00:00:00 IGIHE NETWORK KN KINYARWANDA EN ENGLISH FR FRANCAIS

Abagore bahirimbanira uburenganzira bwabo: Ese ubu iherezo ni iri?

Yanditswe na Uwanyiligira DeLucco Claudine
Kuya 19 April 2019 saa 09:26
Yasuwe :

Tariki ya 22 Werurwe 2019, ikirere cya Washington DC, cyari gikonje cyane ariko ntibyambujije kwishimira ubutumire bw’Ikigo gishinzwe Amahoro muri Amerika (USIP) bwo kwitabira inama y’abayoboye imiryango ihirimbanira uburenganzira bw’abagore mu mahoro.

Ubwo twari dutegereje kunyura mu byuma bibungabunga umutekano, umwe mu bagore nabonaga afite akanyamuneza ku maso yaranyegereye aseka arambaza ati ‘Waba uri uw’ino?’ Nanjye musubiza mwenyura, nti “ni mpamvu ki wifuza kubimenya?”.

Igisubizo yampaye cyaratangaje.Yambwiye ko ngo yabonaga nsuhuza buri muntu wese n’abo ntazi kandi mbasekera mu masaha y’igitondo gikonje bikabije nk’icyo kandi ngo ubundi ari ibintu bidakunze kubaho kenshi muri kiriya gihugu!

Uyu mugore wakomeje kumwenyura cyane, yungamo agira ati ushobora kuba uturuka muri Afurika kuko niho abantu bahora bishimye kandi amakuru bakura mu itangazamakuru ngo agaragaza ko tubayeho ubuzima bugoye. Nuko ambaza uko tubigenza n’ibanga dukoresha.

Ntaciye ku ruhande, namubwiye ko nturuka muri Afurika by’umwihariko mu gihugu cyitwa u Rwanda. Nti ‘kandi muri rusange tumeze neza nk’uko ubireba. Nti ‘hagati aho ahubwo natwe muri Afurika iyo tureba amakuru aturuka ino tubagirira impuhwe n’impungenge.

Ubwo ansubiza bwangu ko itangazamakuru hari ubwo rikabya. Ati “Ibyago bike bigwira abantu ntibikwiye kuba aribyo bitanga ishusho y’abo aribo muri rusange. Nti ‘ni ibyo rwose’. Hari ibintu byinshi byiza Afurika igeraho ariko ibibi akaba aribyo bishyirwa imbere mu itangazamakuru ryo muri ibi bihugu by’ino kandi turi ku rugamba rwo guhindura iyo myumvire.

Mu ijwi ryaje risa n’iry’umuntu ushaka guhangana yahise ambaza ati ‘tukivuga ku byagezweho bifatika, niba uturuka mu Rwanda urakora iki hano? Nta nyungu ufite hano. Igihugu cyawe nicyo kiyoboye Isi mu kugira umubare munini w’abagore mu Nteko Ishinga Amategeko.’

Ako kanya nahise ntangira kwibaza byinshi. Nti ‘ese ahubwo yari kuvuga iki iyo amenya ko Guverinoma y’u Rwanda igizwe n’abagore bangana na 50 % ndetse ko n’umugore barimo kuganira ari umwe mu bayobozi mu Rwanda?.

Ese yari kongeraho iki iyo amenya ko mu Rwanda guha umugore agaciro ntawiriwe abirwanira ko ahubwo Perezida w’u Rwanda ubwe akunze kuvuga ko guha abagore amahirwe yo gutanga umusanzu wabo bitakabaye ibintu bigoranye kwiyumvisha.

Mu buzima busanzwe, unahereye kuri iyo nkuru nziza iryoshye ibara, sinari nkwiye koko kujya muri icyo cyumba cy’abagihirimbanira uburenganzira ku bintu bisanzwe. Ngirango ahubwo nakagombye kuba narimo gushakisha ikindi cyumba cyakabaye kirimo abaganira ku nsanganyamatsiko yakabaye igira iti “Ikibazo kiraza ishinga abanyarwandakazi bari mu buyozi: Dukora iki ngo tudatenguha icyizere twagiriwe?’’

Gusa ikibazo ni uko u Rwanda atari igihugu kiva cyangwa kiba mu buzima busanzwe. Nk’ubu, mu gihe u Rwanda rwibuka ku nshuro ya 25 Jenoside yakorewe Abatutsi mu 1994, nk’umugore ndetse wacitse ku icumu rya jenoside yakorewe Abatutsi nkaba n’umuturage w’iyi Isi muri rusange, numvaga neza ko mfite inshingano zikomeye zo kuba ahantu hose hashoboka hateraniye abantu baganira ku mahoro nk’imwe mu nzira zo gucubya amakimbirane nk’ayagejeje u Rwanda mu kaga.

Mu by’ukuri, ubwo nemeraga ubutumire bwa USIP, sinari ngamije kujya kwiratana ko nkomoka mu Rwanda; igihugu cyahiriwe no kugira ubuyobozi butera abagore ijabo, mu gihe bagenzi banjye twahuriye mu kiganiro bavugaga inkuru zivuga akaga n’intambara banyuramo mu guharanira uburenganzira bwa muntu bw’ibanze. Reka da.

Ahubwo nishakiraga kubasuhuza, kubatega amatwi no kubabwira ko nubwo Abanyarwandakazi batengamaye kubera iryo jabo bubakiwe ubushobozi, natwe twarahangayitse mu gihe cyashize.

Mbere no mu gihe cya Jenoside yakorewe Abatutsi, abagore b’Abanyarwanda bahuye n’ihohoterwa rikomeye mu mateka y’Isi. Bukwagwa inabi buri munsi, bagatotezwa ntakindi bazira uretse kuba bari Abatutsi.

Muri Jenoside yakorewe Abatutsi, ba mama, ba nyogokuru, ba masenge na babyara bacu basambanyijwe ku ngufu mu ruhame, rimwe na rimwe bikorwa n’abana bato bari mu kigero cy’abo babyaye.

Abari batwite batewe amacumu n’ibindi bintu bisongoye mu kubafomozamo abana babaga batwite mbere yo gutsindagira amabuye y’amatoroshi, inshinge n’ibice by’amacupa mu bitsina byabo. Icyo gihe ninabwo umubyeyi wanjye wari ufite imyaka 64 yakatagwamo ibice agihagaze ari muzima mbere yo kujugunywa mu cyobo hamwe na mwene mama wacu, umugore we n’abana ndetse n’abaturanyi bacu kuva ku bakuze kugera ku mpinja.

Abandi bagore bakomokaga mu bwoko bw’Abahutu, nubwo batahigwaga n’interahamwe, ariko nabo bashushubikanyijwe na Leta y’intangondwa z’abicanyi, bajyanwa mu mashayamba cyane cyane aya Congo gukoreshwa nk’ibitambo by’urugamba ndetse n’abacakara bo gusambanywa n’abo babisha.

Nyuma y’imyaka 25, bamwe muri abo bagore baracyari mu mashyamba ya Repubulika Iharanira Demokarasi ya Congo, aho bita ku bana babyaye ku gahato ndetse bamwe bikabaviramo gupfa babyara cyangwa bagafatwa n’uburwayi bwo kujojoba ‘Fistula’ n’izindi ndwara zandurira mu mibonano mpuzabitsina nka SIDA kandi nta buvuzi bafite.

Ubwo rero Seraj wo muri Afghanistan yavugaga ku cyizere cy’amahoro bategereje igihe kirekire, nkuko byagenze ku babyeyi bacu, mu gihe abagore baterwa ubwoba ndetse bakanicirwa mu nzira, cyangwa Scavia adutekerereza uburyo yahohotewe muri Uganda akimara kubyara abazwe, nongeye kubona ya shusho y’ibyabaye mu Rwanda mu 1994, maze numva nongeye gusharirirwa cyane; numva navuza induru ndanguruye nikiriza ikibazo cya Saraj yasozerejeho agira ati “ Ese uru rugamba abagore barwana ruzarangira ryari?’Ubu koko ni ibi nta bindi?”.

Ikindi cyari kibabaje na none, byari ukubona umukobwa muto nka Isabella wo muri Venezuela atunetse mu ntambara yo guharanira amahoro byanyibukije Abanyarwandakazi mu isibaniro yo kubohora igihugu.

Ubwo ndakomeza ndibaza nti kuki koko adafite amahirwe yo kuba mu buzima bumuha amahirwe yo kuryoherwa n’ubuto bwe aho kwirirwa muri ibi? Ubwo kandi na none nahise nshengurwa n’inkuru ya Judy watubwiye ko intambara zo guharanira uburenganzira bwa muntu ngo atazicogoramo aho iwabo muri Leta Zunze Ubumwe bw’Amerika ngo kuva mu 1963!

Nuko nkomeza kwibwira mu mutima nti ‘ubu koko bifite ishingiro kubona Mariam ukomoka muri Syria, ufite impamyabumenyi yakuye muri Kaminuza ikomeye ya McGill, amara amasaha uruhuri mu byumba by’inama ngo aharanira uburenganzira ku bintu bisanzwe? Nti kuki koko atabona aho guhabwa amahirwe yo gukoresha ubwenge bwe ahubwo mu guharanira gusangira amahoro n’abagabo dusangiye iy’Isi twahuriyeho maze tugafatanya kuyigira nziza kurushaho?

Umutima ugakomeza uti ‘ese kuki iyi si ishyira abagore nka Kathleen, Maria na Marie mu mwanya wo kujya ku ishuri bakibanda ku makimbirane, ihohoterwa n’ibindi nka byo aho kubajyana mu kuminuza kwiga gusangira amahoro bigamije impinduka mu mahoro?

Ibyo bishobotse ngira ngo ubwo Bonnie na Michon, ubu bibanze mu gukoresha itangazamakuru ku mbuga nkoranyambaga, mu guharanira amahoro bazabona wenda agahenge bagakora inkuru ku mugore wambere uzajya ku kwezi?

Abo ba HeForShe bandi bari hehe kugira ngo bagarurire icyizere abagore bo kuri iyi Si maze bababwire bati ‘iri siryo herezo?’

Ibikubiye muri iyi nyandiko ni ibitekerezo by’Umuyobozi Mukuru Wungirije w’Ikigo cy’Igihugu cy’Itangazamakuru, Uwanyiligira DeLucco Claudine

Impirimbanyi z'uburenganzira bw'abagore zaturutse muri Syria, Venezuela, Uganda na Afghanistan mu kiganiro mu nama yiga ku burenganzira bw'abagore

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Special pages
. . . . . .