00:00:00 IGIHE NETWORK KN KINYARWANDA EN ENGLISH FR FRANCAIS

Imikorere ya Polisi, Impinduka muri RCS, guhashya udutsiko tw’ubujura - Ikiganiro na Minisitiri Gasana

Yanditswe na Akayezu Jean de Dieu
Kuya 21 April 2022 saa 07:17
Yasuwe :

Umutekano ni wo musingi w’iterambere rya buri gihugu, ku buryo udahari, nta gikorwa na kimwe cyashoboka. Perezida Paul Kagame yashimangiye kenshi ko u Rwanda rushaka kuzamura ikiguzi cy’umutekano warwo, bityo ko uzagerageza kuwuhungabanya bizamuhenda.

Minisiteri y’Umutekano si nshya mu Rwanda, ariko mu 2016 inshingano zayo zaje gushyirwa muri Minisiteri y’Ubutabera, isubizwaho mu Ugushyingo 2019. Ni ukuvuga nyuma y’imyaka itatu.

Mu gihe ibikorwa byayo byari bitarashinga imizi, Gen Patrick Nyamvumba wari Minisitiri w’Umutekano yakuweho muri Mata 2020, nyuma y’amezi atanu gusa. Hongeye gutegerezwa umwaka umwe n’amezi atandatu ngo iyi minisiteri ibone umuyobozi mushya, Alfred Gasana.

Inshingano ni nyinshi, ariko n’ubushobozi ni bwose kuri Gasana. Yabaye umudepite mu Nteko Ishinga Amategeko y’u Rwanda kugeza mu 2011, aho yayoboye Komisiyo ya Politiki.

Yimuriwe mu Urwego rushinzwe Iperereza n’Umutekano w’igihugu (NISS), kugeza ubwo yashyirwaga muri Guverinoma yayoboraga Ishami rishinzwe Umutekano w’imbere mu gihugu. Ni ukuvuga ko inshingano ze zitahindutse, icyahindutse ni urwego azikoraho.

Mu kiganiro cyihariye yagiranye na IGIHE, Minisitiri Gasana Alfred yagarutse ku ngamba zo guhashya ibibazo bigihungabanya umutekano w’Abanyarwanda, imikorere y’inzego zishinzwe umutekano n’ibindi.

IGIHE: Umutekano muwusobanura mute?

Minisitiri Gasana: Ubundi iyo umuntu avuze umutekano wakumva nk’amahoro. Igihe umuntu afite amahoro ku giti cye nk’umuntu, ku mutungo we, ku byo agenerwa n’amategeko ugendeye kuri gahunda z’igihugu haba mu miyoborere myiza, mu mibereho myiza mu bukungu, mu butabera; ese ibyo bigenwa n’amategeko umuturage arabibona, cyangwa se bimugeraho uko bikwiye? Noneho no ku gihugu ubwacyo.

Mugendeye ku bipimo bigaragara, muri rusange umutekano uhagaze ute mu Rwanda?

Hari ibipimo bitandukanye byaba ibya hano imbere mu gihugu, byaba ibipimo mpuzamahanga bigenda bigaragaza uko umutekano w’u Rwanda wifashe.

Iyo ugiye nko muri Raporo y’Urwego rw’Igihugu rw’Imiyoborere (RGB) ukareba uburyo umutekano wifashe, uburyo abaturage babona Polisi y’u Rwanda n’ibindi, usanga ari ibintu bishimishije cyane.

Bitavuze ko twageze aho twifuza, ariko umutekano ni kimwe mu byo Abanyarwanda dufite nubwo hatabura rimwe na rimwe ibigararagara hirya no hino, aho abantu bashaka guhungabanya umutekano.

Minisitiri Gasana yahamije ko umutekano uhagaze neza, ariko ingamba zo kuwucunga zikomeza kujyanishwa n'igihe

Ni izihe nshingano z’ingenzi Minisiteri y’Umutekano yahawe?

Muri rusange, Minisiteri inshingano zayo zitangirira kuri politiki ijyanye n’umutekano mu gihugu, nimvuga politiki munumve amategeko ashyira iyo politiki mu bikorwa.

Ni uguhera kuri iyo politiki nyine mukareba niba inoze, niba koko igeza abaturage ku mutekano nk’uko bisabwa, cyangwa niba hari impinduka zikenewe kugira ngo iyo politiki inozwe.

Inshingano ya kabiri dufite ni ijyanye n’ubuhuzabikorwa. Buriya munsi ya Minisiteri haba hari ibigo biyishamikiyeho, aha nka minisiteri dushinzwe harimo Polisi y’u Rwanda, hakaba n’Urwego rw’Igihugu rushinzwe Imfungwa n’Abagororwa (RCS).

Urareba niba inshingano z’izo nzego zizishyira mu bikorwa, ese mu rwego rw’umutekano Polisi ishyira mu bikorwa inshingano zayo, ese mu rwego rw’Ifungwa n’Abagororwa (RCS) rushyira mu bikorwa inshingano zarwo zijyanye ahanini no kugorora, n’ibindi.

Minisiteri y’Umutekano rero kimwe mu byo ishinzwe ni ukureba ibyo bibazo bigenda bigaragara hirya no hino mu baturage, inzego zibishinzwe zirabikemura, na yo ibyo ishoboye kuba yakemura igafatanya n’izo nzego bigakemuka cyangwa igakora ubuvugizi hagati ya wa muturage na za nzego zishinzwe gukemura ibibazo, kugira ngo umuturage yumve afite umutekano nk’uko nabivuze.

Ikindi kiza nk’inshingano za minisiteri ni ubukangurambaga. Dushobora kuba tuvuga umutekano gutya ariko abaturage atari ko babyumva, cyangwa se dushobora kuba tuvuga tuti ’ibyaha runaka birimo kuzamuka’ umuturage atabifiteho amakuru.

Hakenewe ko umwegera ukamwereka uruhare yakagombye kugira mu iyubahirizwa ry’umutekano we n’ibindi n’ibindi.

Ibyo rero bikubirwa mu kintu kigari cy’ubukangurambaga, kugira ngo wa muturage yumve igikenewe, yumve uruhare rwe mu kubungabunga umutekano w’igihugu.

Ni ibihe bibazo bibangamiye umutekano muri iki gihe?

Uyu munsi icyo ushobora kubona kibangamiye umutekano ejo hashobora kuba hazamutse ikindi, bikaba bishobora guhinduka.

Umutekano rero ntabwo ugaragarira gusa ku byaha n’ibindi n’ibindi; ikintu cyose gituma umuturage adatekana, ikintu cyose gituma ya miyoborere myiza, imibereho myiza, ubukungu, ubutabera bidahabwa wa muturage, bigira ingaruka ku mutekano we.

Aha wenda nahera ku kibazo uyu munsi twese turi kubona; ikibazo cy’ibiza. Iki kibazo kiradukomereye iyo urebye hirya hino iyo imvura iguye, murabona inzu ziragenda, abantu barapfa, amatungo arapfa cyangwa, hakabaho gukomereka n’ibindi n’ibindi.

Icya kabiri navuga ni ikintu kitari cyiza rwose, ni ikintu cyo kwangiza ibikorwa rusange bya leta. Kiragenda kigaragara cyane, kuri aya matsinga y’amashanyarazi, ugasanga umuntu aritwikira ijoro aragiye atemye urutsinga rwagezaga amashanyarazi ku baturage n’ibindi.

Hari abagenda ukabona bararandura ibyapa bakajya kubigurisha mu byo bita "inyuma", biriya byuma bagenda bagapimisha ku biro bakabishyura n’ibindi n’ibindi. Ibyo bintu by’inyungu rusange ni ibintu byagakwiye kubahwa.

Icya gatatu navuga ni ibiyobyabwenge. Ngira ngo murabikurikirana hirya hino hari urumogi rugenda rufatwa, hari inzoga z’inkorano na zo zibarwa mu biyobyabwenge, ubona na byo biri ku rwego tugomba gushyiramo imbaraga tukabigabanya byanze bikunze kuko bigira ingaruka mbi ku buzima bw’Abanyarwanda.

Ikindi navuga gisaba ko abantu bashyiramo imbaraga ni ibijyanye n’impanuka, zaba izo ku mihanda, zaba impanuka zo mu bucukuzi bw’amabuye y’agaciro butemewe n’amategeko ndetse n’ubwemewe, hari aho batubahiriza amabwiriza ugasanga birahitana ubuzima bw’abantu.

Ikindi, hari ikintu cyitwa gufata abana n’abagore ku ngufu. Rwose kiragenda kigaragara hirya hino, ngira ngo kinakeneweho ahubwo ubushakashatsi bwihariye kuko kigeze n’aho ubona umubyeyi yafashe umwana we ukiri muto.

Umwana w’imyaka itanu ise akamufata, wakurikirana akakubwira ati ’nari nabuze uko nigenza mama we ntawe uhari yagiye ku isoko…’ ibintu bidasobanutse. Ni ibintu rwose ubona bikeneweho ubushakashatsi bwihariye.

Minisitiri Gasana hamwe n'abayobozi bakuru ba Polisi y'u Rwanda

Nihe handi mubona hagikeneye kongerwa imbaraga ?

Uko abantu bicara bafata ingamba runaka noneho abagizi ba nabi cyangwa abafite inyungu mu guhungabanya umutekano bakabona ko bari gutahurwa, bahindura ubundi buryo.

Urugero nk’ibyaha bikorewe ku ikoranabuhanga ntibyagaragaraga cyane mu bihe bishize, ariko ugenda ubona ko bizamuka, n’inbindi n’ibindi.

Impamvu mvuga ibyo ni iyihe? Ni ukuvuga ngo uko ibihungabanya umutekano bigenda byihinduranya ni nako ufata ingamba mu kubungabunga umutekano na we agomba kugenda ahindura buri gihe.

Urugero naguha, wenda mu bihe byashize na n’ubu kandi, ibintu bijyanye n’iterabwoba, urongera ukareba uburyo twari twicaye, uburyo twari dupanze mu rwego rwo kubungabunga umutekano, ntabwo twashyiraga imbaraga cyane mu guhangana n’ibikorwa by’iterabwoba.

Ni kenshi byumvikana ko umupolisi yarashe umuntu yari afashe cyangwa yari arinze. Mubivugaho iki?

Iyo urebye inshingano za polisi y’u Rwanda, usanga ishinzwe abasinzi, usanga ishinzwe abajura, ishinzwe abafite ubumuga bwo mu mutwe, ishinzwe indaya na ba bajura babigize umwuga n’ibindi, harimo n’abibisha intwaro n’ibindi n’ibindi.

Reka wenda ntange nk’urugero uyu munsi rw’abajya mu bucuruzi butemewe bw’ibiyobyabwenge mu turere twa Burera, Gicumbi na Nyagatare bitwa Abarembetsi.

Bariya barembetsi wenda abatabazi, bajya guforoda kanyanga mu bihugu duturanye noneho bakazinjirana mu buryo butemewe n’amategeko, nubwo n’ubucuruzi bwa kanyanga n’ubundi buri mu byo tutemera mu rwego rw’amategeko.

Polisi rero mu kubungabunga umutekano igira ibikoresho ikoresha, uburyo bikoreshwamo bugenwa n’amategeko.

Urugero gukoresha intwaro, ugomba kureba umuntu ugiye kuyikoreshaho we yitwaye ate, ese udakoresheje iyo ntwaro ufite ntashobora kukugirira nabi, n’ibindi. Ni muri ubwo buryo zikoreshwamo.

Wa wundi ufite igisongo aje agusanze, ushinzwe kumufata n’ibindi, ariko ubanza kumugaragariza ko ushobora kumurasa, harimo kuba warasa hejuru n’ibindi, bikagera aho baraswa.

Iyo bimaze kugenda gutyo birakurikiranwa, abantu bakareba koko niba byakozwe mu buryo bugenwe cyangwa niba nta gukabya byabayemo, bityo hagafatwa ibyemezo bikwiye.

Ariko muri rusange uburyo bikorwamo buteganywa n’amategeko. Polisi mu bikoresho ifite mu kubungabunga umutekano harimo imbunda, kandi ngira ngo turabizi twese iyo ushatse guhungabanya umutekano w’umuntu uwo ari we wese, na we kwitabara arabyemerewe, ni ahongaho bikorwa gutyo.

Habayeho gukorwa mu buryo burengereye nabyo birakurikiranwa, uwabikoze akabibazwa n’amategeko.

Hari uduce usanga tuvugwamo ubugizi bwa nabi n’ubujura bukabije. Mukora iki ngo ibyo bibazo bicike?

Ushobora gusanga bavuga bati iyo ugeze ahitwa Dobandi (de bandits), mu Isi ya Cyenda cyangwa se n’ahandi ku mugoroba barakwambura, ibintu nk’ibyo. Icyo navuga iyo bimenyekanye hafatwa icyemezo, ibyo bikarangira.

Abaturage bagomba kugira uruhare, kwa gutanga amakuru, kwa kugira uruhare mu gukora amarondo n’ibindi n’ibindi. Buriya iyo bimeze gutyo bikagaragara ko mu gace runaka abajura bahibasiye, ingamba zirafatwa kandi kigakemuka.

Wakomoje ku mavugurura muri RCS. Ni ibiki biteganywa ?

Izina rishya turi gushaka ko urwego rwacu rwitwa ni Urwego rw’Igihugu rushinzwe Igorora.

Imwe mu mpamvu zituma habaho gufunga ni ukugorora, ni ugutegura uwakoze icyaha kuzasubira mu muryango w’abantu ari muzima.

Icyo kintu rero turashaka kugishyiramo imbaraga mu buryo bukomeye, umuntu ntazafungwe yibye ikintu gitoya ngo azasohoke ari umwicanyi, n’ibindi n’ibindi.

Uyu munsi iyo urebye ku bipimo mpuzamahanga, ubundi umucungagereza umwe yakabaye acunga abafungwa 12, twebwe uyu munsi usanga ari umwe ku bafungwa 40. Byumvikana ko bitoroshye.

Unarebye abo dufunze ni abantu baba bafite imyumvire itandukanye, ni abantu baba barahamijwe n’inkiko cyangwa bakurikiranyeho ibikorwa bitandukanye bakoze binyuranyije n’amategeko, bakaba bari kubibazwa n’ibindi.

Ku buryo ubundi umuntu umwe gucunga abantu 40 rwose ntawe bitatera impungenge, ariko ni ko kuri guhari, ni ko bimeze.

Kugira ngo rero tuzagende dusohoka muri icyo kibazo birumvikana bigendana n’ubushobozi bw’igihugu, ariko dufite ishuri ritoza abashaka kuba abacungagereza, rimaze igihe gito ritangiye ariko urebye uyu munsi abo riri gutoza na gahunda iriho kugira ngo nibavamo hazashyirweho ikindi cyiciro n’ibindi, ubona icyo kibazo kizagenda kigabanuka.

Ni uruhe ruhare abaturage bakwiye kugira mu kwicungira umutekano ?

Ubundi abaturage nk’uko nabivuze bagomba kugiramo uruhare. Kwa gutanga ya makuru, kwa kugira uruhare mu ikorwa ry’amarondo n’ibindi n’ibindi.

Buriya iyo bimeze gutyo, bikagaragara ko mu gace runaka abajura bahibasiye, rwose ingamba zirafatwa.

Wenda nguhaye urugero muri kiriya kibaya cya Ndera, mu bihe byashize hari igihe byigeze kugaragara ko hari abajura bahategera abantu bakabatera ibyuma n’ibindi. Ariko byamaze kugaragara abantu baganira n’abaturage, buri wese areba uruhare rwe, ingamba zirafatwa, ikibazo kirakemuka.

Uyu munsi ntiwavuga ngo hariya ntiwahanyura n’ibindi n’ibindi, ibyo ni ibyo mu bihe byashize. N’uyu munsi rero iyo makuru amenyekanye rwose ingamba zirafatwa.

Ariko mu ngamba zifatwa, harebwa icyakagombye kuba kirimo gukorwa kitari gukorwa, haherewe ku ruhare rw’umuturage, hagakomerezwa ku nzego z’umutekano mu buryo bwihariye, noneho n’imikoranire y’izo nzego n’ubuyobozi.

Iyo amakuru atangiwe igihe utwo duce tukamenyekana n’ubundi rwose icyo kibazo kirakemuka.

Mu Ukuboza 2021 nibwo Minisitiri Gasana yashyikirijwe inshingano za Minisiteri y'Umutekano, zari zimaze igihe zibarizwa muri Minisiteri y'Ubutabera. Aha yari kumwe na Minisitiri w'Ubutabera Dr Ugirashebuja Emmanuel

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .