00:00:00 IGIHE NETWORK KN KINYARWANDA EN ENGLISH FR FRANCAIS

Amwe mu makosa akorwa n’ababyeyi bazi ko bagirira neza umwana mu myigire

Yanditswe na

Dr Alphonse Sebaganwa

Kuya 17 May 2016 saa 10:02
Yasuwe :

Dr Alphonse Sebaganwa, umwarimu muri Kaminuza y’u Rwanda,Koleji y’Uburezi , yatanze igitekerezo ku bijyanye no kuba ababyeyi bananiza abana ku bijyanye n’umukoro (homework) bahabwa iyo bavuye ku ishuri.

Mu rukurikirane rw’ibiganiro ku burezi twabagejejeho mu minsi ishize, twifuje kuvumbura amatsiko yanyu no kuganira ku munaniro ababyeyi batera abana buri mugoroba ku bijyanye n’imikoro cyane cyane abana bo mu mashuri abanza.

Dr Sebaganwa yagize ati « Umwana apfa kugera mu rugo ananiwe avuye ku ishuri, yahasanga umubyeyi ati ‘mwize iki’ ! Ubwo ugiye kumusaba gusubira mu masomo na wa munaniro avanyeyo.Hagashira akanya gato uti ’nyereka umukoro wazanye ! Ibiganiro byinshi bikaba byerekeranye n’amasomo! Mu kandi kanya umwarimu akaba arahageze ati fata amakaye dukore “homeworks”.

Twumve neza ko umwana ava ku ishuri ananiwe tumuhe akanya ko gutekereza no gukora ibindi bitajyanye n’amasomo ariko kandi bitari na televiziyo, ’smart phones’, n’indi mikino ikoreshwa amashusho.

Ese nta turimo two mu rugo, nko gutoza umwana gutegura icyumba aryamamo, guhanagura inkweto ze, kumesa utwenda twe tw’imbere, gukina hanze n’abandi bana, koza amasahani, gutegura mu nzu, gusoma ibitabo bitari iby’amasomo n’ibindi...?

Ibi byagira uruhare mu kuruhura abana umunaniro bakuye ku ishuri mbere y’uko bakora ya mikoro bazanye.”

Twafasha dute abana gukora imikoro y’ishuri tutabavunnye?

1. Gukorera ahantu hamwe (igihe cyose) hatunganye kandi hatari urusaku cyangwa abandi bahanyura buri kanya.

Ntabwo ari byiza gukorera uyu munsi mu cyumba cy’uruganiriro (salon), ejo mu cyumba cyo kuryamamo, ejobundi mu ibaraza, ejobundi buriya mu busitani…

2. Gukura ibintu bidakenewe ku meza umwana agiye gukoreraho, kuko hari ubwo birangaza umwana kandi atari ngombwa.

3. Gufashwa n’umuntu umwe gusa iyo bishobotse: ntabwo ari byiza ko uyu munsi umwana afashwa na papa, ejo na mama, ejobundi na mukuru we, ejobundi n’umukozi wo mu rugo n’abandi.

Impamvu ni uko buri wese muri aba aba afite uburyo bwe (approach) butandukanye n’ubw’undi bigatuma umwana bimuvangira ntagere no ku musaruro wifuzwaga.

4.Gukorera ku isaha idahinduka kuko bituma umwana amenyera gukorera ku masaha, ndetse yaba ari na wenyine akamenya aho agomba kuba ari kuri iyo saha.

5. Ku mwana uri munsi y’imyaka 12, si byiza ko arenza iminota 30 akora (yiga) atararuhuka (pause, break).

Twibuke ko aba amaze amasaha agera cyangwa arenga atanu ku ishuri, kandi ntiyagombye kurenza iminota 30 inshuro ebyiri, ni kuvuga iminota mirongo itandatu yiga cyangwa akora umukoro.

6. Kumufasha gusubiramo isomo ry’umunsi rijyanye n’umukoro bahaye umwana, nyuma akaba ari we wikorera umukoro.

Umukoro ni uw’umunyeshuri si uw’umubyeyi cyangwa undi ufasha umwana, iyo arangije kwikorera umukoro (devoir), ugerageza kumwereka amakosa arimo niba hari ayo yakoze, akaba ari we uyikosorera ubwe.

Iyo bimunaniye ntubimukorera, uramureka akabijyana atyo ku ishuri bukeye kugira ngo mwarimu amenye neza aho agomba gushimangira amaze kubona amakosa abana bakoze.

Naho ubundi, niba umwana akorerwa umukoro hafi ya 50% cyangwa birenga, bwacya mwarimu yakosora agasanga yabitsinze byose akikomereza amasomo ati “abana baratsinda neza” kandi atari byo, uba uhemukira umwana.

Ntabwo ababyeyi bagomba gusimbura umwarimu, umwana yagombye gufatira ku ishuri byibura 70% y’ibyo yize, ishuri rero rifite inshingano zikomeye zidasimburwa n’ababyeyi.

7. Kudafashiriza abana barenga umwe ahantu hamwe no ku isaha imwe (muri groupe), ni byiza ko buri mwana afashwa ku giti cye kuko iyo ubafashije ari benshi, bashobora kudakora neza!

Ababishoboye muzagerageze ibi murebe muzambwire.

Dr Alphonse Sebaganwa, PhD, Umwarimu n’Umushakashatsi muri Kaminuza y’u Rwanda, Ishami ry’Uburezi
[email protected]

Dr Sebaganwa Alphonse, Umwarimu akaba n'umushakashatsi muri Kaminuza y'u Rwanda ishami ry'Uburezi

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Special pages
. . . . . .