00:00:00 IGIHE NETWORK KN KINYARWANDA EN ENGLISH FR FRANCAIS

Ibihano umurezi akwiriye gutanga bigakosora umwana aho kumuhungabanya

Yanditswe na Ferdinand Maniraguha
Kuya 20 June 2016 saa 09:18
Yasuwe :

Mu Rwanda rwo hambere mu gihe cy’ubukoloni ndetse na nyuma yaho, inkoni cyangwa akanyafu ku bana byafatwaga nk’igikoresho cyo kubagorora, haba mu makosa bakoraga mu rugo iwabo cyangwa ku ishuri.

Ubu buryo bwo kubabaza umubiri kugira ngo imyifatire ihinduke bwakoreshejwe kuva kera mu kinyagihumbi cya mbere, ubwo Kiriziya Gatulika y’icyo gihe yemeraga ko “Umubiri ari Irimbi rya Roho”.

Bemeraga ko kugira ngo roho ibashe kuzamuka iva mu mubiri igana Imana, byasabaga kubabaza cyane uwo mubiri, bisa no gufungura imva kugira ngo roho yoroherwe kwegera Imana.

Nyuma ariko Kiriziya yaje kubikosora yerekana ko “Umubiri ari Ingoro ya Roho”, kuva ubwo umubiri w’umuntu wari usubijwe agaciro kawo wari warambuwe.

Tugarutse ku bihano rero bihabwa abana bacu mu ngo cyangwa ku ishuri, tugomba kubanza kuzirikana ko umwana afite uburenganzira bwo gukosa imbere y’amaso y’umuntu mukuru, kuko imbere y’amaso y’uwo mwana, rimwe na rimwe ntabwo aba abibona nk’ikosa.

Aba bana tuvuga aha ngaha ni abari munsi y’imyaka 12, bakiri mu mashuri abanza.
Ubushakashatsi bwerekana ko ibihano biri mu bice bine.

1. Ibibabaza umubiri

Urugero ni nko gukubita, gupfukamisha,….. Iki gihano kiri muri iriya myumvire ya kera twabonye hejuru.

Gusa abakurambere babibonye kare kuko baciye umugani ngo “Inkoni ivuna igufa ntivura ingeso”.

2. Gushyira mu kato

Urugero ni nko guhagarika umwana mu mfuruka y’ishuri, cyangwa kumwambika inzogera mu gihe cyo gukina.

Aha ikigamijwe kiba ari ukumugaragaza ngo n’abandi babone ko yakosheje nyuma yikosore.

3. Igihano cy’akazi, cyangwa umwitozo

Urugero ni uguha umwana wakosheje mu ishuri igihano cyo kwandika ijambo iri n’iri ishuro 100, 200… cyangwa kumubwira ngo natoragure imyanda iri ku kibuga cy’ishuri, kumuharuza ibyatsi n’ibindi.

Iki gihano, kimwe n’icya kabiri cyo gushyira mu kato, ntibiba bigambiriye kubabaza umubiri, ariko nabyo binaniza umwana cyane mu mutwe, kuko aba asa n’uwavuye mu bandi, bityo bikamutera igisebo.

4. Igihano cyo kubuza umwana gukora iki n’iki

Kumubuza kujya gukina n’abandi akaguma mu ishuri, kumusohora mu ishuri umwanya muto, kubuza umwana gusohoka abandi basohotse, kumubuza kureba televiziyo kuko yakoze ikosa iri cyangwa ririya, kumufungirana mu cyumba cye, kutamugurira icyo wamwemereye ngo yakosheje n’ibindi.

Hari ikindi gihano tutashyize muri biriya kitwa ibitutsi, amagambo mabi asesereza nko kumubwira ngo niko cyabaye, dore uko gisa, kirusha amafuti ingurube, igicucu gusa n’ayandi.

Dore bimwe mu bikomere n’ingaruka z’ibyo bihano iyo bibaye kenshi ku mwana:

Ibi bihano byose icyo bihuriyeho, ni uko bitewe n’uburyo kenshi bitangwa hatitawe ku kureba imyaka umwana afite, imyifatire iranga ikigero arimo, impamvu zatumye akora ikosa izo ari zo, ntabwo bitanga igisubizo byari bitegerejweho, ahubwo bishobora no kumuhungabanya ku buryo bukomeye.

Ashobora gutera icyizere ababyeyi, (abarezi) ndetse nawe akitera icyizere, kuko aba yumva ntacyo ari cyo, ntacyo ashoboye, bikamuviramo kwiheba, kwigunga, kwanga ishuri cyangwa ababyeyi.

Umwana kandi ashobora kujya mu muhanda cyangwa ahandi gushaka abamwumva, kunywa inzoga n’ibindi biyobyabwenge kugira ngo bimufashe kwibagirwa ubuzima arimo, n’ibindi byinshi.

Inama ku babyeyi n’abarezi

Ababyeyi n’abarezi bagombye kumenya ko igihano iteka kijyana n’ikosa ryakozwe, kandi kigamije gufasha umwana guhindura imyifatire.

Dore bimwe mu bibazo dukwiye kwibaza mbere yo guhana umwana:

Ese ibi yakoze yari azi ko ari bibi? Ese nta ruhare na ruto jye naba mfite mu gutuma akora iri kosa? Ese igihano ngiye kumuha gihuye n’ikosa yakoze? Ese ni ngombwa kumuhana? Ese nta bundi buryo nakoresha mu kumufasha guhindura imyifatire? Ese nasubira agakora iri kosa, nzasubira muhe iki gihano, nzagikuba kabiri cyangwa nzamuha ikindi ?

Reka mbahe ingero nke z’ibihano byari bikwiriye bitewe n’ikosa yakoze, Umwana amennye igikoresho cyo mu rugo, mbere yo guhana uyu mwana urabanza wibaze uti "Ese kiriya gikoresho cyari aho kigomba kuba kiri? Ese umwana yakimenye abigambiriye? Ese ni ngombwa ko muhana? Niba ari ngombwa ndamuhanisha iki?"

Kumukubita byo ni i ibyo kwirindwa cyane kuko ni icyaha gihanwa n’amategeko mpanabyaha mu Rwanda.

Kubanza kumwumva kandi utuje, niyo ntambwe ya mbere, iya kabiri ni ukumwumvisha ikosa yakoze no kumusaba kwitondera ibintu bimeneka mu nzu kuko nawe ubwe bimufitiye akamaro.

Reka tuvuge ko ari ikirahure cyo kunywa amazi yamennye. Niba ari ngombwa kumuhana, ni ukumubuza kuzanywesha ikirahuri amazi mu gihe cy’iminsi mike.

Urugero, akanywesha ibikombe bitameneka. Iki gihano kijyanye n’ikosa yakoze, kandi kiramwigisha, kiramukosora. Naho kumukubita, kumubuza kujya gukina, kumubuza kureba televiziyo, n’ibindi, ntaho bihuriye n’ikosa.

Reka na none dutange urugero rw’umwana usakuza kenshi mu ishuri. Niko Mwali, urumva wamuha ikihe gihano? Jye namutegeka kumara isomo ryose abumbye umunwa aho kumusohora mu ishuri, kumukubita n’ibindi! Iki gihano nacyo kijyanye n’ikosa yakoze kandi kiramukosora.

Umwana ukunda gukubita abandi bana iyo bari gukina ku ishuri cyangwa mu rugo, ushobora kumubuza gukina n’abo bana mu gihe gito.

Tureke abana babe abana, nti ubagire bakuru mbere y’igihe, tubaganirize kenshi tubumve, tubereke imyifatire ikwiriye umuntu, tubahe ibihano bibafasha kuyobora amarangamutima n’ibyiyumvo byabo aho kubahungabanya no kubatera ibimungu mu mutima.

Iyi nkuru ni igitekerezo cya Dr Alphonse Sebaganwa, umwarimu muri Kaminuza y’u Rwanda,Koleji y’Uburezi.

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Special pages
. . . . . .