00:00:00 IGIHE NETWORK KN KINYARWANDA EN ENGLISH FR FRANCAIS

Kera habayeho! Filime Nyarwanda zakanyujijeho zitazibagirana

Yanditswe na Uwiduhaye Theos
Kuya 6 June 2022 saa 01:11
Yasuwe :

Uyu munsi Sinema mu Rwanda imaze gutera imbere ku rwego ruhambaye, ku buryo abakinnyi ba filime babaye uruhuri ndetse na filime zikaba zijya hanze umusubirizo nyamara harashize imyaka myinshi uru ruganda rudakoma.

Rwari urugendo rurerure cyane ko kubona filime y’abanyarwanda mu myaka yo kuva mu 2005 kumanuka byari ihurizo rikomeye.

Izari zihari ni izakozwe mu gihe cy’ubukoloni zikozwe n’abazungu. Urugero ni nk’iyakozwe mu 1950, ari nabwo bwa mbere u Rwanda rwakiniwemo filime, yitwa ‘King Solomon’s mines’ cyangwa se “Les mines du roi Salomon”.

Ni filime yakozwe ikomowe ku gatabo gato kari gafite izina nk’iryo, ka Henry Rider Haggard mu 1885.

Iyi filime imara iminota 103, yakiniwe i Rusatira mu Rwanda muri Mutarama kugeza muri Gashyantare 1950, no mu bindi bice bitari u Rwanda maze isohoka mu Ugushyingo 1950.

Uretse urugero rwa filime nk’izo nta munyarwanda wari warigeze akora filime mu myaka yakurikiyeho, uretse mu myaka yo guhera mu 2006 aho abanyarwanda bamwe batangiye gukanguka.

IGIHE yakusanije filime zakanyujijeho mu myaka y’umwaduko wa sinema nyarwanda.

Ikigeragezo cy’ubuzima

Ni filime yamenyekanye mu myaka ya 2007. Igaruka ku bugambanyi bushingiye ku nkuru ya Paul [umwanya ukinwa na Willy Ndahiro] uba ari yararokotse Jenoside yakorewe Abatutsi mu 1994.

Abona akazi keza ndetse ibintu kuri we bikaba bigenda neza gusa inshuti ye Ngenzi [umwanya ukinwa na Daniel Gaga] itangira kumugirira ishyari agatangira gupanga kumusubiza hasi.

Paul aza gufungwa agambaniwe na Ngenzi ashinjwa gufata umugore ku ngufu nyuma y’amafoto biba bivugwa ko ari aye ajya hanze. Ibyifuzo bya Ngenzi biba bisa nk’ibigezweho gusa ukuri kuza kujya hanze.

Iyi filime igaragaramo abakinnyi ba filime nka Aline Gahongayire, Willy Ndahiro, Danny Gaga, Odette Mutoni, Sandrine Cyuzuzo, Faina Mujawamariya na Hyacinthe Uwamariya.

Rwasa

Ni imwe muri filime zakanyujijeho mu Rwanda no hanze yarwo cyane mu babasha kumva ikinyarwanda.

Igaruka ku mugabo uba warabyaye umwana mu gasozi akaza kumuha umwanya muri sosiyete ye iba ikomeye, uyu musore atangira gukora ibishoboka byose ngo ayigarurire ari naho hatangira kuzamo ubugambanyi bwo mu buryo butandukanye.

Zirara zishya

Filime yanditswe na Habyarimana Charles yamamaye cyane mu myaka myinshi ishize. Iyi filime yakorwaga binyuze mu Itorero Abasare.

Yakinwe n’abakinnyi bakomeye nka Samusure, Nyagahene, Kanyombya, Nzovu, Mukarujanga, Nyinawambogo, Nyirakanyana n’abandi.

Irimo ubutumwa butandukanye ariko by’umwihariko uyisangamo inyigisho z’uburyo butandukanye mu buzima busanzwe bwa buri munsi.

Uretse ibyo, ni filime yiganjemo urwenya yaba kuva itangira kugeza irangiye mu bice byayo byose ifite. Mu bice bya mbere itangira Kanyombya uba ari mu bakinnyi b’imena ari umukozi wo mu rugo rwa Samusure na Mukarujanga.

Uyu mugabo ukundwa na benshi kubera uburyo akina asetsa mu bindi bice asimburwa na Gratien Niyitegeka uba akina ari Sekaganda.

Amarira y’urukundo

Ni filime y’urukundo yamenyekanye cyane mu Rwanda. Yakinnwe yibanda ku rukundo rwa Manzi [Kayumba Vianney] na Fabiola [Mukasekuru Hadidja].

Bombi bakundanye bakiri bato urukundo rwabo rutangira rwivangwamo n’umuryango wa Fabiola aho se uba witwa Diallo yavugaga ko umukobwa we atashakwa n’umusore w’umushoferi.

Fabiola yabanaga na mukase wamufataga nabi ndetse akamuteranya na se akenshi amushyiraho amafuti atakoze, akenyegeza umuriro kugira ngo uyu mukobwa ahore ku nkeke.

Fabiola na Manzi bagiye bahura n’ibizazane bitandukanye mu rukundo rwabo kuva batangira gukundana.

Intare y’ingore

Intare y’Ingore ni filime yamenyekanye cyane mu Rwanda. Iyi filime igaruka ku mugore witwa Intare y’Ingore [umwanya ukinwa na Uwamahoro Antoinette] uba abangamira umwana w’umukobwa aba abereye mukase witwa Rosine, akamubuza uburenganzira bwose ndetse akamutoteza cyane.

Bigera naho amubangamira mu rukundo umusore witwa Bonny aba amukunda agashaka kwicisha Peter wari waratahuye amayeri yarakoresheje we n’umukobwa we, washakaga kwigarurira umukunzi we.

Haranira kubaho

Ni filime nayo iri mu mujyo wa ‘Zirara zishya’ kuko abakinnyi hafi ya bose bari bari muri iyi filime ari nabo bo muri iyi kandi na nyirayo ni umwe.

Muri ‘Haranira kubaho’ hakinamo Samusure, Nyagahene, Kanyombya, Nzovu, Mukarujanga, Nyinawambogo, Nyirakanyana, Nyirakomonyo, Nyirankende n’abandi.

Nayo yari irimo ubutumwa butandukanye bwerekeye sosiyete muri rusange. Uretse ubu butumwa nayo yiganjemo urwenya rwa Kanyombya, Samusure n’abandi bayirimo cyane ko ari filime buri wese wayirebaga atayihagaga.

Urudasanzwe

Ni imwe muri filime z’urukundo zakanyujijeho mu Rwanda. Ni iya Bizumuremyi Mamadou Fidele. Ivuga ku rukundo rw’abakobwa bane bakunze umusore umwe.

Long Coat

Long Coat ni filime iviga inkuru mpamo kuri Bamporiki Edouard uvuka ku mubyeyi (se) wakoze Jenoside yakorewe Abatutsi mu 1994, aho agerageza gufasha umukobwa umubyeyi we yiciye ariko ababyeyi be (se na nyina) bakabimuhora.

Long Coat ni filime yasohotse mu mwaka wa 2009 ikorwa na Bamporiki Edouard wayoboye Komisiyo y’Itorero ry’Igihugu, ubu ufungiwe iwe mu rugo. Yakiniwe mu Ntara y’Iburengerazuba aho akomoka.

Muri iyi filime hagaragaramo bamwe mu bantu bazwi nk’uwahoze ari umukinnyi w’ikipe y’igihugu y’umupira w’amaguru Jimmy Gatete, umuhanzi Mani Martin n’umuhanzikazi Nirere Shanel ukina ari umukinnyi w’imena.

‘Long Coat’ ni ubuzima bw’impamo Bamporiki Edouard yanyunzemo nyuma ya Jenoside yakorewe Abatutsi mu 1994. Impamvu yatumye iyi filime yitwa Long Coat ni ikote rirerire ryari rihishe mu gisenge cy’inzu y’iwabo wa Bamporiki uba yitwa Rugamba, rikaba ryarahoze ari irya se wa Shanel (ukina yitwa Claire) wishwe na se wa Bamporiki.

Rugamba aba abana na nyina umubyara, se aba afungiye icyaha cya jenoside, ajya guhanura igitoki cyari gitaze mu rusenge ngo agemurire se muri gereza, akaza kubona iryo koti, yarimanura nyina akumubeshya ko irya sekuru se yasize ngo ajye arimwibukiraho. Ari mu nzira agemuriye se, Rugamba ahura na Claire uba waraje kwibuka abo mu muryango we gusa bose baba bataziranye.

Baza kwibwibirana ndetse umwe akavuga ko umubyeyi we afungiye jenoside undi akamubwira ko ababyeyi bishwe muri jenoside. Rugamba asaba Claire kumubera musaza we mu kimbu cy’abavandimwe be bishwe muri jenoside yakorewe Abatutsi nawe akabimwemerera ndetse bakemeranywa ko bazajyana gushyira indabo ku mva ishyinguyemo abe.

Aho se wa Rugamba aba afungiye muri gereza aba yarinangiye umutima avuga ko yafunzwe azira ubusa. Umuhungu we amubwira ibya rya koti ‘akamubwira ko rifite amateka ashobora kubakoraho kandi ko bagomba kuribika kure’.

Amubwira ibyo kujya kwifatanya n’abandi kwibuka abazize jenoside nabwo se akamwuka inabi. Nyina wa Rugamba uba udakozwa ibyo kumuhishurira amateka nyakuri ya rya koti, ntanashimishwa no kuba Rugamba yifatanya n’abarokotse Jenoside ku buryo agera n’aho amwirukana mu rugo amenyeko yajyanye na Claire gushyira indabo ku mva ishyinguyemo abe.

Uretse aba ababyeyi ba Rugamba, Shyaka (Jimmy Gatete) nawe uba wararokotse Jenoside ntiyishimira umubano w’aba bana, aho abuza Claire kugendana na Rugamba ariko akamwima amatwi. Ku musozo wa ‘Long Coat’ hategurwa ijoro ryo kwibuka, umusaza umwe agatanga ubuhamya, ariko akavuga ukuntu ashengurwa no kuba atarabashije gushyingura umwana we mu cyubahiro kuko atazi uwamwishe.

Rugamba ahita avuga ko azi aho ashyinguye ndetse ko se yamwishe akamuta mu musarani kandi ko n’ubu ari ho akiri. Umwe muri bari aho yitegereza Bamporiki uba wambaye rya koti rirerire, agahita avuga ko risa n’iry’umututsi wahoze atuye muri ako gace, nyamara we arabihakana kuko yari aziko ari irya sekuru.

Mu gihe aba ari kurikuramo ngo barebe neza, indangamuntu iba irimo iratakara, bajya kureba bagasanga ni iya se wa Claire. Filime irangira Claire amenye ko umubyeyi we yishwe na se wa Rugamba uba yariyemeje kumubera musaza we.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .