganya amashusho y’indirimbo z’abahanzi, uko yinjiye ku isoko ry’u Rwanda ndetse n’uko The Ben yamugiriye icyizere.

John Elarts, umuhanga mu gufata no gutunganya amashusho y'indirimbo umaze kwigarurira isoko ry'abahanzi b'i Kigali

IGIHE: Urugendo rwo gukora amashusho y’indirimbo warutangiye ryari?

John Elarts: John Elarts ni Umurundi witwa Kubwimana Jean, nkaba nsanzwe nkora umwuga wo gutunganya amashusho.

Urugendo rwanjye rwatangiye mu 2015, byaturutse ku bandi bantu batunganya amashusho hirya no hino ku Isi kuko nakuze nkunda kureba filime.

Kera twajyaga kureba filime, ugasanga babanza gushyiramo imiziki ya ba Mr Nice [umuhanzi wo muri Tanzania], noneho tukareba ukuntu batunganya amashusho, ukumva ni ibintu byiza, tukabikunda gutyo.

Rero uko ni ko natangiye ndi umuntu ushushanya, mfata amafoto ariko nyuma ntangira kugerageza amashusho, nabikoreshaga telefone, ngafata amashusho mato nkayateranya, bigenda bikura.

IGIHE: Gukora amashusho nk’umwuga byo byaje gute?

John Elarts: Kuva mu 2015 ntabwo byari byoroshye kubera ko iyo utangiye ntabwo abantu baba bakwizera ariko byaje kuza ngirirwa amahirwe n’umuhanzi mukuru cyane i Burundi witwa Big Fizzo.

Twakoranye mu gihe cy’imyaka itatu mba muri ‘Label’ ye ya Bantu Boy, ubwo natangiye gukorana n’abahanzi batandukanye ndi kumwe na bo muri Bantu Boy, ba Double Jay dutangira gukorana n’abandi bahanzi bakomeye.

Igihe cyarageze, umuntu aba ashaka gukura, agakora yigenga. Iyo umuntu akuze aba ashaka kwagura akarere, ni bwo navuyeyo ntangira gukora njyenyine, ni njye musigaye mubona nikorana.

Ubu nta ‘Label’ ndimo, ndimo ndakora nka John Elarts ufite ikigo cyanjye cyitwa JEAK Media, nkagenda nkorana n’abahanzi kugira ngo ndebe ko nakwagurira ibikorwa mu Burundi, Uganda, u Rwanda n’ahandi mu Karere.

IGIHE: Indirimbo ya mbere ya Big Fizzo wakoze yitwaga gute?

John Elarts: Ni indirimbo yitwa ‘Mida Ya Love’, icyo gihe Big Fizzo yari yayifatanyije n’undi muhanzi w’Umurundikazi witwa Iry Tina Da Queena.

Iyo ni yo natangiye kumukorera nka Big Fizzo hari mu 2018, ariko iyo ntabwo yari iye wenyine. Ubusanzwe indirimbo ye ya mbere nakoze ari wenyine ni iyitwa ‘Ni wewe’ irahari kuri YouTube, imaze kurebwa n’abantu batari bake.

Hanyuma twahise dukomeza n’abandi twakoranaga muri ‘Label’ imwe, ahita angirira icyizere, inyinshi zasohotse kuva mu 2021, kugeza igihe cya Covid-19 kirangiye, ni njye wazikoze za Big Fizzo.

IGIHE: Indirimbo ya mbere y’umuhanzi Nyarwanda wakoze yari iyihe?

John Elarts: Ndibuka, nk’indirimbo y’umuhanzi Nyarwanda ye wenyine ni indirimbo ya Yago Pon Dat yitwa Rata. Ndakeka ari indirimbo ya kabiri kuri album ye igiye gusohoka.

Ni yo ndirimbo y’umuhanzi Nyarwanda wenyine adafatanyije n’Umurundi ariko ubundi hari izo nari nakoze nk’iya Kiriku na Double Jay bari kumwe na Bruce Melodie.

Hari kandi indirimbo ya Bwiza na Alvin Smith [...] ariko nyine iyo nakoze nk’Umunyarwanda bwite ari wenyine yari iya Yago.

IGIHE: Gukorana na The Ben byo byaje gute?

John Elarts: Hari mu kwezi k’Ugushyingo 2023, ni bwo nahamagawe bwa mbere na Noopja [Umuyobozi wa Country Records], arambwira ati ‘John’ tugiye kuguha akazi.

Dufite umushinga dushaka gukora muri uku kwezi mbere y’uko The Ben ajya muri Canada.

Narababwiye nti njyewe ndi hano i Kigali, nashakaga gusubira i Burundi ariko naba ndetse tukabanza tukabonana, naratekereje nti ’ko The Ben ari umuhanzi ukomeye, kubera iki arinjye bahisemo?’

Twarabonanye, ambwira ko bamusobanuriye ko ndi umuntu usanzwe ukora ibintu byiza, bityo ashaka ko dukorana, kandi ashaka ko tuzakora ibintu byiza.

Yarambwiye ati nshaka kuguha indirimbo yanjye, maze igihe kinini ntarasohora indirimbo, rero ndakwizeye nshaka ko dukora video nziza, ndavuga nti yego reka tubikore.

Icyo gihe ndabyibuka ko twamaze iminsi ibiri turi kumwe, turimo gutegura ‘Concept’, The Ben nawe asanzwe ari umuntu ukunda ibintu byiza. Arambwira ati nshaka ko dukora ibintu bitandukanye kandi iyo video ndabona twayikorera hano mu Rwanda ikarangira.

IGIHE: Wowe wumvaga wifitiye icyizere ko uzabishobora?

John Elarts: Kubera ko nari ndikumwe n’umuntu ukunda ibintu byiza kandi yamaze kungirira icyizere nahise niyumvamo ko nzabishobora.

Indirimbo uko uyumva , ivuga inkuru iri hagati y’abantu babiri bakundanye, iyo urimo kuyumva, umwe aba abwira undi ati tugende ahantu kure, heza, nkwereke urukundo [...]

Naravuze nti byaba byiza tugize urugendo tukajya mu bindi bice bifite amashusho meza cyane, ariko arambwira ati hano mu Rwanda hari ahantu heza twakorera amashusho.

Ati igihugu cyacu ni cyiza, twabikorera hano. Twatekereje ahandi hantu hatarakoreshwa cyane ku buryo abantu nibabona video bazavuga bati aha hantu habaho?

Twateguye kujya i Rusizi muri Nyungwe. Twabanje gukorera i Kigali, umunsi wa mbere, uwa kabiri duhita tujya muri Nyungwe, dufata amashusho ararangira.

IGIHE: Ni ukuvuga ko iminsi ibiri mwari mumaze gufata amashusho?

John Elarts: Iminsi ibiri yonyine ni yo twafashe amashusho kubera ko The Ben yari afite urugendo rwo kujya muri Canada.

Twamaze gufata amashusho ahita agenda, ageze muri Canada muhereza amashusho natunganyije, ayabonye avuga ko atari aziko twafashe ibintu byiza gutyo, ahita ambwira ko nagaruka tuzareba, akanyereka ibyo twahinduramo.

Yavuyeho araza turicara, areba ya ‘sample’ nari namuhaye, tumarana iminsi ibiri. Arambwira ati nshaka ko tureba ishusho rimwe ku rindi ku buryo buri muntu wese azavuga ko twatanze ikintu cyiza.

Twaricaye turabikora, rero ni iriya video mwabonye.

IGIHE: Gukorana na The Ben ni iki wavuga byakumariye?

John Elarts: Gukorana na The Ben navuga ko ari nk’umugisha kubera ko nsanzwe ndi Umurundi.

Kuba yaravuze ati John ndamwizeye, agashima impano mfite, ni nk’uko yari guha akazi umuntu usanzwe ukorera hano, kuba yarizeye njye ni ibintu byo kumushimira.

Ndamushimira, ni ibintu byankoze ku mutima, ni yo mpamvu navuze ko The Ben ni umuhanga kubera ko agerageza kuvumbura izindi mpano nshya.

Kubera ko hari abantu benshi bamenye kubera gukora video ya The Ben, hari benshi batari banzi. Byanteye imbaraga, kugeza uyu munsi ndabona abantu banyandikira, bambwira bati ko tubona uzi gukora video tukaba twari dusanzwe tutakuzi.

Ni ibintu bifite igisobanuro ku muziki w’u Burundi, u Rwanda ndetse na Afurika muri rusange.

IGIHE: Hari abantu bashinja The Ben kuba umunebwe, wowe mwakoranye ni ko wabibonye?

John Elarts: Ibyo bavuga nahamya ko atari byo kubera ko iyo umuntu utazi ibiri mu mutima we ntushobora kumucira urubanza.

Iyo aza kuba ari umunebwe ntabwo kiriya gikorwa kiba cyararangiye, indirimbo twayikoze mu gihe gito gishoboka. Umunebwe ni umuntu ukora ikintu ntakirangize, n’indirimbo ntabwo ashobora kuyirangiza.

Nkanjye namubonyemo ko ari umuntu ukunda akazi ke, navuga ko The Ben ni umukozi, nk’umuntu twakoranye, tugasoza akazi neza kandi mu gihe gito, byanyeretse ko The Ben ari umuntu ugira umwete, ukunda akazi ke kandi akaba umunyamahoro.

Nasanze ari umuntu uguha umwanya wo gukora ibintu neza, akaguha ibitekerezo kandi noneho akaba umuntu ukunda Imana, uzi gusenga kandi wizera Imana.

Twese tuzi Imana ariko hari ubwo tuzi umuntu ukijijwe, The Ben ni umuntu mushobora gukorana mu mahoro, mukarangizanya umushinga neza.

Ikindi ni umuntu ushima, ni ubwa mbere nakoranye n’umuhanzi akanshimira. The Ben twamaze gukorana umushinga, arangije anshyira ku mbuga nkoranyambaga arambwira ati John warakoze.

Umuhanzi aba yaraguhaye amafaranga ye, ariko ni ubwa mbere nakoranye n’umuhanzi nyuma akamara kunyishyura amafaranga, ariko nyuma akajya mu ruhame, akanshimira. Ni ibintu ntari nabona ku wundi muhanzi.

Ni cyo gituma navuze ko The Ben ari umuntu ufite umutima, umuhanzi w’umunyamahoro kandi ukunda ibyo akora, bitandukanye n’uko hari abamwita umunebwe, baba babeshya, ni abatamuzi.

Reba zimwe mu ndirimbo zakozwe na John Elarts mu buryo bw’amashusho:

Amafoto ya John Elarts mu bihe bitandukanye


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .