00:00:00 IGIHE NETWORK KN KINYARWANDA EN ENGLISH FR FRANCAIS

Mubazi ya moto, umwana upfuye akivuka?

Yanditswe na Bukuru JC
Kuya 2 June 2022 saa 11:47
Yasuwe :

Hambere aha nanyuze ku bantu bakubita agatwenge biyamira ngo ’hehe no guhendwa na motari’. Narabegereye ngo nanjye numve ibyo byiza bantanze nsanga barasingiza mubazi ya moto imaze amezi abarirwa ku ntoki itangiye gukoreshwa kuri moto zitwara abagenzi mu Mujyi wa Kigali.

Nubwo urugendo rugufi muri Kigali rwagizwe 400 Frw, nta wabura kwishimira ko ukoresheje mubazi ugahaguruka mu mujyi rwagati ukagera ku Murenge wa Mageragere wishyura 1520 Frw kandi mbere nta mumotari washoboraga kujyayo utamuhaye 2000 Frw kuzamura.

Simvuze guciririkanya mu biciro nk’abagura inka hagati ya motari n’umugenzi, kugendana amafaranga. Ibi reka mbireke abatega moto babizi kundusha kandi bose basingiza ikoranabuhanga.

Reka ngaruke kuri bya bitwenge bya bagenzi banjye ubu bifashe mapfubyi bibaza niba ya ’mubazi’ yarabaye umwana wapfuye akivuka. Imbaraga mu gukoresha mubazi n’igitsure byatangiranye, byagiye nka nyomberi.

Aho bigeze biragoye ko wabona umumotari wemera gucana mubazi ngo atware umugenzi. Mperutse kwerekeza hafi y’inyubako ya CHIC mu mujyi nzenguruka abamotari 12 mbasaba kunjyana Nyabugogo bakanca 1000 Frw, bose nta n’umwe wemeye ko dukoresha mubazi kuko babizi ko atarenga 700 Frw.

Mu guhebera urwaje, nemeye kuyatanga ariko ngenda nganira n’uwantwaye ambwira ko impamvu badakoresha mubazi ari uko iyo umugenzi yishyuye bakata motari 10% ryayo. Iki ntacyo gitwaye kuko iyi gahunda ijya gutangira barasobanuriwe.

Ikosa rikomeye ryakozwe mu byo yambwiye ni ukwemera ko abamotari badafite mubazi wenda kuko batarazihabwa cyangwa bazisize mu ngo ku bushake, bajya mu muhanda bagakorana n’abazifite. Iki gifite ingaruka kuko abagenzi bajya hafi bagenda n’abatazifite kuko bo bumvikana bakaba banafata 300 Frw ku rugendo kandi kuri mubazi bidashoboka.

Uwo mumotari wantwaye yarambwiye ati "Umuntu ujya hafi mu bilometero bitatu ntiyakwishyura 500 Frw kandi hari udafite mubazi uri bumutwarire 300 Frw".

Gusa undi mumotari wanganirije, yambwiye ko kwemerera abatazifite gukora bituruka ku bakazibahaye ’Yego Innovision’ kuko abenshi bajya kuzisaba bakababwira ko zitaraboneka bakabaha agapapuro kemeza ko bazisabye.

Ufite mubazi yagize ikibazo we ahabwa icyumweru kimwe cyangwa bibiri bitewe n’imiterere yacyo. Simvuze ko hari bamwe mu Banyarwanda bari kubuzwa gukora kubera amakosa atari ayabo, ariko ndibaza, ikosa ni irya nde?.

Mu masaha y’umugoroba cyangwa mu gihe cy’imvura i Kigali biba ari agahomamunwa ku batega moto. Buri mumotari aba avuga iryo ashatse kandi iyo umubwiye gukoresha mubazi urebye nabi yanagutuka. Ukubashye akubwiza ukuri ko muri icyo gihe abagenzi babaye benshi kuruta moto adashobora gutwara umugenzi bari bumukateho amafaranga.

Ikibazo kiri hano ni ubugenzuzi no guhana. Polisi y’Igihugu icishamo igahagarika bamwe ireba ko bakoresha mubazi yewe ikanabahana, ariko uwavuga ko abakora ubugenzuzi n’ubukana bifite budahagije na busa ntiyaba abeshye. Aha umugenzi ni we urengana kuko arahendwa cyangwa akabura uko agenda. Nonese gutega moto bizabe aka ya mvugo ngo ’bikore cyangwa uhombe?.

Nta wakwirengagiza n’ikibazo cy’abamotari bahagarikwa na polisi kugira ngo irebe ko bubahiriza amabwiriza arimo no gukoresha ikoranabuhanga rya mubazi bakanga bakiruka.

Gukoresha mubazi bifasha umugenzi kuba yanatanga umusoro ku rugendo akoze, nonese abamotari bakomeze banyereze umusoro ku ngufu bitwaje ko umugenzi uri bubasabe mubazi banga kumutwara akabura amahitamo?.

Reka ngaruke ku bagenzi. Birashoboka ko umugenzi yashyirwaho uruhare rwo gutiza umurindi abanga gukoresha mubazi, gusa ikibazwa ni icyo yakora mu gihe asanze igisa n’akagambane k’abamotari ko kudatwara ubasabye mubazi kandi yihuta.

Hari kandi amayeri y’abamotari bacana mubazi ariko zitabara ngo bakunde bajijishe polisi. Uyu ni umuco mubi wo gushaka kunama ku bagenzi no guhisha ayo manyanga.

Undi mumotari wa gatatu twaganiriye, yambwiye ko izi mubazi zikunda kubura ihuzanzira [network] bigatuma zidakora cyangwa zitinda gutanga ubutumwa bwishyura abagenzi. Iki ni ikindi kibazo cyavugutirwa umuti kugira ngo gahunda nziza yo kwimakaza ikoranabuhanga mu gutwara abagenzi igerweho ijana ku ijana.

Mubazi yari yitezweho byinshi ariko itangiye kwibazwaho na benshi

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .