00:00:00 IGIHE NETWORK KN KINYARWANDA EN ENGLISH FR FRANCAIS

U Rwanda rwariyubatse ariko Uganda tubona ubu yubatswe n’u Rwanda

Yanditswe na Rizinde M. Shaffiy
Kuya 7 May 2019 saa 04:06
Yasuwe :

Amezi abaye menshi ndetse bibaye imyaka, hagati y’u Rwanda na Uganda ibihugu by’ibituranyi kandi by’ibivandimwe, bihuriye kuri byinshi mu mateka no mu mibereho y’ababituye havugwa ibibazo bya politiki n’umutekano.

Ibibazo buri wese abona ukwe ashingiye ku byifuzo bye, abahanga mu bumenyamuntu bavuga ko “Ibyifuzo by’umuntu bigira uruhare (influence) mu buryo abonamo ibintu”.

Ufashe ifoto y’abantu bari ku meza barya, ariko itagaragara neza, ukayereka abantu bashonje, 80% muri bo bahita babona ko ari abantu barimo kurya kandi ibiryo biryoshye, ariko 35% by’abahaze bamaze kurya nibo bonyine bashobora kumenya ko abo bantu bicaye ku meza barimo kurya kandi ibiryo batazi ibyo ari byo. Ubu ni ubunararibonye “experience” bwakozwe n’Umuhanga mu by’Ubumenyamuntu w’Umunya Austria witwa “Sigmund Freud”.

Amateka u Rwanda rwanyuzemo kuva mbere y’ubukoloni n’igihe cy’ubukoloni na nyuma yabwo kugeza mu 1990 hatangiye urugamba rwo kubohora u Rwanda, kugeza ku rugamba rwo guhagarika jenoside yakorewe abatutsi mu 1994, yatumye imyumvire y’Abanyarwanda ndetse na gahunda z’ibihugu byamenyereye guhaka ibindi n’ibishaka kubyigana, bigira uburyo bunyuranye bumvamo u Rwanda.

Muri iyo myumvire inyuranye, niho dusanga Abanyarwanda bashutswe n’abakoloni na politiki zakurikiye ubwigenge bwa nyirarureshwa ko aribo ba nyir’igihugu n’ibyiza by’igihugu, byaba bicye byaba byinshi ari umwihariko wabo.

Kuboneka kw’iyo myumvire na none byatumye haboneka abandi banyarwanda bafite umutima wo gukunda igihugu, bagamije kukibohora no kugikura mu myumvire y’ubukoloni n’ubwikanyize bakacyubaka bakagiteza imbere kikaba igihugu cyubahise gifite ijabo n’ijambo, abo batangije urugamba rwo kurubohora mu 1990, nyamara kwangirika mu myumvire byatumye muri abo bakunda igihugu, habonekamo bamwe bacye ku bw’amahirwe y’u Rwanda bumvaga ko baje gusimbura abikanyije ibyiza by’igihugu, maze nabo bakabigira umwiharuko wabo ibyo biba impamvu yabo yo kurwana urugamba rwo kubohoza igihugu, abo batakaje intego bashyira imbere impamvu bwite.

Ayo mateka niyo yatumye haboneka umubare munini w’Abanyarwanda bahungiye mu bihugu bituranye n’u Rwanda guhera mu myaka ya 1959 abenshi ndetse bahungiye mu gihugu cya Uganda, abo bahungiye muri Uganda bahasanze abandi banyarwanda bakomeje gusuhukirayo mu bihe byinshi binyuranye, bashakayo ubukata bwo guhinga n’akazi ko guca inshuro, abo nabo bahasangaga abandi bafite inkomoko y’u Rwanda Rugari, rwagabanyijwe n’abakoloni n’inama ya Berlin yo mu 1884, abo babaye abaturage ba Uganda ariko bakomoka mu Rwanda rwaguwe rukanubakwa n’Abakurambere b’intwari z’u Rwanda.

Uganda yahuye n’ubutegetsi bw’igitugu kuva ibonye ubwigenge kugeza magingo aya, muri ubwo buyobozi bw’igitugu, hagiye haboneka abaturage bamwe biharira ibyiza by’igihugu nk’uko byagendekeye abanyarwanda ndetse n’ibihugu byinshi bya Afurika.

Ibyo byabaye intandaro y’intambara nyinshi zo kubohoza Uganda ariko zagiye zinanirwa kugera ku ntego zazo, mu myaka ya za 80 hatangiye intambara y’indi yo kubohora Uganda yari iyobowe na Yoweri Kaguta Museveni wari umaze gutsindwa mu matora azize inkomoko ye. Kaguta akomoka mu bice byari u Rwanda cyera abakoloni babyomeka kuri Uganda, ni uwo muri bya bice twavuze by’Abanyarwanda bahuriye muri Uganda kubera ya mateka.

Abahanga mu mibereho y’abantu bavuga ko ikintu kimwe gituma abantu bashobora gutegeka isi, ari uko bafite ubushobozi bwo kwishyira hamwe no gukorera hamwe kurusha uko ibindi binyabuzima bifite ubwo bushobozi, nyamara ukwishyira hamwe kose kugira inyungu gushingiraho, uko niko u Rwanda n’abakomoka ku Rwanda babaye inyungu yo gushingiraho mu kubohoza Uganda, babigeraho mu 1986.

Abanyarwanda babereye Kaguta Museveni imfura nk’uko bisanzwe, bamufasha gushyira igihugu ku murongo, bahashya imitwe y’inyeshyamba, ariko igihe cyagombaga kugera bagatekereza ku gihugu cyabo, niko byagenze mu 1990 batangiza urugamba rwo kubohoza u Rwanda.

Kimwe n’abanyarwanda bamwe bari bafite impamvu zisumba intego yo kubohoza igihugu, na Yoweri Kaguta Museveni yari afite impamvu yo gushyigikira ko Inkundagihugu-Inkotanyi zitsinda intambara yo kubohoza u Rwanda, impamvu ikomeye kuri we yari ukwagura imipaka ategeka kimwe na ba mpatsibihugu bandi bose, ariko na none u Rwanda yarubonagamo isoko rikomeye ku Bugande n’Abanya-Uganda.

Igikomeye kurusha ibyo, ni uko abandi baturage ba Uganda batigeze biyumvamo ubuyobozi bwa Yoweri Kaguta Museveni, kubera bya bibazo twavuze by’inkomoko, umutekano w’ubuyobozi bwa Yoweri Kaguta Museveni, bwagombaga gukomeza gushingira kuri ya nyungu “centre d’intérêt” yitwa u Rwanda, ariko ikibazo kiba uburyo yabyumvaga n’uko yashakaga kubigeraho.

Inzira ye yabaye mpatsibihugu. Nyamara ntabwo umuntu ukunda u Rwanda yari kwemera ko u Rwanda ruba mu buhake bwa Uganda, amaraso yamenetse ngo hubakwe igihugu cyubahitse yari kuba abaye impfabusa.

Hari ubundi buryo buteganywa n’amategeko mpuzamahanga n’imibanire y’ibihugu yari gufasha Yoweri Kaguta Museveni gukomeza kwiringira ya nyungu yo gushingiraho, ibyo bikanyura mu masezerano y’ubufatanye, ubuhahirane no gutabarana hagati y’ibihugu byombi, ariko si uko Museveni yabyumvise cyangwa yabishatse, ahubwo kuri we yumvaga yaba Perezida w’ibihugu bibiri, Uganda n’u Rwanda. Imfura z’u Rwanda zarukuye mu rwobo, ntabwo zabyemeye kuko binyuranyije na ya ntego ngari yo kubaka u Rwanda rwubahitse.

Kwihagararaho k’u Rwanda rero nibyo bituma Uganda igambanira ubuyobozi bw’u Rwanda, umugambi nyamukuru ukaba gukuraho ubuyobozi no kubusimbuza ubwo izakoreramo kubera za nyungu twavuze haruguru, iki kibazo buri wese akacyumva akanagifata bijyanye n’ibyifuzo bye n’impamvu ze.

Abarwaniye impamvu zabo batitayeho intego nyamukuru, bumva bakwiye gufatanya na Uganda guhindura u Rwanda ubuhake bwa Kaguta Yoweri Museveni ku nyungu zo kurinda ubuyobozi bwe, abari barigize ba nyir’igihugu kurusha abandi bari kuri wa mugani w’Abanyarwanda ngo tura tugabane niwanga bimenekere aho, buri wese rero akumva ikibazo hashingiwe ku byifuzo bye nk’uko “Sigmund Freud” yabigaragaje muri rya genzura yakoze.

Ariko mu kuri Abanyarwanda bari ku ntego, intego ngari yo kubohoza no kubaka igihugu nibahumure, buriya ubugabo bureberwa ahandi ntabwo baburebera mu butumbi nk’uko abanyarwanda babivuga, hari abo njya numva bavuga ko ubuyobozi bw’u Rwanda bufitiye ishyari ubwa Uganda, ariko nta kintu na kimwe gihari u Rwanda rwagiriraho Uganda ishyari.

U Rwanda kuva mu mateka yarwo ya cyera rwariyubatse, ntabwo rwubatswe n’ubukoloni nk’uko Uganda byayigendekeye, intwari z’u Rwanda zararurwaniye zirarwagura ruba igihugu kiganje, mu gihe Uganda yubatswe n’imipaka yashyizweho n’abakoloni, ndetse banakeba u Rwanda barwomeka kuri Uganda, n’ubwo abantu bashaka kumvikanisha ko Uganda ikize kurusha u Rwanda, ariko ntibaba barebye ukuri kw’ubukire n’ibishingirwaho bavuga ubukire.

Icyegeranyo cya Banki y’Isi cyo muri 2017 cyerekana ko Uganda yinjiza amafaranga angana n’amadolari ya Amerika Miliyari 25.89 mu mwaka, ariko umuturage wa Uganda abarirwa amadolari ya Amerika 604, mu gihe u Rwanda rwinjiza amadolari y’Amerika Miliyari 9.137 ariko umuturage w’u Rwanda akabarirwa amadolari 748, bisobanura ko mu rwego rw’ubukungu ku muturage umunyarwanda ari hejuru y’Umunya-Uganda.

Kugeza mu mwaka wa 2017 ubukungu bwa Uganda buzamuka ku rugero rwa 4%, mu gihe ubukungu bw’u Rwanda buzamuka ku kigero cya 6.1%, tutiyibagije ko u Rwanda kubera politiki mbi zaruranzwemo mbere ya 1994 na Jenoside yarusenye kugeza munsi ya zero.

Abibeshya rero ko u Rwanda rwabeshwaho na Uganda, ni ibyifuzo n’imyumvire ibishingiyeho, u Rwanda rwubatswe n’u Rwanda mu gihe Uganda tubona ubu yubatswe n’u Rwanda. Rero ubugabo si ubutumbi.

Iki ni igitekerezo cy’umusomyi wa IGIHE, Rizinde M. Shaffiy


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Special pages
. . . . . .